ލީގް ކާމިޔާބު ކުރުމުގެ ފުރުސަތު ފަސްޓީމަކަށް އެބަ އޮތް: ޕެޕް ގާޑިއޯލާ

ޕްރިމިއާ ލީގް ކާމިޔާބު ކުރުމުގެ ފުރުސަތު ފަސްޓީމަކަށް އެބައޮތް ކަމަށް މެންޗެސްޓާ ސިޓީގެ ކޯޗް ޕެޕް ގާޑިއޯލާ ބުނެފިއެވެ.

ގާޑިއޯލާ މިހެން ބުނީ އެވެޓަންއާ ދެކޮޅަށް މެންޗެސްޓާ ސިޓީ ނިކުންނަ މެޗުގެ ކުރިން ނޫސްވެރިންނާ ވާހަކަ ދައްކަމުންނެވެ.

ޕްރިމިއާ ލީގްގެ ފޯރި ގަދަވެފައިވާ މި ދަނޑިވަޅުގައި ގާޑިއޯލާ ބުނީ، ކުޅޭ ކޮންމެ މެޗަކީ ވެސް މުހިއްމު މެޗެއް ކަމަށް ކަމަށާއި، މެޗަށް ނުކުއްނަނީ ތިން ޕޮއިންޓް ހޯދާ މޮޅުވުމުގެ އިތުރުން ތާވަލުގެ އެއްވަނަ އަށް އަރަން ކަމަށެވެ.

ކޯޗް ގާޑިއޯލާ އިތުރަށް ބުނީ، ފާއިތުވި ހަފްތާއަކީ ހައިރާން ކުރުވަނިވި ނަތީޖާތަކެއް ފެނިގެންދިޔަ ހަފްތާއެއްކަމަށެވެ. އޭނާ ހުރީ ލީގު މިހާ ވާދަވެރިވާނެކަން މާ ކުރިން ދެނެގަނެގެންކަމަށެވެ.

ސިޓީއިން މިރޭ އެވަޓާން އާއި ދެކޮޅަށް ނިކުންނައިރު އެއްވަނާގައި އޮތް ލިވަޕޫލް އާއި އެޓީމާއި ދެމެދު އޮތީ އެންމެ ތިން ޕޮއިންޓުގެ ފަރަގެކެވެ. އެހެންކަމުން މިރޭގެ މެޗު ސިޓީއިން ކާމިޔާބުކޮށްފިނަމަ، އެއްމެޗު އިތުރަށް ކުޅެ ފައިދާ ގޯލުގެ ތަފާތުން ސިޓީއަށް ތާވަލުގެ އެއްވަނަ މަގާމު ލިބޭނެއެވެ.

ތާވަލުގެ އެއްވަނާގައި ލިވަޕޫލް އޮތީ ކުޅުނު 25 މެޗުން ލިބުނު 62 ޕޮއިންޓާއެކުއެވެ. މެންޗެސްޓާ ސިޓީ ކުޅުނު 25 މެޗުން ލިބުނު 59 ޕޮއިންޓާއިއެކު އޮތީ ތާވަލުގެ ދެ ވަނާގައެވެ.