މަރުވެފައި އޮތް ޒުވާނަކު މާލެ ގެއެއްގެ ތެރެއިން ފެނިއްޖެ
މަރުވެފައި އޮންނަތާ ތިން ދުވަސް
މަރުވެފައި އޮއްވާ ފެނުނު މީހާ ގޭ ކައިރީގައި ބަޔަކު ހަރަކާތްތެރި ވަނީ
މާލޭ ގެއެއްގެ ތެރޭގައި ޒުވާނަކު މަރުވެފައި އޮއްވާ ފެނިއްޖެއެވެ.
ޚަބަރެއް ނުވާތާ ތިން ދުވަސް ފަހުން އެ ޒުވާނާ މަރުވެފައި އޮއްވާ ފެނުނީ ގަލޮޅު ދަނޑު ކައިރި، ގ. ރަންދެލިގޭގެ ފުރަތަމަ ފަންގިފިލާގެ ކޮޓަރިއެއްގެ ތެރެއިންނެވެ. މާފަންނު ގެއަކަށް ނިސްބަތްވާ އެ ޒުވާނާއަކީ ސްޓެލްކޯގައި މަސައްކަތް ކުރާ މުވައްޒަފެކެވެ. ޝާހިދު ނަމަކަށް ކިޔާ އެ ޒުވާނާ ރަންދެލިގޭގައި ދިރިއުޅެނީ އާއިލާއާ ވަކިންނެވެ.
މިދިޔަ އަހަރު ތެރޭގައި ސްޓްރޯކެއް ޖެހި، މެއަށް ހޮޅިއެއް ވެސް ލައްވާފައިވާ ޝާހިދަކީ ވަރަށް ހެލިފެލިވެ އުޅޭ، ހަރަކާތްތެރި ޒުވާނެއް ކަމަށް އޭނާގެ ރައްޓެހިން ބުންޏެވެ.
ޝާހިދު މަރުވެފައި އޮއްވާ ފެނިގެން އެގެއަށް ފުލުހުން ވަނީ ހޮނިހިރު ދުވަހުގެ ހަވީރު 4:30 އިރުއެވެ. ޝާހިދުވެ ހަށިގަނޑު ފެނުނުއިރު ވަރަށް ބޮޑަށް ކުނިވެފައިވާ ކަމަށް ވެއެވެ.
