އޭޑީކޭގައި ލޭ ރައްކާ ކުރާނެ ގޮތުގެ އުސޫލެއް އެކުލަވާލައިފި
30 ޖެނުއަރީ 2019 | ބުދަ 19:42ގައިޑްލައިން ހަދާފައި ވަނީ ދުނިޔޭގެ ގައުމުތަކުގައި ބޭނުން ކުރާ ގައިޑްލައިނާ އެއްގޮތަށް
ބްލަޑް ބޭންކް ބޭނުންކުރާނެ ގައިޑްލައިން ލޯންޗު ކުރަނީ
އޭޑީކޭ ހޮސްޕިޓަލްގައި ލޭ ރައްކާ ކުރާނެ ގޮތުގެ އުސޫލެއް ކަނޑައަޅައިފިއެވެ.
އޭޑީކޭގައި ލޭ ބޭނުން ކުރާނެ ގޮތް ކަނޑައަޅާފައި ވަނީ އޭޑީކޭގެ ސެމިނާ ހޯލުގައި ބުދަ ދުވަހު ބޭއްވި ރަސްމިއްޔާތެއްގައެވެ. ގައިޑްލައިން ފޮތެއްގެ ސިފާގައި، އެ އުސޫލު ލޯންޗުކޮށް ދެއްވީ ހެލްތް މިނިސްޓްރީގެ ސްޓޭޓް މިނިސްޓަރ ޑރ. ޝާހް ޢަބްދުﷲ މާހިރުއެވެ.
އެ ހަފްލާގައި ލޭ ރައްކާ ކުރާނެ ގޮތް އުސޫލު ޕްރެޒެންޓެޝަނަކުން ވަނީ ދައްކާލާފައެވެ. އޭޑީކޭގެ މެނޭޖިން ޑިރެކްޓަރު އަހުމަދު އަފްއާލްގެ އިތުރުން ހޮސްޕިޓަލުގެ މުވައްޒަފުން ބައިވެރި އެ ސެމިނާގައި ޑރ. ޝާހު ވިދާޅުވީ، ލޭ އެޅުމުގެ ހިދުމަތް ލިބުމަކީ ''ލައިފް ސޭވިން'' ކުރެވޭ ކަމެއް ކަމަށާއި، އޭޑިކޭއިން ތައާރަފް ކުރި ގައިޑްލައިނާ އެކު އެ ހޮސްޕިޓަލް އިތުރު ހަރުފަތަކަށް ގޮސްފައިވާ ކަމަށް އޭނާ ވިދާޅުވިއެވެ.
ހަމައެއާކު މި ހިދުމަތުގެ ސަބަބުން ރާއްޖެއަށް މި ހިދުމަތް ލިބުމުގައި ފަސޭހަ ތަކެއް ވެގެންދާނެ ކަމަށާއި، ސަރުކާރުގެ ހޮސްޕިޓަލްތަކުގައި ލޭ ދިނުމުގެ ކަންތައް ރަނގަޅު ކުރަމުން ދާއިރު އިތުރަށް ޕްރައިވެޓް ސެކްޓާތަކުގައި އެކަން ފުޅާވެ ހަރުދަނާވުމަކީ މުޅި މުޖުތަމައަށް ލިބިގެންދާނެ ވަރަށް ބޮޑު ކުރިއެރުމެއް ކަމަށް ޝާހް ވިދާޅުވިއެވެ.
ބްލަޑް ބޭންކެއް ހިންގާއިރު އެންމެ މުހިއްމު ކަމަކީ، ރައްކާތެރި ކަމާއެކު ލޭ އެޅޭނެ ކަންތައްތަކެއް އިންތިޒާމު ވެގެން ދިޔުން ކަމަށް ޝާހް ވަނީ ފާހަގަކޮށްފައެވެ.
އެގޮތުން ކަނޑައެޅިފައިވާ ގޮތަށް އެކަން ކުރިއަށް ނުދާނަމަ އޭގެ ސަބަބުން ފުރާނައަށް ނުރައްކާވާ ކަންތައްތަކާ ދިމާވުން އެކަށީގެންވާ ކަމަށް ޝާހް ވިދާޅުވިއެވެ. ބްލަޑް ބޭންކެއްގެ އެންމެ މުހިއްމު އެއްބަޔަކީ ހިމަޓޮލޮޖިސްޓުން ކަމަށާއި އެމީހުންނަކީ މަދުބައެއް ކަން ފާހަގަ ކުރައްވަމުން ޑރ. މާހިރު ވިދާޅުވީ ހިމަޓޮލޮޖިސްޓުން އިތުރު ކުރުމުގެ މަސައްކަތް ސަރުކާރުން މަސައްކަތް ކުރަމުންދާ ކަމަށެވެ.
