ކާތިކް އާއި ސާރާ އެކުގައި ފިލްމަކުން

ކާތިކް އާރްޔަން އާއި ސާރާ އަލީ ޚާން އެކުގައި ފިލްމެއް ކުޅުމަށް ހަމަޖެހިފައިވާ ކަމަށް ރިޕޯޓްތައް ބުނެފިއެވެ.

މި ދެތަރިން އެކުގައި ފެނިގެންދާނީ ޑައިރެކްޓަރ އިމްތިއާޒް އަލީ ގެ ލޯބީގެ ފިލްމް "ލަވް އާޖްކަލް" ގެ ސީކުއެލް އިންނެވެ.

އަދި މި ފިލްމްގެ މަސައްކަތް ފެށުމަށް ކާތިކް އާއި ސާރާ އަންނަ ހަފްތާގައި ދިއްލީއަށް ދިއުމަށް ވަނީ ހަމަޖެހިފައެވެ.

"ލަވް އާޖްކަލް" އަކީ ސާރާގެ ބައްޕަ ސައިފް އަލީ ޚާން އާއި ދިޕިކާ ޕަދުކޯން 2009 ވަނަ އަހަރު ކުޅެފައިވާ ލޯބީގެ ފިލްމެކެވެ.

ހުކުރު ދުވަހު ރިލީޒް ކުރި ވިޖަންސް މެޑޮކް ފިލްމްސް ޕްރޮޑަކްޝަނުން އުފައްދާ ފިލްމް "ލޫކާ ޗުއްޕީ" ގެ ބަތަލާ ކާތިކް އާރްޔަން ވަނީ އޭނާ އިމްތިއާޒްގެ ފިލްމެއް ކުޅެން އުޅޭކަން ޔަގީން ކޮށްދީފައެވެ.

އިމްތިއާޒް އަކީ ފިލްމް އުފައްދާ ފަރާތްތަކުގެ ތެރެއިން އެނާގެ ފޭވަރިޓެއް ކަމަށާއި އިމްތިއާޒް އާއި އެކު މަސައްކަތް ކުރަން އަބަދުވެސް ބޭނުންވާ ކަމަށް ކާތިކް ވަނީ ބުނެފައެވެ. އަދި އެ ފުރުސަތު ލިބުމުން ހިތްހަމަ ޖެހިއްޖެ ކަމަށް ކާތިކް ވަނީ ބުނެފައެވެ.

ކޮފީވިތް ކަރަން ޝޯގައި ސާރާ ވަނީ ކާތިކް އަކީ އޭނާގެ ކްރަޝްއެއް ކަމަށް ބުނެފައެވެ.

އެހެން ކަމުން ސާރާ އާއި ކާތިކް އެކުގައި ފިލްމަކުން ފެނިގެންދިއުމަކީ މި ދެ ތަރިންގެ ފޭނުންނަށް ލިބޭނެ ވަރަށް ބޮޑު ހަދިޔާ އަކަށް ވެގެންދާނެއެވެ.