ކ. މާލެ
|
18 މާރޗް 2019 | ހޯމަ 21:49
އެމްޑީޕީން ތާއީދު އަނބުރާ ގެންދިޔަ ކަމަށް ބުނާ އެމްޑީޕީގެ ކެންޑިޑޭޓް  އަބްދުލް މުޣުނީ (މ) ތާއީދު ހޯދުމުގެ ހަރަކާތެއްގެ ތެރެއިން
އެމްޑީޕީން ތާއީދު އަނބުރާ ގެންދިޔަ ކަމަށް ބުނާ އެމްޑީޕީގެ ކެންޑިޑޭޓް އަބްދުލް މުޣުނީ (މ) ތާއީދު ހޯދުމުގެ ހަރަކާތެއްގެ ތެރެއިން
އެމްޑީޕީ
ރައްޔިތުންގެ މަޖިލިސް
ތުހުމަތާ ގުޅޭ ގޮތުން ސުވާލެއް ވެސް ނުކުރޭ، އެއީ އެމްޑީޕީގެ ނިންމުމެއް ނޫން: މުޣުނީ
 
އޭނާގެ ދިފާއުގައި ތިނަދޫ އެމްޑީޕީ ސަޕޯޓަރުން އަޑުއުފުލި

ގެވެށި އަނިޔާކުރި ކަމުގެ ތުހުމަތާ ގުޅޭ ގޮތުން އެމްޑީޕީ ސެކަރެޓޭރިއަޓުން ސުވާލު ވެސް ނުކުރާ ކަމަށާއި މައްސަލަ ބަލާކަން ވެސް އެންގުމެއް ނެތި، އެ ޕާޓީން ކުރި ތާއީދު އަނބުރާ ގެންދިޔަ ކަމަށް ގަބޫލުފުޅު ނުކުރައްވާ ކަމަށް ތިނަދޫ އުތުރު ދާއިރާއަށް ވާދަ ކުރައްވާ އެމްޑީޕީ ކެންޑިޑޭޓް އަބްދުލް މުޣުނީ ވިދާޅުވެއްޖެއެވެ.

"ރާއްޖެއެމްވީ"އާ ވާހަކަ ދައްކަމުން މުޣުނީ ވިދާޅުވީ ގެވެށި އަނިޔާ ކުރި ކަމަށް ބުނެ، އޭނާއާ ގުޅުވައިގެން ފަތުރާ ވާހަކަތައް ޕާޓީން ބަލަމުންދާ ކަން މިހާތަނަށް ވެސް އަންގާފައި ނުވާ ކަމަށާއި ތާއީދު އަނބުރާ ގެންދިޔަކަން ވެސް އަންގާފައި ނުވާ ކަމަށެވެ. އެމްޑީޕީއަކީ ބަޔަކު ދައްކާ "ތޯތޯ ވާހަކަ"ތަކަށް ބަލައިގެން، ގޮތް ނިންމާ ޕާޓީއެއް ނޫން ކަމަށާއި އޭނާއާ މެދު އެޅި ކަމަށް ބުނާ ފިޔަވަޅަކީ އެ ޕާޓީގެ އެއްވެސް ގުނަވަނަކުން ނިންމި ކަމެއް ނޫން ކަމަށް މުޣުނީ ވިދާޅުވިއެވެ.

"...އެމްޑީޕީއަކީ ގުނަވަން ހަމަ ޕާޓީއެއް. ކަންކަން ނިންމުމަށް އުސޫލުތަކެއް ކަނޑައެޅި، ގުނަވަންތަކެއް ހުރޭ. ގޮތް ނިންމި ކަމަށް މި އެނގުނީ ނޫހުން. މިއީ އެއް ނޫން މި ކަން ވާންޖެހޭނެ ގޮތަކީ،" މުޣުނީ ވިދާޅުވިއެވެ.

ހާހަކަށް ވުރެ ގިނަ މީހުން ވޯޓުލީ، އެމްޑީޕީ ޕްރައިމަރީގައި 685 ވޯޓު ހޯއްދަވައިގެން އެ ޕާޓީގެ ޓިކެޓު ކަށަވަރު ކުރެއްވި މުޣުނީ ވިދާޅުވީ ކެމްޕެއިން ދަނީ ވަރަށް ފޯރިއާ އެކުގައި ކަމަށާއި ދާއިރާގެ ރައްޔިތުންގެ ލޯތްބާ އެކު އެ ދާއިރާގެ ގޮނޑި ކާމިޔާބު ކުރައްވާނެ ކަމަށެވެ.

އެމްޑީޕީގެ ތާއީދު ބޮޑު ތިނަދޫގައި ހޯމަ ދުވަހު ވަނީ މުޣުނީގެ ދިފާއުގައި އެމްޑީޕީގެ ސަޕޯޓަރުންތަކެއް ނުކުމެ އަޑު އުފުލާފައެވެ. ތިނަދޫގެ ބޮޑެތި މަގުތަކުގައި ހިނގާލުމެއްގެ ގޮތަށް ކުރިއަށް ގެންދިޔަ އަޑު އުފުލުމުގައި ބައިވެރިވި ބައެއް މީހުން ހިފަހައްޓައިގެން ތިބި ޕޯސްޓަރުތަކުގައި ލިޔެފައި ވަނީ އެ ރަށަކީ "ހަވަރު ތިނަދޫ" ކަމަށާއި އުސޫލުން ބޭރުން ގޮތް ތަނެއް ނުނިންމޭނެ ކަމަށާއި އެ ދާއިރާ ތަމްސީލު ކުރަން ނުކުންނަ ކެންޑިޑޭޓް ކަނޑައެޅީ ދާއިރާގެ އެމްޑީޕީގެ އާންމު މެމްބަރުން ކަމަށެވެ.

މުޣުނީގެ މައްޗަށް ތުހުމަތުކޮށްފައި ވަނީ މީގެ 10 އަހަރު ކުރިން އޭނާގެ އޭރުގެ އަންހެނުންނަށް ގެވެށި އަނިޔާ ކުރި ކަމުގެ ތުހުމަތެވެ. އެ މައްސަލަ ދައުލަތުގެ އިދާރާއަކަށް ހުށަހަޅާފައި ނުވެއެވެ. އަދި ޝަރުއީ ކޯޓަކަށް ހުށަހަޅައި ޝަރީއަތް ހިންގައި، ގޮތް ކަނޑައަޅާފައެއް ވެސް ނުވެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުޝާމް މުހަޢްމަދް
25%
0%
50%
0%
25%
0%
ކޮމެންޓް