އަވައްޓެރި އިންޑިއާގެ އަސްކަރިއްޔާ އާއި ރާއްޖެއާ ހެދިފައިވާ އެކްޝަން ޕްލޭންގެ ދަށުން އިންޑިއާ އިން ރާއްޖެ އަށް ދޭން ހަމަޖެހިފައިވާ ''ޑޮނިޔާ އެއާކްރާފްޓް'' ވަރަށް އަވަހަށް ލިބެގެންދާނެ ކަމަށް ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެއެވެ.
ރަސްމީ ދަތުރުފުޅެއްގައި އިންޑިއާއަށް ވަޑައިގެންއުޅުއްވާ މާރިޔާ އެ ގައުމުގެ ''ދަ ވަޔާ'' ނޫހަށް ދިން އިންޓަވިއުއެއްގައި ވިދަޅުވީ، އިންޑިއާ އިން ރާއްޖެއަށް ދީފައިވާ ހެލިކޮޕްޓަރުތައް ބޭނުން ނުކޮށް ބާއްވާފައި އޮތީ ކީއްވެގެން ކަމެއް އެގިވަޑައިގެންފައި ނުވާ ކަމަށެވެ.
ހަމައެއާ އެކު ތިން ވަނަ އެއާ ކްރާފްޓެއް ވަރަހަށް އަވަހަށް ރާއްޖެ އަށް ގެނެވޭނެ ކަމަށް މާރިޔާ ވިދާޅުވިއެވެ. އިންޑިއާ އިން ދީފައިވާ ހެލިކޮޕްޓަރުގެ ސަބަބުން ފާއިތުވި ދުވަސް ތަކުގައި 160 މީހުންގެ ފުރާނަ ސަލާމަތް ކުރެވިފައިވާ ކަމަށް ވެސް މިނިސްޓަރު ވިދާޅުވިއެވެ.
ރާއްޖޭގެ ފުރަތަމަ އަންހެން ޑިފެންސް މިނިސްޓަރު މާރިޔާ ވިދާޅުވީ، އިންޑީއާ އިން ފަންޑު ކޮށްގެން ރާއްޖޭގެ ކަނޑުގެ ސަރަހައްދުގައި ބަހައްޓަން ހަމަޖެހިފައިވާ ރާޑަރ ސަވައިލެންސް ސިސްޓަމް ވެސް ވަރަށް އަވަހަށް ބެހެއްޓިގެން ދާނެ ކަމަށެވެ.
އިންޑިއާގައި މިއަދު ފާހަގަ ކުރަމުންދާ އެ ގައުމުގެ 70 ވަނަ މިނިވަން ދުވަހުގެ ރަސްމިއްޔާތުގައި މެހްމާނުންގެ ގޮތުގައި ޑިފެންސް މިނިސްޓަރު މާރިޔާގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ވެސް ވަނީ ބައިވެރިވެވަޑައިގެންފައެވެ. އެ ރަސްމިއްޔާތުގައި ބޭއްވި ހެވިކަމުގެ ކުޅިވަރު ދެ ބޭފުޅުން ބަނީ ބައްލަވައިލައްވާފައެވެ. ޑިފެންސް މިނިސްޓަރު އިންޑިއާއަށް ކުރައްވާ ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގަންނަވަން ހަމަޖެހިފައި ވަނީ މި މަހުގެ 30 ވަނަ ދުވަހު ކަމަށް އެމްއެންޑީއެފް އިން މައުލޫމާތު ދެއެވެ.