ފިނިހަކަ ހޮވުމުގެ މުބާރަތުގައި ވާދޫއިން ބައިލައްކަ ފިނިހަކަ ހޮވައިފި

ގދ ވާދޫގެ ދަނޑުތަކާއި ގަސްތަކުގައި އާދަޔާ ހިލާފަށް ''ފިނިހަކަ'' އާލާވަމުންދާތީ، އެކަން ކޮންޓްރޯލް ކުރުމަށް ރަށު ފެންވަރުގައި ބޭއްވި ފިނިހަކަ ހޮވުމުގެ މުބާރާތް ނިންމާލާފައިވާއިރު، ގާތްގަނޑަކަށް ބައިލައްކައަށްވުުރެ ގިނަ ފިނިހަކަ ހޮވައިފިއެވެ.

އެކަމާ ގުޅޭ ގޮޮތުން "ރާއްޖެއެމްވީ"އަށް މައުލޫމާތު ދެެއްވަމުން ވާދޫގެ އިޖުތިމާއީ މަސައްކަތް ކުރާ ޖަމާއަތަކަށް ނިސްބަތްވާ ފަރާތެއް ކަމަށްވާ އަލީ އާނިމް ވިދާޅުވީ، މި މުބާރާތުގައި ޖުމުލަ 53،325 ފިނިހަކަ ހޮވާފައިވާ ކަމަށާއި، ފިނިހަކަތައް ގުނުމަށް ގާތްގަނޑަކަށް ތިން ގަޑިއިރު ހޭދަވި ކަމަށެވެ.

Advertisement

ޓީމުތަކުން ހޮޮވި ފިނިހަކަތައް ގުނުމުގެ މަސައްކަތް ކުރަނީ

އާނިމް އިތުރަށް ވިދާޅުވީ، ހަތަރު ޓީމެއްގެ މަސައްކަތުުން ބައިލައްކައަށްވުރެ ގިނަ ފިނިހަކަ ހޮވާފައިވީ ނަމަވެސް މިއީ ނިސްބަތުން މަދު އަދަދެއް ކަމަށާއި، ކުރިއަށް އޮތް ތާނގައި މިފަދަ ގިނަ ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާ ކަމަށެވެ. އަދި މިހާރު ހޮވާފައިވާ ފިނިހަކަތައް ނައްތާލުމުގެ މަސައްކަތް ކުރަމުންދާ ކަމަށް އާނިމް ވިދާޅުވިއެވެ.

ފިނިހަކަ ކޮންޓްރޯލް ކުރުމަށް ފިޝަރީޒް މިނިސްޓްރީންގެ އޮފިޝަލުން ސާރވޭ ކުރި ކަމަށާއި، ފިނިހަކަތައް ނައްތާލުމަށް ރަށުގެ ތެރެއަށް ދެ ފަހަރެއްގެ މަތިން ފަނިތަކެއް ދޫކުރި ކަމަށް ވާދޫ ކައުންސިލްގެ ޒިންމާދާރުވެރިޔާ މުހައްމަދު އިބްރާހިމް ވިދާޅުވެފައިވެއެވެ. ނަމަވެސް ފާއިތުވެގެންދިޔަ އަށް މަސް ދުވަހުގެ ތެރޭގައި ފިނިހަލަ ކޮންޓްރޯލް ނުކުރެވި، އޭގެ އުނދަގޫ ބޮޑުވެފައިވާ ކަމަށް އޭނާ ވިދާޅުވެފައިވެއެވެ.

ފިނިހަކަތައް ހޮވި ޓީމުތަކުން ގުނުމުގެ މަސައްކަތް ކުރިއަށްދަނީ

ޓީމުތަކަށް ބަހާލައިގެން ބުރާސްފަތި ދުވަހުގެ ހަވީރު ފަހެއް ޖެހިއިރު ފެށި މި މުބާރާތުން އެއްވަނަ ލިބިފައި ވަނީ ވާދޫ ޖަމާލުއްދީން ސުކޫލު ޓީމަށެވެ. އެގޮތުން އެޓީމުން ވަނީ 27،300 ފިނިހަކަ ހޮވާފައެވެ. ދެވަނައަށް ވާދޫ ހެލްތު ސެންޓަރުުގެ ޓީމް ހޮވިފައިވާއިރު، އެ ޓީމުން ހޮވާފައިވަނީ 14،300 ފިނިހަކައެވެ. އޭގެ އިތުރުން 3 ވަނައަށް ހޮވިފައިވާ ވަދޫ ކައުންސިލުގެ ޓީމުން ހޮވާފައިވަނީ 7000 ފިނިހަކައެވެ.

ފިނިހަކަ ހޮވުމުގެ މުާރާތުގެ ނަތީޖާ

ވާދޫ ކައުންސިލުން ހިންގި އެ މުބާރާތުގައި އެންމެ ގިނައިން ފިނިހަކަ ހޮވާ ޓީމަކަށް 5،000 ރުފިޔާ، ދެވަނައަށްދާ ޓީމަކަށް 3،000 ރުފިޔާ، އަދި ތިން ވަނައަށްދާ ޓީމަކަށް 2،000 ރުފިޔާ ދިނުމަށް ނިންމާފައިވާ ކަމަށް މުހައްމަދު ވިދާޅުވެފައިވެއެވެ.

ފިނިހަކަތައް ގުނުމަށް 3 ގަޑިއިރު ހޭދަވި

ވާދޫގައި ފިނިހަކަ އާލާވެފައިވާތާ ހަތް މަހަށްވުރެ ގިނަ ދުވަސް ވެފައިވާއިރު، ފިނިހަކައިގެ ސަބަބުން ރަށުގެ ރައްޔިތުންނަށް ވަރަށް ބޮޑެތި އުނދަގޫތަކެއް ކުރިމަތިވެފައިވާ ކަމަށާއި، ޚާއްސަކޮށް ދަނޑުބިންތަކަށް ބޮޑެތި ގެއްލުންތަކެއް ލިބެމުންދާ ކަމަށް އެ ރަށުން ވާހަކަ ދެއްވި ފަރާތްތަކުން ބުނެފައިވެއެވެ. އަދި މިހާރު އެ މައްސަލަ ސަރުކާރުގެ މުއައްސަސާތަކުގެ ސަމާލު ކަމަށް ގެނެސްފައިވާ ކަމަށް ރަށު ކައުންސިލުން މައުލޫމާތު ދީފައިވެއެވެ.