ލައިސެންސް ނެތި ދުއްވައިގެން 752 މީހަކު މިދިޔަ ހަފްތާގައި ހުއްޓުވި: ފުލުހުން
26 ފެބުރުއަރީ 2019 | އަންގާރަ 11:511094 ވެހިކަލެއް ޗެކްކޮށްފައިވާ ކަމަށް ފުލުހުން ބުނި
ފުލުހުން ވެހިކަލެއް ޗެކް ކުރަނީ
ވޭތުވެދިޔަ ހަފްތާގައި މާލެ ސަރަހައްދުގައި އެއްގަމު އުޅަނދުތަކުގެ ލައިސެންސް ނެތި ދުއްވައިގެން 752 މީހުން ހުއްޓުވި ކަމަށް މޯލްޑިވްސް ޕޮލިސް ސާރވީސް އިން ބުނެފިއެވެ.
ފުލުހުން މިކަން ހާމަކޮށްފައި ވަނީ މި މަހުގެ 22-16 ފުލުހުން ހިންގި ހާއްސަ އޮޕަރޭޝަންގެ ތަފާސް ހިސާބުތަކުންނެވެ.
ހޯމަ ދުވަހު ފުލުހުންގެ ޓްރެފިކް މެނޭޖްމެންޓް ޑިޕާޓްމެންޓުން ނެރުނު ސްޓެޓިސްތަކުގައިވާ ގޮތުން ވޭތުވެދިޔަ ހަފްތާގައި 1094 ވެހިކަލެއް ޗެކްކޮށްފައިވާ ކަމަށެވެ.
އޭގެ ތެރެއިން އެންމެ ގިނަ މައްސަލައެއް ގޮތުގައި ފުލުހުންނަށް ފާހަގަވެފައި ވަނީ ލައިސެންސި ނެތި ދުއްވާފައިވާ މީހުންގެ މައްސަލައެވެ. އެގޮތުން އެއްވެސް ގޮތަކަށް ލައިސެންސް ނެތި 752 މީހަކު ދުއްވާފައިވާއިރު އެ މީހުންގެ ތެރޭގައި 18 އަހަރުން ދަށުގެ ފަސް މީހަކު ހިމެނޭ ކަމަށް ފުލުހުން ބުންޏެވެ.
އޭގެ އިތުރުން އެންމެ ގިނަ އިން ފުލުހުންނަށް ފާހަގަ ވެފައިވާ މައްސަލައަކީ އުޅަނދުތަކުގެ އަހަރީ ފީ ނުދައްކާ މައްސަލައެވެ. އަހަރީ ފީ ދައްކަންޖެހޭ އެއްގަމު އުޅަނދަކަށް އަހަރީ ފީ ދައްކަން ޖެހޭނީ އެ އުޅަނދެއް ރަޖިސްޓަރީ ކުރި މަސް ނިމުމުގެ ކުރިންނެވެ. ރަޖިސްޓަރީ ކުރި މަސް ނިމުމުގެ ފަހުން ފީ ނުދައްކާތާ ހަމަސް ދުވަސް ފާއިތުވެއްޖެ ނަމަ 750 ރުފިޔާ އިން ޖޫރިމަނާވާނެ ކަމަށް މޯލްޑިވްސް އިންލޭންޑް ރެވިނިއު އޮތޯރިޓީ (މީރާ)ގެ ގަވާއިދު ބުނެއެވެ.
އިންޝުއަރެންސް ނެތި ދުއްވައިގެން 201 މީހަކު ފާހަގަވެފައިވާ ކަމަށް ފުލުހުން ބުންޏެވެ. މިފަހަކަށް އައިސް ނުރައްކާތެރި އެކްސިޑެންޓްތައް ގިނަވެފައިވާއިރު ވޭތުވެދިޔަ ހަފްތާގައި 62 އެކްސިޑެންޓް ހިނގާފައިވާއިރު، ޓްރެފިކް ގަވާއިދާއި ހިލާފުވެގެން ފަސް މީހަކު ފުލުހުންގެ ބެލުމުގެ ދަށަށް ވަނީ ގެންގޮސްފައެވެ. މި އެކްސިޑްންޓްތަކުގައި ހަ މީހަކަށް އަނިޔާވެފައިވާ ކަމަށް ފުލުހުން ބުންޏެވެ.
ފުލުހުން ބުނީ، ބާރު ސްޕީޑްގައި ދުއްވައިގެން ތިން މީހަކު ހުއްޓުވާފައިވާ ކަމަށާއި، ޓްރެފިކް ސިގްނަލް އަށް ބޯނުލަބައި ދުއްވި 63 މީހަކު ފާހަގަވެފައިވާ ކަމަށެވެ. މި ފަހަކަށް އައިސް މާލޭގެ އިތުރުން ރާއްޖޭގެ އެކި ހިސާބުތަކުގައި އެއްގަމު އުޅަނދުތައް ފުލުހުން ދަނީ ފުޅާދާއިރާއެއްގައި ޗެކް ކުރަމުންނެވެ.
