ވޭނަކުން ޖެހި 52 އަހަރުގެ އަންހެނަކަށް އަނިޔާވެއްޖެ
އިތުރު ފަރުވާއަށް މާލެ ގެންނަން ހަމަޖެހިފައިވޭ
އެކްސިޑެންޓް ހިނގި ވޭން
ތ. ތިމަރަފުށީގައި ހިނގި އެކްސިޑެންޓެއްގައި ވޭނަކުން ޖެހި އަންހެނަކަށް އަނިޔާވެއްޖެއެވެ.
މި އެކްސިޑެންޓް ހިނގާފައިވަނީ ތިމަރަފުށީ ހިއްކި ސަރަހައްދުން އެއާޕޯޓަށް ދާން އޮންނަ މަގުން ހިނގާފައި ދިޔަ އުމުރުން 52 އަހަރުގެ އަންހެނެއް ގައިގައި ވޭނުން ޖެހިގެންނެވެ.
ފުލުހުން ބުނީ އެކްސިޑެންޓްވުމުގެ ސަބަބުން އެ އަންހެން މީހާގެ ބޮލުގެ ތިން ތަނަކުން ފަޅައިގެން ގޮސް އެކިވަރުގެ އަނިޔާ ލިބިފައިވާ ކަމަށެވެ. އޭނާ އަށް ތިމަރަފުށީ ހެލްތް ސެންޓަރުގައި ފަރުވާ ދެމުންދާ ކަމަށް ފުލުހުން ބުންޏެވެ.
އިތުރު ފަރުވާ އަށް އެ އަންހެން މީހާ ހެލިކޮޕްޓަރުގައި މާލެ ގެނައުމަށް ހަމަޖެހިފައިވާ ކަމަށް އެމްއެންޑީއެފް އިން މައުލޫމާތުދެއެވެ.
މީގެ ހަފްތާއެއް ކުރިން ހުޅުމާލޭގައި މާބަނޑު އަންހެނަކު މަގު ހުރަސް ކުރަނިކޮށް އެކްސިޑެންޓްވެ ވަނީ ބޯފަޅައިގެން ގޮސްފައެވެ.
ފުލުހުންގެ ތަފާތު ހިސާބުތައް ދައްކާ ގޮތުން ވޭތުވެދިޔަ ހަފްތާގައި މަގުމަތީގެ 52 އެކްސިޑެންޓެއް ހިނގާފައިވެ އެވެ.
