ޕްރިމިއާ ލީގު: ޔުނައިޓެޑާއި، ސިޓީ މޮޅުވިއިރު، އާސެނަލް އާއި ޓޮޓެންހަމް އެއްވަރު

ޕްރިމިއާ ލީގުގައި މެންޗެސްޓާ ޔުނައިޓެޑާއި، މެންޗެސްޓާ ސިޓީ މޮޅުވިއިރު، އާސެނަލް އާއި ޓޮޓެންހަމް ހޮޓްސްޕާގެ ކުރިމަތިލުން އެއްވަރުވެގެން ނިމިއްޖެއެވެ.

ހޮނިހިރު ދުވަހުގެ ރޭ ކުޅުނު މެޗުން ޔުނައިޓެޑު މޮޅުވީ ސައުތެމްޕްޓަންއާ ވާދަކޮށް 2-3 ގެ ނަތީޖާއަކުންނެވެ.

ޔުނައިޓެޑު ދަނޑުގައި ކުޅުނު މި މެޗު ފެށިގެން 26 ވަނަ މިނެޓުގައި ސައުތެމްޕްޓަން އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ވެލެރީއެވެ.

މި ލަނޑާ އެކު ޔުނައިޓެޑުން ވަނީ އެޓީމުގެ އެޓޭކްތައް ވަރުގަދަކޮށްފައެވެ. އެގޮތުން ލަނޑު ޖެހުމަށް ފުރުތަމަ ހާފްގައި އެޓީމުން ވަނީ ފުރުސަތުތަކެއް ތަނަވަސްކޮށްފައެވެ. ނަމަވެސް އެ ފުރުސަތުތަކުގެ ބޭނުން އެންމެ އެދެވޭ ގޮތުގައި އެޓީމަށް ނުހިފެއެވެ.

ދެވަނަ ހާފް ފެށިގެން ޔުނައިޓެޑުން ވަނީ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އެންޑްރިއަސް ޕިއެރާއެވެ. އޭގެ ހަ މިނެޓު ފަހުން ރޮމެލޫ ލުކާކޫ ވަނީ ލަނޑެއް ކާމިޔާބުކޮށް ފުރަތަމަ ފަހަރަށް ޔުނައިޓެޑަށް މެޗުގެ ލީޑު ނަގައިދީފައެވެ. ނަމަވެސް ސައުތެމްޕްޓަން އިން ވަނީ 75 ވަނަ މިނެޓުގައި މެޗުގެ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ވާޑް ޕްރައުސްއެވެ. މެޗުން ޔުނައިޓެޑު މޮޅުވި ލަނޑު 88 ވަނަ މިނެޓުގައި ކާމިޔާބުކުރީ ލުކާކޫއެވެ.

މި ނަތީޖާއާ އެކު ކުޅުނު 29 މެޗުން ލިބުނު 58 ޕޮއިންޓާއެކު ޔުނައިޓެޑު ވަނީ ޕޮއިންޓް ތާވަލުގެ ހަތަރުވަނައަށް ޖެހިލާފައެވެ. މެޗުން ބަލިވި ސައުތެމްޕްޓަން އޮތީ ކުޅުނު 29 މެޗުން ލިބުނު 27 ޕޮއިންޓާއެކު ޕޮއިންޓް ތާވަލުގެ 17 ވަނައިގައެވެ.

ހޮނިހިރު ދުވަހުގެ ރޭ ޓޮޓެންހަމް އާއި އާސެނަލް ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

އާސެނަލް ދަނޑުގައި ކުޅުނު މި މެޗު ފެށިގެން 16 ވަނަ މިނެޓުގައި ކާމިޔާބުކުރީ އާރޮން ރަމްސީއެވެ. ޓޮޓެންހަމްއަށް ނަތީޖާ ހަމަހަމަކޮށްދިނީ 74 ވަނަ މިނެޓުގައި ލިބުނު ޕެނަލްޓީއަކުން ހެރީ ކޭންއެވެ.

މި ނަތީޖާއާ އެކު ޓޮޓެންހަމް އޮތީ ކުޅުނު 29 މެޗުން ލިބުނު 61 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން ބަލިވި އާސެނަލް އޮތީ ކުޅުނު 29 މެޗުން ލިބުނު 57 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ.

ހޮނިހިރު ދުވަހުގެ ރޭ ކުޅުނު މެޗުން ސިޓީ މޮޅުވީ އޭއެފްސީ ބޯންމައުތުއާ ވާދަކޮށް 0-1 ގެ ނަތީޖާއަކުންނެވެ.

ބޯންމައުތު ދަނޑުގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު 55 ވަނަ މިނެޓުގައި ކާމިޔާބުކުރީ ރިޔާދު މަހުރޭޒްއެވެ.

މި ނަތީޖާއާއެކު ސިޓީ އޮތީ ކުޅުނު 29 މެޗުން ލިބުނު 71 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ބޯންމައުތު އޮތީ ކުޅުނު 29 މެޗުން ލިބުނު 34 ޕޮއިންޓާއެކު ޕޮއިންޓް ތާވަލުގެ 12 ވަނައިގައެވެ.