ލޯން އެއްބަސްވުމެއްގެ ދަށުން މެލްކޮމް ހޯދުމަށް އާސެނަލްއިން މަސައްކަތް ކުރަނީ

ލޯން އެއްބަސްވުމެއްގެ ދަށުން ބާސެލޯނާއަށް ކުޅެމުން އަންނަ މެލްކޮމް ހޯދުމަށް އާސެނަލްއިން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

ދަ ސަންއިން ބުނީ، ލޯން އެއްބަސްވުމެއްގެ ދަށުން މެލްކޮމް ހޯދުމަށް އާސެނަލްއިން ބޭނުންވާ ކަމަށާއި، އެކަމަށް ކުރަންޖެހޭ މަސައްކަތްތައް އެ ކްލަބުން މިވަގުތު ކުރަމުން އަންނަ ކަމަށެވެ.

މެލްކޮމް ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރެއިން ޗައިނާގެ ކްލަބަކުން އޭނާ ހޯދުމަށް 65 މިލިއަން ޕައުންޑު ހުށަހެޅިކަމަށްވެސް ދާދި ފަހުން ރިޕޯޓްތައް ބުނިއެވެ.

މިދިޔަ އަހަރުގެ ޖުލައި މަހު 41 މިލިއަން ޔޫރޯގެ އިތުރުން ބޯނަސްގެ ގޮތުގައި އެއް މިލިއަން ޔޫރޯ ދިނުމަށް ފަހު ބާސާ އިން މެލްކޮމް ގެނައީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ.

ކޮރިންތިއަންސް އިން 2014 ވަނަ އަހަރު ކެރިޔަރު ފެށި އުމުރުން 21 އަހަރުގެ މެލްކޮމް ވަނީ އެ ކްލަބަށް ކުޅުނު 70 މެޗުގައި 10 ލަނޑު ކާމިޔާބުކޮށްފައެވެ. އޭނާ ވަނީ އެ ކްލަބާއެކު ބްރެޒިލިއަން ޗެމްޕިއަންޝިޕް ކާމިޔާބުކޮށްފައެވެ.

ކޮރިންތިއަންސް ދޫކޮށްލުމަށް ފަހު މެލްކޮމް ދެން ބަދަލުވީ ބޯޑޯ އަށެވެ. އެގޮތުން އޭނާ ވަނީ ބޯޑޯ އަށް ކުޅުނު 96 މެޗުގައި 23 ލަނޑު ކާމިޔާބުކޮށްފައެވެ.

ބޯޑޯ އަށް ކުޅުމަށް ފަހު މި ސީޒަނުގައި ބާސާ އަށް ބަދަލުވެ މެލްކޮމް މިހާތަނަށް ކުޅުނީ 12 މެޗެވެ. އެ ނުވަ މެޗުގައި އޭނާ ވަނީ ދެ ލަނޑު ކާމިޔާބުކޮށްފައެވެ.

ބްރެޒިލްއާއެކު 20 އަހަރުން ދަށުގެ ވޯލްޑް ކަޕްގެ ދެވަނަ 2015 ވަނަ އަހަރު ހޯދި މެލްކޮމް ވަނީ ބްރެޒިލްގެ ޒުވާން ޓީމުތަކަށް ވެސް ކުޅެފައެވެ.