ޕައިލެޓުންނަށް ވަގުތީ ހައްލެއް، މިއަދު އުދުހޭނެ!
3 ފެބުރުއަރީ 2019 | އާދީއްތަ 21:57ޓްރާންސްޕޯޓް މިނިސްޓަރ ނަހުލާ ވަނީ ޕައިލެޓުންނާއި ބައްދަލުކުރައްވާފަ
މޯލްޑިވިއަންގެ ފްލައިޓެއް ފުރަން ތައްޔާރުވެފައި
ގައުމީ އެއާލައިން, މޯލްޑިވިއަންގެ ޕައިލެޓުންގެ ކަންބޮޑުވުންތަކަށް ވަގުތީ ހައްލެއް ލިބިއްޖެ ކަމަށާއި، ހުރިހާ ޕައިލެޓުންވެސް ހޯމަ ދުވަހު ޑިއުޓީއަށް ނުކުންނާނެ ކަމަށް ޕައިލެޓުން ބުނެފިއެވެ.
މޯލްޑިވިއަންގެ 25 އަށްވުރެ ގިނަ ޕައިލެޓުން، އެފަރާތްތަކުގެ ސަލާމަތާއި ރައްކާތެރިކަމާއިމެދު ކުންފުނިން އިހުމާލުވާ ކަމަށްބުނެ، ޑިއުޓީއަށް ނުނުކުތުމަށް ނިންމާފައި ވަނީ އާދިއްތަ ދުވަހުއެވެ.
ހަޅުތާލު އިއުލާނުކޮށް، ޕައިލެޓުންގެ ފަރާތުން އެންމެ މުހިއްމު ކަމެއްގެ ގޮތުގައި ހުށަހަޅާފައިވަނީ އައިލެންޑް އޭވިއޭޝަންގެ ޑިރެކްޓަރ އޮފް ފްލައިޓް އޮޕަރޭޝަންސްގެ މަގާމުގައި ހުންނެވި މުހައްމަދު އަމީން މަގާމުން ވަކިކުރުމަށެވެ.
ނަން ނުޖަހަން ޝަރުތުކޮށް ރާއްޖެއެމްވީއާއި ވާހަކަ ދެއްކި ޕައިލެޓަކު ބުނީ، އެ މައްސަލައަށް ވަގުތީ ހައްލެއް ގޮތުން ފްލައިޓް އޮޕަރޭޝަންސް މަސްއޫލިއްޔަތު އެހެން މީހަކާއި ހަވާލުކޮށްފައިވާ ކަމަށެވެ.
ޕައިލެޓުން އިހްތިޖާޖް ކުރަން ފެށުމުން ޕައިލެޓުންގެ ކަންބޮޑުވުންތައް އޮޅުން ފިލުވުމަށް ޓްރާންސްޕޯޓް މިނިސްޓަރ އައިޝަތު ނަހުލާ އާދިއްތަ ދުވަހުގެރޭ ވެލާނާގޭގައި ޕައިލެޓުންނާއި ބައްދަލުކޮށްފައިވާ ކަމަށްވެސް ރާއްޖެއެމްވީއަށް މައުލޫމާތު ދިން ޕައިލެޓް ބުންޏެވެ.
އޭނާ ބުނީ، ޕައިލެޓުންނަށް ދިމާވެފައިވާ ކަންތައްތަކަށް ދާއިމީ ހައްލެއް ހޯދައިދޭން މަސައްކަތް ކުރައްވާނެ ކަމުގެ ޔަގީންކަން މިނިސްޓަރ ނަހުލާ ދެއްވާފައިވާ ކަމަށެވެ.
މި ކަންކަން ހިނގައިދިޔައިރު މިކަމާއި ގުޅިގެން އައިލެންޑް އޭވިއޭޝަން އިން ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.
ޕައިލެޓުންގެ ސަލާމަތާއި ރައްކާތެރިކަމާއި މެދު ކަންބޮޑުވުން ފާޅުކޮށް، ޕައިލެޓުން ހަޅުތާލު އިއުލާނު ކުރިއިރު، މީގެ ކުރިން ސޯޝަލް މީޑިއާގައި ލީކުވި އޯޑިއޯތަކަކުންވެސް މޯލްޑިވިއަންގެ ޕައިލެޓުންގެ ހިތްހަމަނުޖެހުންތައް ހުރިކަން ވަނީ ހާމަވެފައެވެ.
މީގެ އިތުރުން މިދިޔަ އަހަރުގެ އޮގަސްޓު މަހު އައިލެންޑް އޭވިއޭޝަންގެ މުވައްޒަފުންނަށް ބޯނަސް ދޫކުރި ގޮތާމެދު ހިތްހަމަނުޖެހިގެން، ގިނަ އަދަދެއްގެ ކެބިން ކްރޫއިންތަކެއްވެސް ވަނީ ހަޅުތާލުކޮށްފައެވެ. ކެބިންކްރޫއިން ހަޅުތާލު ކުރުމުގެ ގޮތުން މަސައްކަތްކުރުމަށް އުޒުރުވެރިވުމުން، މޯލްޑިވިއަންގެ ބައެއް ޑޮމެސްޓިކް ފްލައިޓްތަކުގެ ދަތުރުތައް އޭރު ކުރިއަށް ގެންގޮސްފައިވަނީ ތަމްރީނު ފުރިހަމަނުވާ ކެބިންކްރޫއިންނާއި އެކުގައެވެ.
