ބަރނީ ސޭންޑަރޒް އެމެރިކާގެ ރައީސްކަމަށް ކުރިމަތިލައްވަން ނިންމަވައިފި

އެމެރިކާގެ ވާރމޮންޓް ސްޓޭޓްގެ ސެނެޓަރު ބަރނީ ސޭންޑަރޒް، 2020 ވަނަ އަހަރު އެ ގައުމުގައި ބާއްވަން ހަމަޖެހިފައިވާ ރިޔާސީ އިންތިހާބުގެ ޑިމޮކްރެޓިކް ޕާޓީގެ ޓިކެޓަށް ވާދަކުރައްވާނެ ކަން އިއުލާނު ކުރައްވައިފިއެވެ.

އަންގާރަ ދުވަހު ރޭޑިއޯ މެދުވެރިކޮށް ބަރނީ ސޭންޑަރޒް ދެވަނަ ފަހަރަކަށް ޑިމޮކްރެޓިކް ޓިކެޓަށް ވާދަކުރައްވާނެ ކަން އިއުލާން ކުރައްވަމުން ވިދާޅުވީ، ވާދަކުރައްވަން ނިންމެވީ ދެ ސަބަބަކާއި ހުރެގެން ކަމަށެވެ. އެއް ކަމަކީ މިހާރުގެ ރައީސް ޑޮނަލްޑް ޓްރަމްޕްއާއި ދެކޮޅަށް ނިކުތުން ކަމަށާއި، އަނެއް ކަމަކީ 2016 ވަނަ އަހަރުގެ ޑިމޮކްރެޓިކް ޕާޓީގެ ޓިކެޓަށް ވާދަކުރެއްވި މެނިފެސްޓޯގައި ހުރި ކަންކަން ކުރެއްވުމަށް ކަމަށެވެ. ބަރނީ ސޭންޑަރޒްގެ 2016 ވަނަ އަހަރުގެ މެނިފެސްޓޯގައި އެމެރިކާގެ ރައްޔިތުންނަށް ޔުނިވާރސަލް ހެލްތްކެއަރ އަދި މިނިމަން ވޭޖްގެ ގޮތުގައި ގަޑި އިރަކަށް 15 ޑޮލަރު ދޭނެ ކަމަށް ހިމަނާފައި ވެއެވެ.

ޓްރަމްޕްއަކީ އެމެރިކާއަށް ބޮޑު ލަދެއް ކަމަށް ވިދާޅުވަމުން ސޭންޑަރޒް ވަނީ ޓްރަމްޕްއަކީ ތަކުރާރުކޮށް އިތުރުފުޅު ހައްދަވާ ބޭފޫޅެއް ކަމަށް ވެސް ވިދާޅުވެފައެވެ. އަދި ޓްރަމްޕްއަކީ ސިޔާސީ ބޭނުންތަކަށް މައިނޯރިޓީތަކަށް (ދޮން ނޫން ނަސްލުތަކުގެ މީހުން) ޖެއްސުން ކުރާ މީހެއް ކަމަށް ވެސް ސޭންޑަރޒް ތުހުމަތު ކުރެއްވިއެވެ.

ސޭންޑަރޒްގެ އިއުލާނަށް ފަހު، ސަޕޯޓަރުންނަށް ފޮނުއްވެވި އީމެއިލްއެއްގައި ވަނީ އޭނާގެ މި ފަހަރުގެ ކެމްޕެއިންގައި ކުރައްވާނެ ކަންތަތައްތަކަށް އަލިއަޅުވާލާފައެވެ. އެގޮތުން މިހާރު އެމެރިކާއަށް ދިމާވެފައިވާ މައްސަލަތައް ހައްލުކުރެއްވުމަށް "ގްރާސްރޫޓްސް" ހަރަކާތެއް ފަށާނެ ކަމަށް ވައުދުވެ ވަޑައިގަންފައިވެއެވެ.

ސޭންޑަރޒްގެ އިތުރުން ޑިމޮކްރެޓް ސެނެޓަރުން ކަމުގައިވާ ކޯރީ ބުކަރ، ކަމާލާ ހެރިސް، އެމީ ކްލޮބުޗަރ އެންޑް އެލިޒަބަތް ވޮރެން ވެސް ވަނީ އެ ޕާޓީގެ ރިޔާސީ ޓިކެޓަށް ވާދަކުރައްވާނެ ކަން އިއުލާން ކުރައްވާފައެވެ.

ސޭންޑަރޒް 2016 ވަނަ އަހަރުގެ ރިޔާސީ އިންތިހާބުގެ ޓިކެޓަށް ވާދަކުރައްވައި، ނާކާމިޔާބީއާއި ކުރިމަތިލައްްވަން ޖެހުނީ ހިލަރީ ކްލިންޓަންއާއި ވާދަކުރައްވާފައެވެ. ނަމަވެސް އެ ފަހަރު ހީކުރި ގޮތާ ހިލާފަށް ސޭންޑަރޒް ވަނީ ވަރުގަދަ ކެމްޕެއިންއެއް ކުރައްވައި ގިނަ ޒުވާން ޑިމޮކްރެޓުންގެ ތާއީދު ހޯދުމަށް ފަހު، 52 ސްޓޭޓްގެ ތެރެއިން 23 ސްޓޭޓް ކާމިޔާބު ކުރައްވާފައެވެ.