ފަސްވަނަ ގްލޯބަލް ބިޒްނަސް ސަމިޓްގައި ބައިވެވަޑައިގަތުމަށް ޓޫރިޒަމް މިނިސްޓަރ އަލީ ވަހީދާއި އެކު ސިޓީތަކުގެ މޭޔަރުން އިންޑިއާގެ ދިއްލީއަށް ފުރާވަޑައިގެންފިއެވެ.
މި ދަތުރުގައި މިނިސްޓަރުގެ އަރިހުގައި މާލެ ސިޓީގެ މޭޔަރ ޞިފާ މުޙައްމަދާއި، އައްޑޫސިޓީގެ މޭޔަރު ޢަބްދުﷲ ސޯދިޤު (ސޯބެ) އަދި ފުވައްމުލަކު ސިޓީގެ މޭޔަރު ފަލާޙު ޝަރީފްގެ އިތުރުން މިހާރު ސިޓީއަކަށް ވާން ތައްޔާރުވަމުންދާ ކުޅުދުއްފުށީގެ ކައުންސިލްގެ ރައީސް ޢަބުދުއްލަތީފް ޙަސަންވެސް ބައިވެރިވެވަޑައިގަންނަވައެވެ.
ދުނިޔޭގެ އެކިއެކި ވިޔަފާރިތަކުގެ އިސްވެރިން ބައިވެރިވެވަޑައިގަންނަވާ މި ސަމިޓް ޝަރަފުވެރިކޮށްދެއްވާނީ އިންޑިއާގެ ބޮޑުވަޒީރު ނަރެންދްރަ މޯދީއެވެ.
ނޫސްވެރިންނަށް މައުލޫމާތުދެއްވަމުން ޓޫރިޒަމް މިނިސްޓަރު އަލީ ވަހީދު ވިދާޅުވީ އެ ދަތުރުގައި ދެެމެހެއްޓެނިވި ޓޫރިޒަމާ ގުޅޭގޮތުން ރައުންޑް ޓޭބަލްގައި ދިވެހިރާއްޖޭގެ ފަރާތުން ބައިވެރިވާނެ ކަމަށެވެ.
އަލީ ވަހީދު ވިދާޅުވީ ރައީސް އިބްރާހިމް މުހައްމަދު ސޯލިހުގެ އަމާޒަކީ، ވަކިވަކި މަންޒިލްތަކެއްގެ ގޮތުގައި ޓުއަރިޒަމް ތަރައްގީކޮށް އުތުރާއި ދެކުނަށް ޓުއަރިޒަމް ފުޅާވެގެން ދިއުންކަމަށެވެ. އަދި އެކަން ކުރުމަށް ކައުންސިލްތަކުގެ ވެރިންނަށް މިފަދަ ފުރުސަތެއް ދިނުމަކީ ވަރަށް މުހިންމުކަމެއް ކަމަށް މިނިސްޓަރ ފާހަގަކުރެއްވިއެވެ.
މި ދަތުރުފުޅުގައި ބައިވެރިވަޑައިގަންވާ މާލޭ ސިޓިގެ މޭޔަރ ޞިފާ މުޙައްމަދު ވިދާޅުވީ، ރާއްޖެ ތަރައްގީ ވާނީ ލާމަރުކަޒީ ނިޒާމުން ކަންކަން ކޮށްގެން ކަމަށެވެ. އެގޮތުން މުޅި ދުނިޔެއަށް ހުޅުވެން ސިޓީތަކުން ބޭނުންވާ ކަމަށާއި، ދިވެހިރާއްޖެއަށް ޒިޔާރަތް ކުރާ ޓޫރިސްޓުންނަށް ރަނގަޅު ޚިދުމަތްތައް ދޭ ސިޓީތަކަކަށް ރާއްޖޭގެ ސިޓީތައް ވެގެން ދިއުން މުހިއްމު ކަމަށެވެ.
މޭޔަރުން ފާހަގަކުރެއްވި ގޮތުގައި ދެމެހެއްޓެނިވި ޓޫރިޒަމްއަކަށް ރާއްޖެ އަމާޒު ހިފާފައިވާ އިރު މިފަދަ ފޯރަމްތަކުގައި ބައިވެރިވުމަށް ފުރުސަތު ލިބުމަކީ ވަރަށް މުހިއްމު ކަމެކެެވެ.
މިނިސްޓަރ އަލީ ވަހީދު ވިދާޅުވީ އެ ދަތުރުގައި އިންޑިއާގެ ޓޫރިޒަމާ ބެހޭ ވަޒީރާ ބައްދަލުވާނެ ކަމަށާއި އެ ބައްދަލުވުމުގައިވެސް ސިޓީތަކުގެ މޭޔަރުން ބައިވެރިވެވަޑައިގަންނަވާނެ ކަމަށެވެ. އަދި އޭގެ ބޭނުމަކީ ސަރަހައްދުތައް ތަރައްގީ ކުރުމުގައި ސިޓީތަކަށް އެ ބާރުވެރިކަން ލިބި، އެބޭފުޅުންގެ ހިޔާލާއި އަދި އެބޭފުޅުންގެ ވިސްނުމާއި ވިޝަންއާ އެއްކޮށް މިކަންކަން ތަރައްގީވެގެން ދިއުން ކަމަށްވެސް މިނިސްޓަރު ވިދާޅުވިއެވެ.