''ބްލަޑް ބޭންކެއްގެ ހިދުމަތް ކުރިޔަށް ދާއިރު ވަރަށް ގިނަ ތަފާތު ބޭފުޅުންގެ އެހީ ބޭނުންވެ. އޭގަ ހިމަޓޮލޮޖިސްޓުންނާއި ނަރުހުންގެ އެހީ ވަރަށް މުހިއްމު. އަޅުގަނޑަށް ނޯޓިސް ކުރެރވިފައި އިން ކަމެއް ދިވެހި ރާއްޖޭގައި ހިމަޓޮލޮޖިސްޓުން ނަކީ ވަރަށް މަދު ސްޕެޝަލިޓީއެއް. އެހެންވީމަ އަޅުގަނޑުމެން ސަރުކާރުންވެސް ވަރަށް މިހާރު ވިސްނަމުން ގެންދާ ކަމެއް ހިމަޓޮލޮޖިސްޓުން ސްޓްރެންތުން ކުރުން.'' ޝާހް ވިދާޅުވިއެވެ.
އެ ހަފްލާގައި ވާހަކަ ދައްކަވަމުން އޭޑީކޭގެ މެނޭޖިން ޑައިރެކްޓަރު އަހްމަދު އަފްއާލް ވިދާޅުވީ، އެފަދަ ގައިޑްލައިނެއް އެކުލަވައިލުމުގެ މައިގަނޑު ބޭނުމަކީ، ކޮންމެ މީހަކަށް ވެސް އެޅޭ ލެއަކީ ސަލާމަތްކަމާ އެކު އެޅޭ ލޭއެއް ކަން ޔަގީން ކުރަން ޖެހޭ ކަމަށެވެ. ހަމަ އެގޮތުން ސިއްހީ ހިދުމަތް ދޭ ތަންތަނުން މީހުންގެ ފުރާނަ ސަލާމަތް ކުރުމަށް އަޅާ ލެއަކީ، އެ މިހާއަށް އަޅާ ލޭގެ ސަބަބުން ގެއްލުމެއް ނުވެ އެކަން ކުރުމަކީ ކޮންމެ މީހެއްގެ ވާޖިބެއް ކަމަށް އޭނާ ވިދާޅުވިއެވެ. މީގެ ހަތަރު އަހަރު ކުރިން އޭޑިކޭގައި ހެދި ބްލަޑް ބޭންކުގައި ހުރީ މަދު ގައިޑް ލައިންތަކެއް ކަމަށާއި، މިއަދު ލޭ ހަދިޔާ ކުރާ މީހުންގެ އަދަދު ގިނަވެފައިވާ ކަމަށާއި ބްލަޑް ބޭންކުގެ މަސައްކަތް އިތުރުވެފައިވާ ކަމަށް އޭޑިކޭގެ މެނޭޖިން ޑައިރެކްޓަރ ވިދާޅުވިއެވެ.
''އަޅުގަނޑުމެން ބަލައިލި ބަލާލުމުން ރާއްޖެގައި އަދި ކޮމްޕްރެހެންސިވް ގޮތެއްގައި ހުރިހާ މަރުހަލާތަކެއް އެކުލެވޭ ގޮތަށް އެކަށީގެންވާ ގައިޑްލައިނެއް އެކުލަވައިލެވިފައި އޮތް ކަމަށް ފާހަގައެއް ނުކުރެވޭ. އަޅުގަނޑަށް ލިބިފައިވާ މައުލޫމާތުން ރަނގަޅުކަމުގައި ވަނީ ނަމަ އެފަދަ ގައިޑްލައިނެއް މިވަގުތަކު އެއް ނެތް.''
އަފްއާލް ވިދާޅުވީ، މިހާރު އަމަލުކުރަން ހަމަޖެހިފައިވާ ގައިޑްލައިނަކީ ބައިނަލް އަގްވާމީ ގައިޑްލައިން އެއްގޮތަށް ހަދާފައިވާ ގައިޑް ލައިނެއް ކަމަށެވެ. އޭޑީކޭގެ ތަފާތު ހިސާބުތައް ދައްކާ ގޮތުން ވޭދުވެދިޔަ އަހަރު، 875 މީހުން ވަނީ ލޭ ހަދިޔާކޮށްފައެވެ.
