އޭތި ސަޅިއަސް، މީތި ކަޑަ!

މަގުމަތީގެ ގަވާއިދުތަކާއި ގާނޫނުތަކަށް ބޯލަނބައިގެން ދުއްވުމަށް ހޭލުންތެރިކުރުވުމަށް "މީތިސަޅި" ގެ ނަމުގައި ހުކުރު ދުވަހު ބޭއްވި އިވެންޓްގެ ތެރެއިން ބްރިޖް މަތީ ސައިކަލެއްގައި ދުއްވާފައިދިޔަ ދެ އަންހެން ކުދިން ފެންނަ ފޮޓޯއަކަށް ސޯޝަލް މީޑިއާގައި ފާޑުކިއުން އަމާޒުވެއްޖެއެވެ.

ސޯޝަލް މީޑިއާގައި ދައުރުވަމުންދާ ފޮޓޯގައި ފެންނަނީ، ބްރިޖްމަތިން ދުއްވާފައި ދިޔަ ދެ ސައިކަލްގައި ތިބި ދެކުއްޖަކު ޓްރާންސްޕޯޓް މިނިސްޓްރީން އިންތިޒާމްކުރި މި ހޭލުންތެރި ކުރުވުމުގެ އިވެންޓްގައި ބައިވެރިވުމަށް "މީތިސަޅި" ލިޔެފައިވާ ޓީޝާޓް ލައިގެން ދެބައިމީހުން އޮލަ ވާހައެއްގައި ބްރިޖްމަތިން ދުއްވަމުން ކުރިއަށްދާ މަންޒަރެވެ.

މި ފޮޓޯއަށް ސޯޝަލް މީޑިއާގައި ފާޑުކިއުން ދަނީ އަމާޒުވަމުން

މި އިވެންޓްގެ ސީދާ މަގްސަދަކީ ދުއްވުމުގައި ރައްކާތެރި ފިޔަވަޅުތައް އެޅުމާއި، ގަވާއިދުތަކަށް ހުރުމަތްތެރިކޮށް ހިތުމަށް ހޭލުންތެރިކުރުވުންކަމަށް ވީރު، އަބަދުވެސް ހަނދާން ކޮށްދެއްމުންދާ އެއްކަމަކީ ބްރިޖްމަތީގައި ދުއްވާއިރު، ހެލްމެޓް ބޭނުންކުރުމެވެ. އެކަމަކު އެ ފޮޓޯ އިން ފެންނަގޮތުގައި އެކުދިން ބްރިޖްމަތިން ދުއްވަމުން ދިޔައީ ބޮލުގައި ހެލްމެޓް އެޅުމުގެ ބަދަލުގައި ރީތި ފިޔާތޮށިކުލައިގެ ހެލްމެޓްތައް އުނގުގުމަތީގައި ބާއްވާލައިގެން ދުއްވާލަމުންދާ މަންޒަރެވެ.

މި ފޮޓޯއަށް ސޯޝަލް މީޑިއާގައި ކަންބޮޑުވުމާއި އެކު ކޮމެންޓްކުރަމުން އެބަދެއެވެ. އެގޮތުން މިނިސްޓަރަށް ޓެގްކޮށް ބައެއް ފަރާތްތަކުން ބުނަމުން ދިޔައީ ކިތަންމެ ވަރަކަށް ހޭލުންތެރި ކުރުވިޔަސް ދިވެހިންނަށް އަޑު ނީވޭނޭކަމަށެވެ.

އެވާހަކަ އަޅުގަނޑު މި ކުރު ރިޕޯޓްގައި ލިޔެލައި ފާހަގަކޮށްލަން މި ބޭނުންވާ ހަގީގީ މަގްސަދަކީވެސް މިކަމުންވެސް އިތުރުބަޔަކަށް ކަމުގެ މުހިއްމުކަން އަންގައިދިނުމެވެ.

ބްރިޖްމަތިން ސައްލާކުރަމުންދާ ވާހަކަ އަކީވެސް ވަރަށް އާއްމު ވާހަކައެކެވެ. އެގޮތަށް އެކަން ނުކުރުމަށް ކަމާއިބެހޭ ފަރާތްތަކުން ތަކުރާރުކޮށް ދަނީ ނަސޭހަތްތެރިވަމުންނެވެ. އެކަމަކު އެ އަޑު އަހަނީ ކާކުތޯއެވެ. އާއްމުންގެ މީހެއް، ފުލުހެއް ކިޔާނެކަމެއް ނެތެވެ.

ބްރިޖްމަތިން ވާހަކަ ދައްކަމުން ދިޔަ ފުލުހަކާއި އާއްމުންގެ މީހެއް

ކޮންމެއަކަސް ބްރިޖްމަތީ ގާވާއިދާޚިލާފަށް ބާރު ސްޕީޑްގައްޔާއި ދެތިން ސައިކަލް އެއް ހަމައެއްގައި ތިބެގެން މަޝްވަރާތައް ބާއްވަމުން ދުއްވާ މީހުން ވަރަށް ގިނައެވެ. މިއަދު މި ފޮޓޯއަށް އެހާބޮޑު ސަމާލުކަމެއް ލިބިގެން ދިޔަކަމަށް ބެލެވެނީ "މީތިސަޅި" ކިޔާ ގައުމީ ފެންވަރުގެ ހޭލުންތެރި ކުރުވުމުގެ މިފަދަ ޕްރޮގްރާމެއް ހިނގަމުން ދިޔައިރު މިފަދަ ކަމެއް ހިނގުމުން ކަމަށް ވެދާނެއެވެ.

"މީތިސަޅި" އިވެންޓްގައި މިނިސްޓަރު ވިދާޅުވި ފަދައިން ގާނޫނުތައް ހަދައި އަޅާނެ ފިޔަވަޅުއްތައް ކަނޑައަޅައި ގާނޫނު ތަންފީޒު ކުރިއަސް، އަމިއްލަ ނަފުސު އިސްލާހު ނުކުރާނަމަ ގާނޫނުތަކުގެ ބޭނުމެއްނެތެވެ.