ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ބާއްވާ ގޯލްކީޕިން ކޯޗިން ސެޓިފިކެޓް ކޯސް ކާމިޔާބުކަމާއެކު ނިންމާލައިފިއެވެ.
ގޯލްކީޕަރުން ތަމްރީނުކުރާ ކޯޗުންނަށް ހުޅުވާލައިގެން ބާއްވާ މި ކޯސް އާދީއްތަ ދުވަހު ފެށިއިރު، މި ކޯސް ކުރިޔަށްގެންދިޔައީ ފަސް ދުވަހުގެ މުއްދަތަށެވެ.
ޒުވާން ގޯލްކީޕަރުން އުފެއްދުމަށް އަމާޒު ހިފައިގެން އެފްއޭއެމުން ފަށާފައިވާ މަސައްކަތް އިތުރަށް ފުޅާކުރުމަށް ބާއްވާ މި ކޯހުގައި ތަމްރީނު ދިނީ އޭއެފްސީގެ ތަޖުރިބާކާރު ގޯލްކީޕިން އިންސްޓްރަކްޓަރެކެވެ.
މިއީ 2006 ވަނަ އަހަރަށްފަހު ގޯލްކީޕަރުން ތަމްރީނުކުރާ ކޯޗުންނަށް ހާއްސަކޮށްގެން ބޭއްވި ފުރަތަމަ ކޯސް ކަމަށްވާއިރު، މި ފަހަރުގެ ކޯހުގައި ފިރިހެން ކޯޗުންގެ އިތުރުން، އަންހެން ހަތަރު ކޯޗުން ވަނީ ބައިވެރިވެފައެވެ.
އެފްއޭއެމުން ވަނީ ދިވެހި ގޯލްކީޕަރުންނަށް ފުރުސަތުތައް އިތުރު ކުރުމުގެ ގޮތުން 2020 ވަނަ އަހަރުން ފެށިގެން ވަކި މުއްދަތެއް ނެތްގޮތަށް ރާއްޖޭގެ ކްލަބްތަކަށް ބިދޭސީ ގޯލްކީޕަރުން ނުގެނެވޭ ގޮތަށް ނިންމާފައެވެ.
