ސައުދީ އަރަބިއާއިން އެ ޤައުމުގެ ބަޖެޓް ޑެފިސިޓަށް ލުޔެއް ހޯދުމުގެ ގޮތުން ބައިނަލްއަޤުވާމީ ބާޒާރުގައި ސުކޫކް ވިއްކަން ނިންމައިފިއެވެ.

ސައުދީ އަރަބިއާގެ ދަރަނި މެނޭޖް ކުރާ އިދާރާގެ ވެރިޔާ، ފަހަދް އަލް ސައިފް އާއި ހަވާލާދީ މެދުއިރުމަތީގެ މަޝްޙޫރު އިޤުތިޞާދީ މީޑީއާ، 'މާލް' އިން އިން ބުނެފައިވަނީ މި އަހަރުގެ ފަހު ހަ މަސްދުވަހު ސައުދީ އަރަބިއާއިން ބައިނަލްއަޤުވާމީ ބާޒާރުގައި ސުކޫކް، ނުވަތަ އިސްލާމިކް ބޮންޑު ވިއްކުމަށް ނިންމާފައިވާ ކަމަށެވެ.

އެގޮތުން މި އަހަރު 118 ބިލިއަން ރިޔާލް (31 ބިލިއަން އެމެރިކާ ޑޮލަރު) ގެ ސުކޫކް ވިއްކުމަށް ސައުދީ އަރަބިއާއިން ވަނީ ނިންމާފައެވެ. އަދި މި ފައިސާގެ ތެރެއިން ބޮދު އަދަދެއް ބޭނުން ކުރެވޭނީ 131 ބިލިއަން ރިޔާލް (34.4 ބިލިއަން އެމެރިކާ ޑޮލަރު) އަށް އަރާފައިވާ އެ ޤައުމުގެ ބަޖެޓު ޑެފިސިޓަށް ލުޔެއް ހޯދުމަށް ކަމަށްވެސް ފަހަދް އަލް ސައިފް އާއި ހަވާލާދީ މާލް ނޫހުގައި ވަނީ ބުނެފައެވެ.

މި އަހަރު ފެށުނު ފަހުން ސައުދީގެ ދަރަނި ކުޑަކުރުމަށް، އެކި ކަހަލަ ބޮންޑު ވިއްކައިގެން މިހާތަނަށް އެ ޤައުމުން ވަނީ 7.5 އެމެރިކާ ޑޮލަރު ހޯދާފައެވެ.