އިޓާލިއަން ލީގު: ޔުވަންޓަސް އާއި ނަޕޯލީ މޮޅުވިއިރު، އިންޓަ އެއްވަރުވެއްޖެ

އިޓާލިއަން ލީގުގައި ޔުވެންޓަސް އާއި ނަޕޯލީ ކުޅުނު މެޗުތަކުން މޮޅުވިއިރު، އިންޓަ މިލާން ކުޅުނު މެޗުން އެޓީމު އެއްވަރުވެއްޖެއެވެ.

އާދީއްތަ ދުވަހުގެ ރޭ ކުޅުނު މެޗުން ޔުވަންޓަސް މޮޅުވީ ބޮލޮގްނާއާ ވާދަކޮށް 0-1 ގެ ނަތީޖާއަކުންނެވެ.

ބޮލޮގްނާ ދަނޑުގައި ކުޅުނު މި މެޗުގައި ޔުވަންޓަސްގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ. އެގޮތުން ލަނޑު ޖެހުމަށް މުޅި މެޗުގައިވެސް އެޓީމަށް ވަނީ ގިނަ ފުރުސަތުތަކެއް ލިބިފައެވެ.

މި ހާފްގައި ބޮލޮގްނާގެ ފަރާތުން ވެސް ގިނަ ހަމަލާތަކެއް ފެނިގެންދިޔައިރު، އެހަމަލާތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

ޔުވަންޓަސްއިން މެޗުގެ ލީޑު ނެގީ 67 ވަނަ މިނެޓުގައެވެ. މި ލަނޑު އެޓީމަށް ކާމިޔާބު ކޮށްދިނީ ބަދަލު ކުޅުންތެރިޔާ ޕައުލޯ ޑިބާލާއެވެ.

އާދީއްތަ ދުވަހުގެ ރޭ ކުޅުނު މެޗުން ނަޕޯލީ މޮޅުވީ ޕާމާއާ ވާދަކޮށް 0-4 ގެ ނަތީޖާއަކުންނެވެ.

ޕާމާ ދަނޑުގައި ކުޅުނު މި މެޗުގައި ނަޕޯލީގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ. އެގޮތުން އެޓީމުން ވަނީ 18 ވަނަ މިނެޓުގައި ޒިއެލެންސްކީ ކާމިޔާބުކުރި ލަނޑުން މެޗުގެ ލީޑުވެސް ނަގާފައެވެ.

ނަޕޯލީން މެޗުގެ ލީޑު ފުޅާކުރީ 36 ވަނަ މިނެޓުގައި މިލިކް ކާމިޔާބުކުރި ލަނޑުންނެވެ. ފުރަތަމަ ހާފް ނިމުމުގެ ކުރިން އެޓީމަށް ވަނީ ލީޑު އިތުރަށް ފުޅާކުރަން ވެސް ފުރުސަތުތަކެއް ލިބި ބޭކާރުވެފައެވެ.

ނަޕޯލީގެ ތިންވަނަ ލަނޑު 73 ވަނަ މިނެޓުގައި މިލިކް ކާމިޔާބު ކޮށްފައިވާއިރު، ހަތަރުވަނަ ލަނޑު 82 ވަނަ މިނެޓުގައި ކާމިޔާބު ކުރީ އޯނަސްއެވެ.

މެޗުގައި ޕާމާއަށް ވެސް ވަނީ ލަނޑު ޖެހުމަށް ފުރުސަތުތަކެއް ލިބިފައެވެ. ނަމަވެސް އެ ފުރުސަތުތަކުގެ ބޭނުން އެންމެ އެދެވޭ ގޮތެއްގައި އެޓީމަށް ހިފިފައެއް ނުވެއެވެ.

އާދީއްތަ ދުވަހުގެ ރޭ ކުޅުނު މެޗުން އިންޓަ އެއްވަރުވީ ފިއޮރެންޓީނާއާ ވާދަކޮށް 3-3 ގެ ނަތީޖާއަކުންނެވެ.

ފިއޮރެންޓީނާ ދަނޑުގައި ކުޅުނު މި މެޗު ފެށިގެން ފުރަތަމަ މިނެޓުގައި ފިއޮރެންޓީނާއިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދިނީ ވިރިޖްއެވެ.

ނަމަވެސް އިންޓައިން ވަނީ ކުޅުން ރަނގަޅުކޮށް ހަވަނަ މިނެޓުގައި ނަތީޖާ ހަމަހަމަ ކޮށްފައެވެ. މި ލަނޑު ކާމިޔާބުކުރީ ވެސީނޯއެވެ. އިންޓައިން ލީޑު ނެގީ ފުރަތަމަ ހާފް ނިމެން ފަސް މިނެޓަށްވެފައި ވަނިކޮށް ޕޮލިޓާނޯ ކާމިޔާބުކުރި ލަނޑުންނެވެ.

ދެވަނަ ހާފް ފެށިގެން އިންޓައިން ވަނީ ތިންވަނަ ލަނޑު ޖަހާފައެވެ. މި ލަނޑު ކާމިޔާބުކުރީ ލިބުނު ޕެނަލްޓީއަކުން އިވާން ޕެރިސިޗްއެވެ. ނަމަވެސް 74 ވަނަ މިނެޓުގައި ފިއޮރެންޓީނާގެ މުރިއެލް ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ.

ފިއޮރެންޓީނާއިން މެޗުގެ ނަތީޖާ ހަމަހަމަކުރީ އިތުރުވަގުތުގެ ތެރޭގައެވެ. މި ލަނޑު ކާމިޔާބުކުރީ ވެރެތޯޓްއެވެ.

މި ނަތީޖާތަކާއެކު ޕޮއިންޓް ތާވަލުގެ އެއްވަނައިގައި 25 މެޗުން ލިބުނު 69 ޕޮއިންޓާއެކު އޮތީ ޔުވަންޓަސްއެވެ. ދެވަނައިގައި 25 މެޗުން 56 ޕޮއިންޓް ހޯދައިގެން ނަޕޯލީ އޮތްއިރު، ތިންވަނައިގައި 25 މެޗުން 47 ޕޮއިންޓް ހޯދައިގެން އޮތީ އިންޓައެވެ.