އެޖެންޑާ 19: ހުރިހާ ޚިދުމަތެއް ދެވޭ ހޮސްޕިޓަލެއް ކޮންމެ އަތޮޅެއްގައި
26 ފެބުރުއަރީ 2019 | އަންގާރަ 03:51އަތޮޅު ހޮސްޕިޓަލްތައް ތަރައްގީ ކުރުމަށް ލާޒިމް ކުރާނީ، އެކަމަށްޓަކައި ހެދޭ ފުރިހަމަ ގާނޫނަކުން
ެޖެންޑާ 19: ހޯމަދުވަހުގެރޭގެ ޕެނަލް ޑިސްކަޝަން
ހުރިހާ ޚިދުމަތެއް ދެވޭ ހޮސްޕިޓަލެއް ކޮންމެ އަތޮޅެއްގައި ގާއިމް ކުރާނެ ކަމަށް އެޖެންޑާ 19 ގެ ބަރުލަމާނީ ވައުދުތަކުގެތެރޭގައި ހިމެނޭނެ ކަަމަށް އަލިފުށީ ދާއިރާގެ މެންބަރު މުހައްމަދު ރަޝީދު ހުސެއިން (ބިގޭ) ވިދާޅުވެއްޖެއެވެ.
ބަރުލަމާނީ ވައުދުތަކުގެ ތަފްސީލް ހާމަކޮށްދެއްވުމަށް ހޯމަ ދުވަހުގެރޭ އޮތް އެޖެންޑާ 19 ޕެނަލް ޑިސްކަޝަންގައި ވާހަކަ ދައްކަވަމުން ބިގޭ ވިދާޅުވީ، ރާއްޖޭގެ ތިން ސަރަހެއްދެއްގައި ޓާޝަރީ ފެންވަރުގެ ތިން ހޮސްޕިޓަލް ތަރައްގީ ކުރުމަށް އޮތް އޮތުން ބަދަލުކޮށް، 24 ގަޑިއިރު ހިދުމަތްދޭ ގޮތަށް ކޮންމެ އަތޮޅެއްގައި އެފެންވަރުގެ ހޮސްޕިޓަލެއް ގާއިމް ކުރުމަށް އެޖެންޑާ 19 ގައި ހިމަނާފައިވާނެ ކަމަށެވެ.
އަދި އެ ހޮސްޕިޓަލްތަކުގައި، އައްސިކޮށްގެން ކުރާ ކުދި ކުދި އޮޕަރޭޝަންތައް ކުރެވޭނެ ގޮތާއި،ޑެންޓިސްޓަކާއި، ކުޑަކުދިންގެ ޚާއްސަ ޑޮކްޓަރަކާއި، އަންހެނުންގެ ޚާއްސަ ޑޮކްޓަރެއްގެ އިތުރުން، ހޭނައްތާ ޑޮކްޓަރެއް ހުންނަވާނެ ކަމަށް ވިދާޅުވިއެވެ. އަދި ޖެނެރަލް ޑޮކްޓަރަކާއި އާބާދީއާއި އެކަށޭނަ މިންވަރަށް ޚިދުމަތްދޭނެ ނަރުހުން ތިއްބަވާ ގޮތަށް ގާނޫނަކުން އެކަން ކަށަވަރު ކޮށްދެއްވާނެ ކަމަށް ވިދާޅުވިއެވެ.
"ހޮސްޕިޓަލަކުން ދެވޭނެ ހުރިހާ ޚިދުމަތެއް އަތޮޅު ހޮސްޕިޓަލްތަކުން ފޯރުކޮށްދޭނެ.ޑޮކްޓަރުން ބޭނުންކުރަން ޖެހޭ އާލާތްތަކާއި ވަސީލަތްތައް ކޮންމެ ހޮސްޕިޓަލެއްގައި ވެސް މި ގާނޫނުން ކަށަވަރު ކޮށްދޭނެ. އަދި ވަރަށް ޚާއްސަގޮތެެއްގައި އަތޮޅު ހޮސްޕިޓަލްގައި މަސައްކަތް ކުރާ ސްޕެޝަލިސްޓުން އަތޮޅުގެ އެހެން ރައްތަކަށް ޒިޔާރަތްކޮށް، ގޭގެއަށް ޒިޔާރަތްކޮށް ހާލަތު ދެނެގަނެ ހުރިހާކަމެއް ހިނގާނެ" ބިގޭ ވިދާޅުވިއެވެ.
ބިގޭ ވިދާޅުވިގޮތުގައި މިފެންވަރަށް ސިއްހީ ހިދުމަތް ފުޅާކުރެވުމުން ރަށްރަށުގައި ފެތުރޭ އެކި އެކި ނުރައްކާތެރި ބަލިތައް ވަރަށްބޮޑަށް ކޮންޓްރޯލް ވެގެންދާނެއެވެ.
ސިއްހީ ފަރުވާއާއި ބޭހެ ބިލުން ހުރިހާ ޚިދުމަތަކާއިއެކު އަތޮޅު ހޮސްޕިޓަލްތައް ތަރައްގީ ކުރުމަށް ލާޒިމް ކުރާނީ، އެކަމަށްޓަކައި ހެދޭ ފުރިހަމަ ގަނޫނަކުން ދައުލަަތުގެ މައްޗަަށް ލާޒިމު ކުރެވޭގޮތަށް ކަމަށް ބިގޭ ވިދާޅުވިއެވެ.
