އެންޓި ކޮރަޕްޝަން ކޮމިޝަން (އޭސީސީ) އިން ބުރާސްފަތި ދުވަހު ނެރުނު މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ ހިޔާނާތުގެ ރިޕޯޓަކީ ހިންގާފައިވާ ޖަރީމާއެއް ކަމަށް ތުހުމަތުކޮށް، އެކަމުގައި ޝަމިލްވާ ރައްޔިތުންގެ މަޖިލީހުގެ މެމްބަރުންގެ މައްސަލަ ބަލަން ޖެހޭ ކަމަށް ގާނޫނީ ވަކީލް އަބްދުﷲ ހަސީން ވިދާޅުވެއްޖެއެވެ.
އެމްއެމްޕީއާރުސީގެ 1.4 ބިލިއަން ރުފިޔާގެ ބޮޑު ހިޔާނާތާ ގުޅިގެން އޭސީސީން މިދިޔަ ބުރާސްފަތި ދުވަހު އާންމުކޮށްފައިވާއިރު އޭގެ ތެރޭގައި މި ސަރުކާރުގެ އިސް ބޭފުޅުންގެ އިތުރުން ރައްޔިތުންގެ މަޖިލީހުގެ މެމްބަރުން ވެސް ހިމެނެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމްގައި ހަސީން ވިދާޅުވީ، އޭސީސީން ނެރެފައިވާ ރިޕޯޓަކީ ''އުނި'' ރިޕޯޓެއް ކަމަށާއި، އެ ރިޕޯޓަށް ވަކި ބައެއްގެ ނުފޫޒު ފޯރާފައިވާ ރިޕޯޓެއް ކަމަށެވެ. ހަމައެއާއި އެކެ އެއަކީ އޭސީސީގެ މެމްބަރުންގެ އަމިއްލަ މަސްލަހަތު ހިމެނޭ ގޮތަށް ތައްޔާރު ކޮށްފައިވާ ރިޕޯޓެއް ކަމަށް ހަސީން ވަނީ ތުހުމަތު ކުރައްވާފައެވެ.
''އޭސީސީން މިނިވަން މުއައްސަސާއެއްގެ ނަން ބޭނުން ކޮށްގެން، މިނިވަން މުއައްސަސާއެއްގެ މެމްބަރުންގެ ގޮތުގައި ތިބެ ވަކިފަރާތަކަށް ބުރަވާ ގޮތަށް ހިޔާނާތައް މަގުފައިވާ ފަދަ ރިޕޯޓެއް ނެރުނީތީ އެ ފަރާތްތަކުގެ މައްޗަށް ފިޔަވަޅު އަޅަން އެބަ ޖެހޭ. ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީއަށް ގޮވާލަން މި ބޭފުޅުން އެތަނަށް ހާޒިރު ކުރަން. ގަސްތުގައި މި ބޭފުޅުން މިނިވަން މުއައްސަސާއެއްގެ ނަން ބޭނުންކޮށްގެން ރިސޯސް ބޭނުންކޮށްގެން ހިންގާފައިވާ ބޮޑު ޖަރީމާއެއް'' ހަސީން ވިދާޅުވިއެވެ.
ލޭބާ ޕާޓީގައި އިސްކޮށް އުޅުއްވާ ހަސީން ވިދާޅުވީ، މިނިވަން ތަހްގީގެއް ހިންގައިފިނަމަ، އޭސީސީގެ މެމްބަރުންނަށް ވަކި ސިޔާސީ ނުފޫޒެއް އޮވެގެން ނެރުނު ރިޕޯޓެއްކަން ސާބިތުވާނެ ކަމަށެވެ.
ހަސީން ވިދާޅުވި ގޮތުގައި، އޭސީސީން ހާމަކުރި ރިޕޯޓުގައި އެސްއޯއެފް އިން ފައިސާ ލިބިފައިވާ ހުރިހާ ފަރާތްތަކަކީ ހިޔާނާތުގެ ފައިސާގައި ހިފި ފަރާތްތަކަށް ނުވުން އެކަށީގެންވާ ކަމަށާއި، އެސްއޯއެފް ކުންފުންޏަކީ ހަމައެކަނި ހިޔާނާތުގެ މުއާމަލާތް ކުރާ ކުންފުންޏެއް ކަމުގެ ހެކި އެސީސީއަށް ލިބިގެންވާތޯވެސް ހަސީން ވަނީ ސުވާލު އުފައްދަވާފައެވެ.
