ސައުދީ އަރަބިއްޔާގެ ސަރުކާރުން ބާއްވާ ހެލްތު މިނިސްޓްރީގެ ސަމިޓްގައި ހެލްތު މިނިސްޓަރު އަބްދުﷲ އަމީން ބައިވެރިވެވަޑައިގެންފިއެވެ.
ސައުދީ ޢަރަބިއްޔާގައި މި މަހުގެ 2 އިން 3 އަށް ކުރިއަށްދާ މި ސަމިޓްގައި ބަލިމީހުންގެ ރައްކާތެރިކަމާ ގުޅޭ ގޮތުން ކުރަންޖެހޭ މަސައްކަތްތަކަށް ގައުމުތައް އަހުލުވެރިކުރުވައި، މިކަމާ ގުޅިގެން ގައުމުތަކުން ކުރާ މަސައްކަތްތައް އިތުރަށް ހަރުދަނާ ކުރުމަށާއި، އެހީ ބޭނުންވާ ދާއިރާތަކާ ގުޅޭ ގޮތުން މަޝްވަރާކުރުމަށް ބާއްވާ ބައްދަލުވުމެކެވެ.
ހެލްތު މިނިސްޓްރީން ބުނީ ދުނިޔޭގެ 49 ގައުމަކުން ބައިވެރިވި 31 ސިއްހަތާ ބެހޭ ވަޒީރުންނާއި، ދުނިޔޭގެ ސިއްހަތު ޖަމިއްޔާގެ އިސްވެރިންގެ އިތުރުން އެހީދޭ ޖަމިއްޔާތަކުގެ އިސްބޭފުޅުން ބައިވެރިވެވަޑައިގަންނަވާ މިސަމިޓްގައި މިނިސްޓަރު އަމީން ތަގްރީރުކުރައްވާ ގޮތަށް ވަނީ ހަމަޖެހިފަވާ ކަމަށެވެ.
މި އަހަރުގެ ސަމިޓްގައި ގައުމުތަކުން ބަލިމީހުންގެ ރައްކާތެރިކަން ކަށަވަރުކުރުމަށް ކުރަންހުށަހަޅާ ކަންތައްތަކާއި ގުޅޭގޮތުން "ޖިއްދާ ޑެކްލަރޭޝަން އޮން ޕޭޝަންޓް ސޭފްޓީ"ގައި ސޮއިކުރުމަށް ގައުމުތަކުން ދަނީ މަޝްވަރާކުރައްވަމުންނެވެ.
ހެލްތު މިނިސްޓްރީން ބުނީ މި ބައްދަލުވުމުގެ ހަވާސާގައި، މިނިސްޓަރު އަމީން ސިއްހަތު ޖަމިއްޔާގެ ޑިރެކްޓަރ ޖެނެރަލް ޑރ. ޓެޑްރޮސްއާ ބައްދަލުކުރައްވާ ގޮތަށް ހަމަޖެހިފައިވާ ކަމަށެވެ. އަދި ހަމައެއާއިއެކު އެހީދޭ ޖަމިއްޔާތަކުގެ އިސްބޭފުޅުންނާއި މި ދަތުރުފުޅުގެ ތެރެއިން މިނިސްޓަރު ބައްދަލުކުރެއްވުމަށް ވެސް ހަމަޖެހިފައިވާ ކަމަށެވެ.
