ޓިއުނީޝިއާގެ ގާނޫނުހަދާ މަޖިލީހުގެ އިންތިޚާބު އޮކްޓޯބަރު މަހުގެ 6ގައި އަދި ރިޔާސީ އިންތިޚާބު ނޮވެމްބަރު މަހުގެ 10 ވަނަ ދުވަހު ބާއްވާނެ ކަމަށް އެ ގައުމުގެ އިލެކްޓޯރަލް ކޮމިޝަނުން ބުދަ ދުވަހު ބުނެފިއެވެ.
މިއީ 2011 ވަނަ އަހަރު ގެނައި އިންގިލާބުގައި އެ ގައުމުގެ ޚުދުމުޚުތާރު ވެރިޔާ ޒައިނުލް އާބިދީން ބިން އަލީގެ ވެރިކަން ވައްޓާލިފަހުން އެގައުމުގައި ބާއްވާ ތިންވަނަ މިިނިވަން އިންތިޚާބެވެ.
"ގާނޫނުހަދާ މަޖިލީހުގެ އިންތިޚާބު އޮންނާނީ އޮކްޓޯބަރ 6ގައި އަދި ރިޔާސީ އިންތިޚާބުގެ ފުރަތަމަ ބުރު އޮންނާނީ ނޮވެމްބަރު މަހުގެ 10 ގައި"އިންޑިޕެންޑެންޓް އިލެކްޓޯރަލް ކޮމިޓީގެ ރައީސް ނަބީލް ބަފޫން ވިދާޅުވިއެެވެ.
ޤާނޫނުހަދާ މަޖިލީހުގެ އިންތިޚާބުގައި އެންމެ ގާތުން ވާދަކުރާނެކަމަށް ބެލެވެނީ މެދުމިނުގެ އިސްލާމީ ޕާޓީއެއް ކަމަށްވާ އައްނަހްދާ ޕާޓީއާއި ބޮޑުވަޒީރު ޔޫސުފް ކާހެދްގެ އިލްމާނިއްޔަ ފިކުރުގެ ތަހްޔާ ތޫނުސް ޕާޓީ އަދި ރައީސްގެ ދަރިކަލުން ހާފިދް ކާއިދް އަސަބްސީގެ ނިދާ ތޫނިސް ޕާޓީއެވެ.
އެ ޕާޓީތަކުުގެ ކޯލިޝަންއަކުން ގައުމު ހިންގަމުންދާއިރު ޕާޓީތަކުގެ މެދުގައި އޮތް ކޯޅުންތަކުގެ ސަބަބުން އިގްތިސާދީ ދުވެލި ދަށްވެ އެހީދޭ ގައުމުތަކުން ޑިމާންޑް ކުރަމުންދާ އިސްލާހުތައް ވަނީ މަޑުޖެހިފައެވެ.
މިހާތަނަށް އަދި އެއްވެސް ފަރާތަކުން ރިޔާސީ އިންތިޚާބަށް ވާދަކުރައްވާނެ ކަމަށް އިއުލާނު ކޮށްފައެއްނުވެއެވެ.
ޓިއުނީޝިއާއަށް 2011 ވަނަ އަހަރު ގެނައި ޑިމޮކްރެޓިކް ބަދަލަށް ދުނިޔޭގެ ތައުރީފް އޮހުނު ނަމަވެސް އިގްތިސާދީ ބަދަލުތައް ގެނައުމާއި އިންފްލޭޝަނާއި ވަޒީފާ ނެތުމުގެ މައްސަލައަށް ހައްލު ގެނައުމަށް ކެބިނެޓަށް ވަނީ ނުކުޅެދިފައެވެ.
