ޗެލްސީގެ އެއްބަސްވުން އެ ކްލަބަށް ކުޅެމުން އަންނަ ބެލްޖިއަމްގެ ވިންގާ އެޑެން ހަޒާޑް އާކުރުން ވަރަށް ގާތް ކަމަށް ރިޕޯޓްތައް ބުނެފިއެވެ.
ބްލީޗާ ރިޕޯޓް އިން ބުނީ ހަޒާޑްގެ އެއްބަސްވުން ފަސް އަހަރަށް އާކުރަން އުޅޭ ކަމަށާއި، އެކަމަށް ކުރަންޖެހޭ މަސައްކަތް ޗެލްސީން ކުރަމުން އަންނަ ކަމަށެވެ.
އުމުރުން 28 އަހަރުގެ ހަޒާޑް ހޯދުމަށް ރެއާލް މެޑްރިޑްގެ އިތުރުން ގިނަ ކްލަބްތަކުން އަންނަނީ މަސައްކަތް ކުރަމުން ކަމަށް ރިޕޯޓްތައް ބުނެއެވެ. ނަމަވެސް އެއްވެސް ކްލަބަކަށް ހަޒާޑްއާއެކު އެއްބަސްވުމަކަށް އައިސްފައިނުވާ ކަމަށް ރިޕޯޓްތައް ބުނެއެވެ.
ޗެލްސީއާއެކު ހަޒާޑް ހަދާފައިވާ އެއްބަސްވުން ހަމަވާނީ 2020 ވަނަ އަހަރެވެ. ނަމަވެސް އޭނާ މި ޖެނުއަރީ ޓްރާންސްފާގައި އެހެން ކްލަބަކަށް ބަދަލުވުން ވަރަށް ކައިރި ކަމަށް ބައެއް ރިޕޯޓްތައް ބުނެއެވެ.
ދާދި ފަހުން ނޫސްވެރިންނަށް މައުލޫމާތު ދެމުން ހަޒާޑް ބުނީ އެއްބަސްވުން ކުރިޔަށް އޮތް ދުވަސްތަކުގައި އާނުކުރެވިއްޖެ ނަމަ އެހެން ކްލަބަކަށް ބަދަލުވުމުގެ ފުރުސަތު އެބަ އޮތް ކަމަށާއި، އަމިއްލަ އަށް ކްލަބް ދޫކޮށްލުމުގެ ވިސްނުމެއް އަދި ނެތް ކަމަށެވެ.
ފްރާންސްގެ ލިއްލޭ އިން ކެރިޔަރު ފެށި ހަޒާޑް ވަނީ އެޓީމަށް ކުޅުނު 194 މެޗުގައި 50 ލަނޑު ކާމިޔާބުކޮށްފައެވެ. އޭނާ ޗެލްސީއަށް ބަދަލުވީ 2012 ވަނަ އަހަރު އެވެ. އޭނާ ވަނީ ޗެލްސީއަށް މިހާތަނަށް ކުޅުނު 329 މެޗުގައި 102 ލަނޑު ކާމިޔާބުކޮށްފައެވެ.
ޗެލްސީއާ އެކު ޔޫރޮޕާ ލީގު ކާމިޔާބުކޮށްފައިވާ ހަޒާޑް ވަނީ އެޓީމާއެކު ޕްރިމިއާ ލީގު ދެ ފަހަރު އަދި ފުޓްބޯލް ލީގު ކަޕް ވެސް ކާމިޔާބުކޮށްފައެވެ. އޭނާ ވަނީ ބެލްޖިއަމް ގައުމީ ޓީމަށް ކުޅުނު 98 މެޗުގައި 27 ލަނޑު ކާމިޔާބުކޮށްފައެވެ.
