އެޖެންޑާ19ގައި ހުރިކަންކަމަކީ ފާއިތުވެދިޔަ 30 އަހަރު ރައްޔިތުން ބޭނުންވެފައިވާ ކަންކަން: މިނިސްޓަރު ފައްޔާޒު
ރައްޔިތުންގެ ފުރިހަމަ އެއްބާރުލުން ބޭނުންވޭ
އިކޮނަމިކް މިނިސްޓަރު ފައްޔާޒު އިސްމާއިލް
އެޖެންޑާ19ގައި ހުރިކަންކަމަކީ ފާއިތުވެދިޔަ 30 އަހަރު ދުވަހު ދިވެހި ރައްޔިތުން ބޭނުންވެފައިވާ ކަންކަން އިކޮނަމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
އައްޑޫގެ ތަސައްވުރު ތައާރަފް ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ފައްޔާޒު ވިދާޅުވީ އެޖެންޑާ19 ހުރި ހުރިހާ ކަމަކީ ވޭތުވެދިޔަ 30 އަކަށް އަހަރު ދިވެހި ރައްޔިތުންނާއި، ޚާއްސަކޮށް އެމްޑީޕީގެ ލީޑަރުން ދެކެމުންއައި ހުވަފެންތަކެއް ކަމަށެވެ. އަދި މިއަދުގެ އަޒުމަކީ މިކަންކަން ހަގީގަތަކަށް ވެގެންދިއުން ކަމަށާއި، އެޖެންޑާ19ގައިވާ އެންމެހައިކަންކަން ހަގީގަތަކަށް ހެދުމަށް މަސައްކަތް ފަށާފައިވާ ކަމަށް އޭނާ ވިދާޅުވިއެވެ.
މިނިސްޓަރު ފައްޔާޒު ވިދާޅުވީ ސަރުކާރަށް ކަންކަން ކުރެވޭނީ ރައްޔިތުންގެ ފުރިހަމަ އެއްބާރުލުމާއެކު ކަމަށާއި، މިއެޖެންޑާ އެކުލަވާލީ ރައްޔިތުންގެ ވިސްނުމާ އެގޮތަށް ކަމަށެވެ. އެގޮތުން އެޖެންޑާ19 އަށް އިދިކޮޅު ފަރާތްތަކުން ވެސް ދާއީދު ކުރާނެ ކަމަށް އޭނާ ވިދާޅުވިއެވެ.
އައްޑޫގެ ވިޝަންއަށް އަލިއަޅުއްވާލައްވާ މިނިސްޓަރު ފައްޔާޒު ވިދާޅުވީ އެކަންކަމަކީ ވެސް ރިޔާސީ އިންތިޚާބު ހުށަހެޅުއްވި ކަންކަން ކަމަށެވެ.
"އައްޑޫ ސިޓީއާ ޕްލޭނިން މިނިސްޓްރީއާ އިކޮނޮމިކް މިނިސްޓްރީއާ ވެސް ގުޅިގެން ކުރެވުނު މަސައްކަތުން މިހާރު ވަނީ އަޅުގަނޑުމެންނަށް އެކުރިއަށްދާނެ ގޮތުގެ ތަސައްވުރެއް ފެނިފަ. އެވިޝަން ހޯދުމަށް އަޅުގަނޑުމެން އެންމެ އިސްކަމެއް މިދެނީ އިންސާނީ ވަސީލަތްތައް އިތުރުކުރަން"މިނިސްޓަރު ފައްޔާޒު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ އެޖެންޑާ19ގައިވާ އެއްވެސް ކަމެއް ދޮގު ނުކުރޭނެ ކަމަށާއި، އެކަންކަން ތަންފީޒުވެގެން ދިއުމުން ކުރިއެރުން ލިބޭނީ ގައުމާ ރައްޔިތުންނަށް ކަމަށެވެ.
