ބޮލީވުޑުގެ ރަސްގެފާނު އަމީތާބް ބައްޗަންގެ އެންމެ ފަހުގެ ފިލްމު 'ބަދްލާ' އިންޑިއާގެ ސިނަމާތަކުގައި ހުކުރު ދުވަހު ރިލީޒްކުރާނެއެވެ.
ގިނަ ބަޔަކު އިންތިޒާރު ކުރަމުންދާ މިފިލްމުގައި އަމީތާބާއި އެކު ދެން ފެނިގެންދާނީ ތާޕްސީ ޕަންނޫއެވެ. ކުރިންވެސް މިދެތަރިން އެކުގައި ކުޅެފައިވާ ޕިންކު ވަނީ ގިނަ ބައެއްގެ މަޤްބޫލުކަން ހޯދާފައެވެ.
މިފިލްމު ރިލީޒްކުރުމަށް ކުޑަ ވަގުތުކޮޅަކަށް ވެފައި ވަނިކޮށް ފިލްމުގެ ޓީމުން ވަނީ އަނެއްކާވެސް މިފިލްމުގެ އިތުރު ޕޯސްޓަރެއް ބެލުންތެރިންނަށް ދޫކޮށްލާފައެވެ. ކުޑަ ދޮރެއްގެ ފުރަގަހުގައި އަމީތާބާއި ތާޕްސީ ހުއްޓިގެން ތިބި މަންޒަރު ފެންނަ މި ޕޯސްޓަރުން މުޅި ފިލްމާއި ދޭތެރޭ މީހުން ދެކޭގޮތް މުޅިން ބަދަލުވެެގެންދާނެ ކަމަށް ބުނެ މިފިލްމު އުފައްދާ ރެޑް ޗިލީ އެންޓަރޓެއިންމަންޓުން ވަނީ ޓުވީޓްކޮށްފަައެވެ.
އަދި ބާދަލް ގުޕްތާއަށް އެ ދޮގުތަކުގެ ހަޤީޤަތް އެނގޭނެތޯ ބުނެ ވަނީ ސުވާލު އުފައްދާފައެވެ.
މިފިލްމުގެ ޓްރެއިލާވެސް ދައްކަން ފަށާފައިވާއިރު މިއީ މިސްޓީރީ ވާހަކައެކެވެ. އެގޮތުން މިފިލްމުގައި ދައްކުވައިދެނީ ނައިނާ (ތާފްސީ ޕަންނޫ)ގެ ހަޔާތުގައި އޭނާއަށް ކުރިމަތިވާ އެކި ކަންތައްތަކާއި އަދި ބްލެކްމެއިލް ކުރުމުގެ ސަބަބުން އޭނާ ތަހައްމަލު ކުރަމުންދާ ކަންކަމެވެ. މުޅި ވާހަކަ އެހެން ގޮތަކަށް ބަދަލުވެގެންދަނީ އޭނާ ރައްޓެހިވެގެންއުޅުނު ފިރިހެން ކުއްޖާ މަރާލުމާއި ގުޅިގެން އެކަމުގައި އޭނާ ކުށްވެރިއަކަށް ވެގެންދާ ހިސާބުންނެވެ.
ސުޖޯއީ ގޯޝް ޑައިރެކްޓްކޮށްފައިވާ މިފިލްމު ބެލުންތެރިންނާއި ހަމައަށް އަންނާނީ މާރޗްމަހުގެ 8 ވަނަ ދުވަހުގައެވެ.
