ސްޕެނިޝް ލަލީގާގައި ލެވެންޓޭ ބަލިކޮށް، ރެއާލް މެޑްރިޑުން ހަމަޖެހުމެއް ހޯދައިފިއެވެ.
އާދީއްތަ ދުވަހުގެ ރޭ ކުޅުނު މެޗު ލެވެންޓޭއާ ވާދަކޮށް ރެއާލުން މެޗު ކާމިޔާބުކުރީ 1-2 ގެ ނަތީޖާއަކުންނެވެ.
ލެވެންޓޭ ދަނޑުގައި ކުޅުނު މި މެޗު ފެށިގެން ރަނގަޅަށް ކުޅެމުންދިއީ އެޓީމުންނެވެ. އެގޮތުން ރެއާލްގެ ހާފަށް ބާރުބޮޑުކޮށް އެޓީމުން ވަނީ ނުރައްކާތެރި ހަމަލާތައް އުފައްދާފައެވެ.
ނަމަވެސް ލަނޑު ޖެހުމަށް މާ އެދެވޭ ފުރުސަތެއް ލެވެންޓޭއަށް ލިބިފައެއް ނުވެއެވެ. މެޗުގައި ފުރަތަމަ ލަނޑު ޖަހާ ލީޑު ނެގީ ރެއާލުންނެވެ. މި ލަނޑު 43 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކުރީ ކަރިމް ބެންޒެމާއެވެ.
މި ލަނޑާއެކު ފުރަތަމަ ހާފް ނިމުނީ 0-1 ގެ ނަތީޖާއިން ލެވެންޓޭގެ މައްޗަށް ރެއާލް ކުރީގައި އޮވެގެންނެވެ.
puntos #RMLiga #HalaMadrid pic.twitter.com/n3Yt0F2hEU
— Real Madrid C.F. (@realmadrid) February 24, 2019
ދެވަނަ ހާފް ފެށިގެން ރެއާލުން ވަނީ އެޓީމުގެ އެޓޭކްތައް ވަރުގަދަ ކޮށްފައެވެ. އެގޮތުން ލަނޑު ޖެހުމަށް އެޓީމުން ވަނީ ގިނަ ފުރުސަތުތަކެއް ވެސް ތަނަވަސްކޮށްފައެވެ.
ނަމަވެސް ރެއާލުން ރަނގަޅަށް ކުޅެމުންދަނިކޮށް 60 ވަނަ މިނެޓުގައި ލެވެންޓޭއިން ވަނީ ނަތީޖާ ހަމަހަމަ ކޮށްފައެވެ. މި ލަނޑު ޖޮސޭ ލުއިޒް މޮރަލޭޒްގެ އެހީތެރިކަމާއެކު ކާމިޔާބުކުރީ މާޓީއެވެ.
ރެއާލުން މެޗުގެ ލީޑު އަނބުރާ ހޯދީ 80 ވަނަ މިނެޓުގައެވެ. މި ލަނޑު ވެސް އެޓީމުން ކާމިޔާބުކުރީ ލިބުނު ޕެނަލްޓީއަކުންނެވެ. ޕެނަލްޓީ ކާމިޔާބު ކޮށްފައިވަނީ ގެރެތު ބޭލްއެވެ.
މެޗުގެ 86 ވަނަ މިނެޓުގައި ރެއާލްގެ ނެޗޯއަށް އަށް ދެވަނަ ރީނދޫ ކާޑާއެކު ރަތްކާޑު ދައްކާފައިވާއިރު، 88 ވަނަ މިނެޓުގައި ލެވެންޓޭގެ ރުބެން ރޮޗީނާއަށް ވެސް ވަނީ ދެވަނަ ރީނދޫ ކާޑާއެކު ރަތް ކާޑު ދައްކާފައެވެ.
މި ނަތީޖާއެކު ރެއާލް އޮތީ ކުޅުނު 25 މެޗުން ލިބުނު 48 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން ބަލިވި ލެވެންޓޭ އޮތީ ކުޅުނު 25 މެޗުން ލިބުނު 30 ޕޮއިންޓާއެކު، ޕޮއިންޓް ތާވަލުގެ 13 ވަނައިގައެވެ.
