އެފްއޭ ކަޕް: ބާންލީ ބަލިކޮށް ސިޓީ ހަތަރުވަނަ ބުރަށް

އެފްއޭ ކަޕްގައި ބާންލީ ބަލިކޮށް މެންޗެސްޓާ ސިޓީ ހަތަރުވަނަ ބުރަށް ދަތުރުކޮށްފިއެވެ.

ހޮނިހިރު ދުވަހުގެ ރޭ ކުޅުނު މެޗު ބާންލީއާ ވާދަކޮށް ސިޓީން މެޗު ކާމިޔާބުކުރީ 0-5 ގެ ތަފާތުބޮޑު ނަތީޖާއަކުންނެވެ.

ސިޓީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ލަނޑު ޖެހުމަށް ގިނަ ފުރުސަތުތައް އެޓީމުން ވަނީ ތަނަވަސްކޮށްފައެވެ.

ސިޓީން މެޗުގެ ލީޑު ނެގީ 23 ވަނަ މިނެޓުގައެވެ. މި ލަނޑު ޑެނީލޯގެ އެހީތެރިކަމާއެކު ކާމިޔާބުކުރީ ގެބްރިއަލް ޖީސަސްއެވެ. މި ލަނޑަށްފަހުވެސް ސިޓީއަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ބާންލީގެ މައްޗަށް ސިޓީ ކުރީގައި އޮވެގެންނެވެ.

ދެވަނަ ހާފް ފެށިގެން ސިޓީން ވަނީ މެޗުގެ ލީޑު ފުޅާކޮށްފައެވެ. މި ލަނޑު ކެވިން ޑިބްރޭނާގެ އެހީތެރިކަމާއެކު ކާމިޔާބުކުރީ ބެނާޑޯ ސިލްވާއެވެ. ސިޓީގެ ތިންވަނަ ލަނޑު 61 ވަނަ މިނެޓުގައި ރިޔާދް މަހްރޭޒްގެ އެހީތެރިކަމާއެކު ކާމިޔާބުކުރީ ޑިބްރޭނާއެވެ.

މި ހާފްގައި ސިޓީގެ ފަރާތުން ގިނަ ހަމަލާތަކެއް ފެނިގެން ގޮސްފައިވާއިރު، އެޓީމުގެ ހަތަރުވަނަ ލަނޑު ކާމިޔާބުކުރީ 75 ވަނަ މިނެޓުގައެވެ. މި ލަނޑަކީ ބާންލީގެ ލޯންގް އަތުން ބައިކޮޅަށް ވަތް ލަނޑެކެވެ.

ސިޓީގެ ފަސްވަނަ ލަނޑު 87 ވަނަ މިނެޓުގައި ކާމިޔާބުކުރީ ސާޖިއޯ އަގުއެރޯއެވެ. މި ލަނޑަކީ ސިޓީއަށް ލިބުނު ޕެނަލްޓީއަކުން އޭނާ ކާމިޔާބުކުރި ލަނޑކެވެ.