ބަލިވި ކެންޑިޑޭޓުން ވާދަނުކުރާނެ ކަމަށް އުއްމީދު ކުރަން: ނަޝީދު
25 ފެބުރުއަރީ 2019 | ހޯމަ 16:46ޕާޓީ އާއި ސިޔާސީ މަސްލަހަތު ބައްލަވާނެ ކަމަށް ދެކިވަޑައިގަންނަވަން: ނަޝީދު
އެމްޑީޕީގެ ރައީސް މުހައްމަދު ނަޝީދު
އެމްޑީޕީ ޕްރައިމަރީގައި ވާދަކޮށް ނާކާމިޔާބީއާ ކުރިމަތިލައްވަން ޖެހުނު ކެންޑިޑޭޓުން އެ ޕާޓީގެ އުސޫލުތަކާ ހިލާފަށް އަމިއްލަ ގޮތުން ވާދަނުކުރައްވާނެ ކަމަށް އުއްމީދު ކުރައްވާ ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ޕާޓީތަކުގެ ޕްރައިމަރީން ނާކާމިޔާބުވި ފަރާތްތަކަށް ވާދަ ކުރެވޭނެ ކަމަށް ސުޕްރީމް ކޯޓުން ހުކުމް ކޮށްފައި ވަނީ ހޯމަ ދުވަހުއެވެ. އެ މައްސަލަ ކޯޓަށް ހުށަހަޅުއްވާފައި ވަނީ އެމްޑީޕީ ޕްރައިމަރީގައި ކާށިދޫ ދާއިރާ އަށް ވާދަކުރައްވައި ނާކާމިޔާބީއާ ކުރިމަތިއްލައްވަން ޖެހިވަޑައިގަތް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސްޕެޝަލް އެންވޯއިި އަބްދުﷲ ޖާބިރުއެވެ.
އެކަމާ ގުޅޭ ގޮތުން ހޯމަ ދުވަހު ކުރެއްވި ޓްވީޓެއްގައި ނަޝީދު ވިދާޅުވީ، ޕްރައިމަރީގައި ނާކާމިޔާބުވި އެއްވެސް ފަރާތަކުން އަލުން އިންތިހާބުގައި ވާދަނުކުރައްވާނެ ކަމަށް އެމަނިކުފާނު ގަބޫލުފުޅު ނުކުރައްވާ ކަމަށެވެ.
ނަޝީދު ވިދާޅުވީ، އެމްޑީޕީގެ ހުރިހާ މެމްބަރުން ވެސް ޕާޓީ އާއި ސިޔާސީ މަސްލަހަތަށް ބައްލަވާނެ ކަމަށް ދެކިވަޑައިގަންނަވާ ކަމަށެވެ.
ނަޝީދު އެހެން ވިދާޅުވެފައިވާއިރު، އަމިއްލަ ގޮތުން ކުރިމަތިލާނަމަ ފިޔަވަޅު އަޅާނެ ކަމަށް އެމްޑީޕީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް ވެސް ވަނީ ވިދާޅުވެފައެވެ.
ޕްރައިމަރީގައި ބަލިވާ ފަރާތްތަކުން އަމިއްލަ ގޮތުން ވާދަ ނުކުރެވޭނެ ކަމަށް ސުޕްރީމް ކޯޓުން ނިންމުމާއި ގުޅިގެން މަޖިލިސް އިންތިހާބަށް ކުރިމަތިލުމުގެ މުއްދަތު އިތުރު ކުރުމަކީ ސުޕްރީމް ކޯޓަށް ކުރެވޭނެ ކަމެއް ނޫން ކަމަށް ވެސް ރައީސް ނަޝީދު ވަނީ ވިދާޅުވެފައެެވެ.
