ފްރެންޗް ލީގު: ޕީއެސްޖީއަށް 12 ޕޮއިންޓްގެ ލީޑެއް

ފްރެންޗް ލީގުގައި ސެއިންޓް އެޓިއެން ބަލިކޮށް ޕެރިސް ސެއިންޓް ޖާމަން (ޕީއެސްޖީ) އިން ޕޮއިންޓް ތާވަލުގެ އެއްވަނައިގައި 12 ޕޮއިންޓްގެ ލީޑެއް ނަގައިފިއެވެ.

އާދީއްތަ ދުވަހުގެ ރޭ ކުޅުނު މެޗު ސެއިންޓް އެޓިއެންއާ ވާދަކޮށް ޕީއެސްޖީން މެޗު ކާމިޔާބުކުރީ 0-1 ގެ ނަތީޖާއަކުންނެވެ.

ސެއިންޓް އެޓިއެން ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅުނީ ޕީއެސްޖީންނެވެ. އެގޮތުން އެޓީމުން ވަނީ ސެއިންޓް އެޓިއެންގެ ހާފަށް ބާރުބޮޑުކޮށް ގިނަ ހަމަލާތައް އުފައްދާފައެވެ.

މި ހާފްގައި ސެއިންޓް އެޓިއެންއަށްވެސް ވަނީ ލަނޑު ޖެހުމަށް ފުރުސަތުތަކެއް ލިބިފައެވެ. ނަމަވެސް އެޓީމަށް އެ ފުރުސަތުތަކުގެ ބޭނުން އެންމެ އެދެވޭ ގޮތެއްގައި ހިފިފައެއް ނުވެއެވެ.

ފުރަތަމަ ހާފް ނިމުނީ ދެޓީމުންކުރެ ޓީމަކަށްވެސް ލަނޑެއް ނުޖެހި އެއްވަރުވެގެންނެވެ.

ނަމަވެސް ދެވަނަ ހާފް ފެށިގެން ޕީއެސްޖީން ވަނީ އެޓީމުގެ އެޓޭކްތައް ވަރުގަދަކޮށް މެޗުގެ ލީޑު ނަގާފައެވެ. މި ލަނޑު 73 ވަނަ މިނެޓުގައި ކާމިޔާބުކުރީ ޑެނީ އަލްވޭސްގެ އެހީތެރިކަމާއެކު ކީލިއަން އެމްބަޕޭއެވެ.

މި ލަނޑާއެކު އެމްބަޕޭ ވެގެންގޮސްފައިވަނީ ފާއިތުވެދިޔަ 45 އަހަރު ތެރޭގައި ފްރެންޗް ލީގުގައި 18 މެޗެއްގައި 19 ލަނޑު ކާމިޔާބުކުރި ފުރަތަމަ ފްރާންސް ކުޅުންތެރިޔާއަށް ވެގެން ގޮސްފައެވެ.

މި ލަނޑަށްފަހުވެސް ޕީއެސްޖީއަށް ވަނީ މެޗުގައި ލީޑު ފުޅާކުރުމަށްވެސް ފުރުސަތުތަކެއް ލިބި ބޭކާރުވެފައެވެ.

މި ނަތީޖާއާއެކު ޕީއެސްޖީ އޮތީ ކުޅުނު 23 މެޗުން ލިބުނު 62 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. ޕީއެސްޖީގެ ފަހަތުން ދެވަނައިގައި އޮތް ލިއްލޭއަށް 25 މެޗުން ލިބިފައިވަނީ 50 ޕޮއިންޓެވެ. މެޗުން ބަލިވި ސެއިންޓް އެޓިއެން އޮތީ 25 މެޗުން ލިބުނު 40 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ.