ތަރައްގީގެ ރޮނގުގައި ކ. މާފުށި މިސާލަކަށް ބެލުމަށްފަހު، އެހެން ރަށްރަށް ވެސް ތަރައްގީ ކުރުމަށް ކުރީގެ ރައީސް މުހައްމަދު ނަޝީދު ގޮވާލައްވައިފި އެވެ.
އެމްޑީޕީގެ ޓިކެޓްގައި ކ. ގުރައިދޫ ދާއިރާއަށް ވާދަކުރައްވާ އާދަމް ސަލީމްގެ ކެންޕޭންގެ ތެރެއިން ކ. މާފުއްޓަށް ވަޑައިގެން ވާހަކަފުޅުދައްކަވަމުން އެމްޑީޕީގެ ރައީސްކަންވެސް ކުރައްވާ ނަޝީދު ވިދާޅުވީ ތަރައްގީގެ ރޮނގުން މާފުއްޓަށް ބަދަލު އައި ބާރުމިނުގައި ބަދަލުތައް އައި އެއްވެސް ރަށެއް މިރާއްޖޭގައި ނެތް ކަމަށެވެ. އަދި ގެސްޓްހައުސް ވިޔަފާރި ހިންގުމުގެ ފުރުސަތު ލިބުމާއެކު އޭގެ މަންފާ އެންމެ ބޮޑަށް ނަގަމުން އަންނަ އެރަށަކީ މާފުށި ކަމަށް އެމަނިކުފާނު ވިދާޅުވި އެވެ.
ރައީސް ނަޝީދު ވިދާޅުވީ ގެސްޓްހައުސް ވިޔަފާރި ފަށައިގަތުމުގެ ގޮތުން އެރަށުގައި ފެނާއި ނަރުދަމާގެ ނިޒާމު ގާއިމް ކުރެވި، ބަނދަރު ހެދިގެން ދިއުމީ ރަށަށް ލިބުނު ބޮޑު ކުރިއެރުމެއް ކަމަށެވެ. އަދި ވިދާޅުވީ ރަށުގެ ޒުވާނުން ރަށުގައި ތިބެގެން ކުރާ ވިޔާފާރިގެ ސަބަބުން ރަށަށް އެތައް ދިރުންތަކެއް ލިބިފައިވާ ކަމަށެވެ. މާފުށީގެ ރައްޔިތުންގެ އިތުރުން އެހެން ރަށްރަށުގެ މީހުން އެރަށުގައި ދިރިއުޅެމުން އަންނަކަން ރައީސް ނަޝީދު ފާހަގަކުރެއްވި އެވެ.
މީގެ އިތުރުން ނަޝީދު ވިދާޅުވީ މާފުށިން އަހަރެއްގެ މައްޗަށް އެއްމިލިއަން ޑޮލަރާ ގާތްކުރާ އަދަދަށް ދައުލަތަށް ޓެކްސްގެ ގޮތުގައި ފައިސާ ދައްކާ ކަމަށެވެ. މިއީ ގައުމަށް ލިބޭ ކުރިއެރުމެއް ކަމަށް ނަޝީދު ވިދާޅުވިއެވެ.
"ވިޔަފާރީގެ ފައިދާއާއި، ޑިއުޓީން ވަންނަ އެއްޗަކާ އަދި އެހެން އާންމު ޖީއެސްޓީ ވަންނަ އެއްޗެއް އިތުރު ކުރީމަ މިމާފުށިން ދައުލަތަށް އެބަލިބޭ 20 ނުވަތަ 25 މިލިއަން ރުފިޔާ. ދިވެހިރާއްޖޭގެ ރަށްތައް ބަދަލުވަމުން މިއައި އައުމުގައި އެންމެ ރަނގަޅު މިސާލަކީ މި މާފުށި. އަޅުގަނޑު ކީ ފޮތަކުން ވޯލްޑްބޭންކުން މި މާފުށި މިސާލެއްގެ ގޮތުގައި ނަގާ އެހެން ގައުމުތަކަށް އެބަ ދައްކާ. މާފުށީ ރައްޔިތުން ފަހުރުވެރިވާނެ." ނަޝީދު ވިދާޅުވިއެވެ.
ދަތުރުފަތުރުގެ ނިޒާމަށް އަލިއަޅުއްވާލައްވާ ރައީސް ނަޝީދު ވިދާޅުވީ މާފުއްޓާއި މާލެއާ ދޭތެރޭގައި އަބަދުވެސް އުޅަނދުފަހަރު ދުއްވާ ކަމަށާއި، މިއީ ވެސް ރައްޔިތުންނަށް ލިބޭ ބޮޑު ކުރިއެރުމެއް ކަމަށެވެ. އަދި ބޭސްފަރުވާއަށް މާލެ އަންނަ މީހުން މާފުށީގައި މަޑުކުރާ ކަމަށާއި، ފެރީން ޑޮކްޓަރަށް ދައްކަން ބޭނުންވާ ގަޑީގަ މާލެ އަންނަ އައުމަކީ އެރައްޔިތު މީހާގެ ޖީބަށް ލިބޭ ލުޔެއް ކަމަށެވެ.