''އެ ހެއްކެތް ވެސް ނެތް. ކަނޑައެޅިގެން ވަރަށް ބޮޑެތި އޮޅުވާލުންތަކެއް އޮޅޭ ގޮތަށް، ރައްޔިތުންނަށް އެކަންކަމުގެ މާނަ ނުބައިކޮށް ދޭހަވާ ގޮތައް މި ކަންކަން ކޮށްފައި ވަނީ. މި ކަމުގެ ސަބަބުން މި ވީ ގޮތަކީ އެ ލިސްޓުގައި ހިމެނޭ ހުރިހާ ފަރާތްތަކެއްގެ އަބުރު އެބަ ގެއްލިގެންދޭ. އެ ލިސްޓުގައި އޮވެއްޖެއްޔާ ކޮންމެ މީހަކުވެސް ރައްޔިތުންނަށް ބެލެވޭނީ ހިޔާނާތްތެރިއެކޭ... މިހެނެއް ނޫނެ މިކަން. އަޅުގަނޑުމެންނަށް މި އެގެނީ މިކަން ވެފައި އޮތް ގޮތަށް ބަލައިލީމަ ވެސް އެގެނީ މީގައި އެބަ އުޅޭކަން މައްސަލަތަކެއް.'' އޭނާ ވިދާޅުވިއެވެ.
އެ ރިޕޯޓުގައިވާ ކަންތައްތަކުގެ ފުރިހަމަ ތަހްގީގެއް ކުރުމުގެ ފުރުސަތު ފުލުހުންގެ އިތުރުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އުފައްދާފައިވާ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީއަށް ވެސް އެބައޮތް ކަމަށް ހަސީން ވިދާޅުވިއެވެ.
ކުރިން އެމްޑީޕީގައި އިސްކޮށް އުޅުއްވި ހަސީން ވިދާޅުވީ، އޭސީސީ ރިޕޯޓްގައި ނަން ހިމެނޭ މި ސަރުކާރުގެ އިސްބޭފުޅުން ގޭގައި މަޑުކުރުމަށް ރައީސް ސޯލިހު އެންގެވުމަކީ މި ސަރުކާރުގެ ހެޔޮނިޔަތް މި ކަމުގައި އޮތްކަން ދޭހަވެގެން ދިޔަ ކަމެއް ކަމަށެވެ.
އޭސީސީން އާންމު ކުރި އެމްއެމްޕީއާރްސީގެ ޙިޔާނާތުގެ ރިޕޯޓުގައި ހިމެނޭ މި ސަރުކާރުގެ އިސް ދެ ބޭފުޅުންނަކީ މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހްމަދު މަހުލޫފާއި މިނިސްޓްރީ އޮފް ޕްލޭނިންގގެ ސްޓޭޓް މިނިސްޓަރު އަކްރަމް ކަމާލުއްދީނެވެ.
ހަސީން ވިދާޅުވީ، އެ ރިޕޯޓާއި ގުޅިގެން އެއްވެސް ފަރާތެއް އިސްތިއުފާދެއްވައި ވަކި ކުރަން ނުޖެހޭނެ ކަމަށް ގަބޫލްކުރައްވާ ކަމަށެވެ. ނަމަވެސް މިނިވަން މުއައްސާސާ ތަކުގައި ތިބި ފަރާތްތަކަށް ތުހުމަތުތަކެއް ކުރެވެމުން ދާއިރު، އެ ފަރާތްތަކާއި މެދު ފިޔަވަޅު އަޅަން ޖެހޭނެ ކަމަށް އޭނާ ވިދާޅުވިއެވެ.
''ސަރުކާރުންވެސް އަދި އެހެން މުއައްސަސާތަކުން ވެސް ، ޖުޑިޝަރީ އިން ވެސް އަދި ރައްޔިތުންގެ މަޖިލީހުންވެސް މިނިވަން މުއައްސަސާއެއްގެ ގޮތުގައި ހަރަކާތްތެރިވާ ފަރާތްތަކަށް އެ ފަރާތްތަކުގެ އިމުން ބޭރުވެގެން، ޒިންމާ އަދާނުކޮށް ވަކި ފަރާތެއްގެ ސިޔާސީ ނުފޫޒަކަށް ލެބެމުންދާ ކަމުގެ ތުހުމަތުތަކެއް ކުރެވޭއިރު އެ ފަރާތްތަކާއި މެދު ފިޔަވަޅު އަޅުއްވާށެ.'' ހަސީން ވިދާޅުވިއެވެ.
އެސީސީގެ ރިޕޯޓާ ބެހޭ ގޮތުން ހަސީން ވާހަކަ ދައްކާފައިވާއިރު އެ ރިޕޯޓުގެ ސައްހަ ކަމާމެދު ގާނޫނީ ވަކީލް މަރިޔަމް ޝުނާނާވެސް ވަނީ ސުވާލު އުފައްދާފައެވެ.
