ކޮން ޖަޒީރާ ރާއްޖެއްތޯ؟ ދިވެހިރާއްޖޭއެއް ނޫންތޯ ދިވެހިރާއްޖޭ އަކީ: ގާސިމް
24 ޖެނުއަރީ 2019 | ބުރާސްފަތި 04:25މީގެ 1000، 2000 އަހަރު ކުރިގައި މިތާ ބުޑިސްޓުން އުޅުނީމަ އެވާހަކަތޯ މިދައްކަވަނީ
އަލީ ސަމާޚް | 24 ޖެނުއަރީ 2019 | ބުރާސްފަތި 04:25
ޖުމްހޫރީ ޕާޓީގެ ލީޑަރު ގާސިމް އިބްރާހިމް
ކޯލިޝަން ސަރުކާރުގެ "ޖަޒީރާ ރާއްޖެ" މެނިފެސްޓޯއަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވަރަށް ބޮޑަށް ފާޑު ވިދާޅުވެއްޖެ އެވެ.
ބުދަ ދުވަހުގެ ރޭ މ. ކުނޫޒްގައި ބޭއްވި ހަފްލާގައި ޖޭޕީގެ ލީޑަރު ގާސިމް ވިދާޅުވީ އެމަނިކުފާނު އެއްވެސް ބޭފުޅަކު ދެކެ ފަސްޖެހިވަޑައި ކަމަށާއި ކިޔަން ބޭނުންވާ ކޮންމެ އެއްޗެއްވެސް ކިޔާނީ ވަރަށް ފާޅުގައި ކަމަށެވެ. އެމްޑީޕީން ނެރުނު ''އަނެއް ދިވެހިރާއްޖެ'' މެނިފެސްޓޯއަށް ވެސް ގާސިމް ވަނީ ފާޑު ވިދާޅުވެފައެވެ.
އެމަނިކުފާނު ވިދާޅުވީ، އެމްޑިޕީން ބުނަން ބޭނުންވާ އެއްޗެއް ސާފުކޮށް ބުނަން ޖެހޭ ކަމަށެވެ.
''ބަލަ އަނެއް ދިވެހިރާއްޖެ އެއީ ކޮން ދިވެހިރާއްޖެއްތޯ. މީގެ 1000، 2000 އަހަރު ކުރިގައި މިތާ ބުޑިސްޓުން އުޅުނީމަ އެވާހަކަތޯ މިދައްކަވަނީ؟ ރީތިކޮށް ބުނެލަންވީ ނޫންތޯ އޭ ތިމަންނާމެން މި ދައްކާ ވާހަކާއަކީ. ދެން މިހާރު ޖަޒީރާ ރާއްޖެ. ކޮން ޖަޒީރާ ރާއްޖޭއްތޯ. ދިވެހި ރާއްޖޭއެއް ނޫންތޯ މީ. މި ދިވެހިރާއްޖެ އަށް ކިޔާ އެހެން ރާއްޖެއެއް ނޯވެ. ދެން އެހެން ނަމަވެސް ކިޔަންވީ ނުންތޯ ދެއްތޯ. މީކޮން އެއްޗެއް އޮޅުވާލަންތޯ މިއުޅެނީ.'' ގާސިމް ވިދާޅުވިއެވެ.
ބައެއް މީހުން އެމަނިކުފާނާއި ދިމާޔަށް ''ސޭޓް'' ނުވަތަ ''މަހްޖަނު'' ގޮވަމުންދާ ކަމަށް ގާސިމް ވިދާޅުވިއެވެ.
''އެހެން މީހަކު އަޅުގަނޑުމެންނާ ދިމާޔަށް ސޭޓް ކިޔާ މަހްޖަނު ކިޔާ އަނެކައްޗެއް ހަދާ ބޯޑު ހިފައިގެން ނިކުމެ ވާހަކަ ދައްކައިގެން ދެތިން ހަތަރު މޮޔަ ކުދިންނަށް ލާރިދީގެން މިކަހަލަ ކަންތައް ކުރީމާ ކާކުތަ، ޑަރުވެސް ހީނުވޭ. ކަހިރުވަކެކޭވެސް ހިތަކަށް ނާރާ. ކުރާނެ ކަމެއް ކޮށްބަލަ. ކޮންކަމެއް ވާނީ. އެއްކަމެއް ވެސް ނުވާނެ'' ގާސިމް ވިދާޅުވިއެވެ.
