އެފްއޭ ކަޕް: ނިއުޕޯޓް ބަލިކޮށް ސިޓީ ކުއާޓާއަށް

އެފްއޭ ކަޕްގައި ނިއުޕޯޓް ކަންޓްރީ ބަލިކޮށް މެންޗެސްޓާ ސިޓީ ކުއާޓާ ފައިނަލަށް ދަތުރުކޮށްފިއެވެ.

ހޮނިހިރު ދުވަހުގެ ރޭ ކުޅުނު މެޗު ނިއުޕޯޓާ ވާދަކޮށް ސިޓީން މެޗު ކާމިޔާބުކުރީ 1-4 ގެ ނަތީޖާއަކުންނެވެ.

ނިއުޕޯޓް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅެމުންދިޔައީ ސިޓީންނެވެ. އެގޮތުން އެޓީމުން ވަނީ ނިއުޕޯޓްގެ ހާފަށް ބާރުބޮޑުކޮށް ގިނަ ހަމަލާތައް އުފައްދާފައެވެ.

މި ހާފްގައި ނިއު ޕޯޓަށްވެސް ވަނީ ލަނޑު ޖެހުމަށް މަދުން ނަމަވެސް ފުރުސަތުތަކެއް ލިބިފައެވެ. ނަމަވެސް މި ފުރުސަތުތަކުގެ ބޭނުމެއް އެޓީމަށް ހިފިފައެއް ނުވެއެވެ.

ފުރަތަމަ ހާފް ނިމުނީ ދެޓީމުންކުރެ ޓީމަކަށްވެސް ލަނޑެއް ނުޖެހި އެއްވަރުވެގެންނެވެ.

ދެވަނަ ހާފް ފެށިގެން ސިޓީން ވަނީ މެޗުގެ ލީޑު ނަގާފައެވެ. މި ލަނޑު ކާމިޔާބުކުރީ ލީރޯއި ސާނޭއެވެ. އެޓީމަށް ލީޑު ފުޅާކޮށްދިނީ 75 ވަނަ މިނެޓުގައި ފިލް ފޮޑެންއެވެ.

މެޗުގައި ނިއުޕޯޓްގެ ފަރާތުން ފެނިގެންދިޔަ ހަމައެކަނި ލަނޑު 88 ވަނަ މިނެޓުގައި ކާމިޔާބުކޮށްދިނީ ޕެޑްރައިގް އަމޮންޑްއެވެ. ސިޓީގެ ތިންވަނަ ލަނޑު 89 ވަނަ މިނެޓުގައި ކާމިޔާބުކުރީ ފޮޑެންނެވެ.

ސިޓީން ވަނީ މެޗުގެ އިތުރުވަގުތުގައި އެޓީމުގެ ހަތަރުވަނަ ލަނޑު ކާމިޔާބުކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ރިޔާދް މަހުރޭޒްއެވެ.