ސްޕެނިޝް ލަލީގާގައި ވިޔަރެއާލް ބަލިކޮށް އެޓްލެޓިކޯ މެޑްރިޑުން ޕޮއިންޓް ތާވަލުގެ އެއްވަނައިގައި އޮތް ބާސެލޯނާއާ ދެމެދު އޮތް ޕޮއިންޓްގެ ފަރަގު ކުޑަކޮށްފިއެވެ.

އާދީއްތަ ދުވަހުގެ ރޭ ކުޅުނު މެޗު ވިޔަރެއާލްއާ ވާދަކޮށް އެޓްލެޓިކޯއިން މެޗު ކާމިޔާބު ކުރީ 0-2 ގެ ނަތީޖާއަކުންނެވެ.

އެޓްލެޓިކޯ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ވިޔަރެއާލްގެ ހާފަށް ބާރުބޮޑުކޮށް އެޓީމުން ވަނީ ގިނަ ހަމަލާތަކެއް ފޮނުވާލާފައެވެ.

އެޓްލެޓިކޯއިން މެޗުގެ ލީޑު ނެގީ 31 ވަނަ މިނެޓުގައެވެ. މި ލަނޑު ފިލިޕޭ ލުއިޒްގެ އެހީތެރިކަމާއެކު ކާމިޔާބުކުރީ އަލްވަރާ މޮރާޓާއެވެ. މި ލަނޑަށްފަހު ވެސް އެޓީމަށް ވަނީ ލަނޑު ޖެހުމަށް ގިނަ ފުރުސަތުތައް ލިބި ބެކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ވިޔަރެއާލްގެ މައްޗަށް އެޓްލެޓިކޯ ކުރީގައި އޮވެގެންނެވެ.

ދެވަނަ ހާފް ފެށިގެންވެސް ރަނގަޅަށް ކުޅެމުން ދިޔައީ އެޓްލެޓީކޯއިންނެވެ. އެގޮތުން އެޓީމުން ވަނީ ވިޔަރެއާލްގެ ގޯލަށް ނުރައްކާކޮށް މި ހާފްގައިވެސް ގިނަ ހަމަލާތަކެއް އުފައްދާފައެވެ.

އެޓްލެޓިކޯއިން މެޗުގެ ލީޑު ފުޅާކުރީ 88 ވަނަ މިނެޓުގައެވެ. މި ލަނޑު ޑިއެގޯ ކޯސްޓާގެ އެހީތެރިކަމާއެކު ކާމިޔާބުކުރީ ސައުލްއެވެ.

މި ނަތީޖާއާއެކު އެޓްލެޓިކޯ އޮތީ ކުޅުނު 25 މެޗުން ލިބުނު 50 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން ބަލިވި ވިޔަރެއާލް އޮތީ ކުޅުނު 25 މެޗުން ލިބުނު 23 ޕޮއިންޓާއެކު ޕޮއިންޓް ތާވަލުގެ 18 ވަނައިގައެވެ.