ލީގް ކަޕްގެ ދެވަނަ ލެގުންވެސް ބާޓަން އަލްބިއޮން ބަލިކޮށް މެންޗެސްޓާ ސިޓީ ފައިނަލުގެ ޖާގަ ކަށަވަރުކޮށްފިއެވެ.

ބުދަ ދުވަހުގެ ރޭ ކުޅުނު ދެވަނަ ލެގުގެ މެޗު ސިޓީން ކާމިޔާބުކުރީ ބާޓަންއާ ވާދަކޮށް 0-1 ގެ ނަތީޖާއަކުންނެވެ. މި ދެޓީމު ބައްދަލުކުރި ފުރަތަމަ ލެގު 0-9 ގެ ތަފާތުބޮޑު ނަތީޖާއަކުން ކާމިޔާބުކުރީވެސް ސިޓީއެވެ. އެގޮތުން ސިޓީ ފައިނަލަށް ދަތުރުކުރީ 0-10 ގެ އެގްރިގޭޓް ނަތީޖާއަކުންނެވެ.

ބާޓަން ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ ސިޓީންނެވެ. އެގޮތުން އެޓީމުން ވަނީ ބާޓަންގެ ހާފަށް ބާރުބޮޑުކޮށް ލަނޑު ޖެހުމަށް ފުލުފުލުގައި ފުރުސަތުތައް ތަނަވަސްކޮށްފައެވެ.

މެޗުގައި ފެނިގެންދިޔަ ހަމައެކަނި ލަނޑު 26 ވަނަ މިނެޓުގައި ސިޓީއަށް ކާމިޔާބުކޮށްދިނީ ރިޔާދް މަހުރޭޒްގެ އެހީތެރިކަމާއެކު ސާޖިއޯ އަގުއެރޯއެވެ. މި ލަނޑަށްފަހުވެސް ސިޓީއަށް ލީޑު ފުޅާކުރަން ފުރުސަތުތައް ލިބި ބޭކާރުވިއެވެ.

ދެވަނަ ހާފް ފެށިގެންވެސް ސިޓީއަށް ލަނޑު ޖެހުމަށް ފުރުސަތުތަކެއް ލިބިފައިވާއިރު، އެ ފުރުސަތުތަކުގެ ބޭނުން އެންމެ އެދެވޭ ގޮތެއްގައި ހިފިފައެއް ނުވެއެވެ.

މުޅި މެޗުގައިވެސް ބާޓަންގެ ފަރާތުން މާ އެދެވޭ ކުޅުމެއް ފެނިގެން ގޮސްފައިނުވާއިރު، ލަނޑު ޖެހުމަށްވެސް މާ އެދެވޭ ފުރުސަތެއް އެޓީމަށް ލިބިފައެއް ނުވެއެވެ.

މުބާރާތުގެ ފައިނަލުގައި ސިޓީ ނިކުންނާނީ ބުރާސްފަތި ދުވަހުގެ ރޭ ޓޮޓެންހަމް އަދި ޗެލްސީ ބައްދަލުކުރާ މެޗުން މޮޅުވާ ޓިމަކާއެވެ. މިދެޓީމު ބައްދަލުކުރި ފުރަތަމަ ލެގު ނިމުނީ 0-1 ގެ ނަތީޖާއިން ޗެލްސީގެ މައްޗަށް ޓޮޓެންހަމް ކުރިހޯދައިގެންނެވެ.