ސީރިޔާއާ ގުޅޭ މަޝްވަރާތަކަށް ޕުޓިން އާއި އުރުދުގާން ބައްދަލު ކުރައްވަނީ
23 ޖެނުއަރީ 2019 | ބުދަ 17:47މަޝްވަރާ ކުރަނީ ސަރަހައްދީ ރޮނގުގައި ސެކިއުރިޓީ ޒޯނެއް ގާއިމްކުރަން
ރަޝިޔާގެ ރައީސް ވްލަޑަމިއަރ ޕުޓިން އާއި ތުރުކީގެ ރައީސް ރަޖަބް ތައްޔިބް އުރުދުގާން
ސީރިޔާއާ ގުޅޭ ގޮތުން ރަޝިޔާގެ ރައީސް ވްލަޑިމިއަރ ޕުޓިނާ މަޝްވަރާ ކުރެއްވުމަށް ތުރުކީގެ ރައީސް ރަޖަބް ތައްޔިބު އުރުދުގާން މޮސްކޯއަށް ވަޑައިގަންނަވައިފި އެވެ.
ބުދަ ދުވަހު ބާއްވަން ހަމަޖެހިފައިވާ ބައްދަލުވުމުގައި ދެ ގައުމުގެ ވެރިން މައިގަނޑު ގޮތެއްގައި ވާހަކަދައްކަން ހަމަޖެހިފައި ވަނީ ސީރިޔާ އާއި ތުރުކީގެ ސަރަހައްދީ ރޮނގުގައި 30 ކިލޯމީޓަރުގެ ސެކިއުރިޓީ ޒޯނެއް ގާއިމްކުރުމާ ބެހޭ ގޮތުންނެވެ. ތުރުކީން އެ ސެކިއުރިޓީ ޒޯން ގާއިމް ކުރަން ނިންމާފައި ވަނީ ސީރިޔާ އާއި އެމެރިކާގެ ވާގިވެރިކަމާ އެކު ހަރަކާތްތެރިވާ ކުރިދީ ހަނގުރާމަވެރިން އެ ގައުމަށް އެރުން ހުއްޓުވުމަށެވެ.
ތުރުކީން ވަނީ ކުރުދީ ހަނގުރާމަވެރިން ހަރަކާތްތެރިވާ ކުރުދިޝް ޕީޕަލްސް ޕްރޮޓެކްޝަން ޔުނިޓް (ވައިޕީޖީ) އަކީ ޓެރަރިސްޓު ޖަމާއަތެއްގެ ގޮތުގައި ކަނޑައަޅާފައެވެ. ނަމަވެސް އެ މީހުން ތަމްރީނުކޮށް އަދި ހަތިޔާރު ފޯރުކޮށްދީފައި ވަނީ އެމެރިކާއިންނެވެ. އެމެރިކާގެ ސިފައިން ސީރިޔާއިން ފޭބުމަށް ތުރުކީއަށް ހުށަހެޅި ހުށަހެޅުމުގައި އެމެރިކާއިން ވަނީ ކުރުދީ ހަނގުރާމަވެރިންނަށް ތުރުކީން ހަމަލާ ނުދޭނެ ކަމުގެ ޔަގީންކަން އަރުވަން ހިމަނާފައެވެ. މިހާތަނަށް ތުރުކީއިން ވަނީ އެކަމަށް އެއްބަސްވުމަށް ދެކޮޅު ހަދާފައެވެ.
ތުރުކީ އާއި އެއް ފަދައިން ރަޝިޔާއިން ވެސް ބޭނުންވަނީ ވައި.ޕީ.ޖީއިން އެ މީހުން ހިފާފައިވާ ސަރަހައްދުތައް އަނބުރާ ސީރިޔާގެ ސަރުކާރަށް ރައްދުކުރުމަށެވެ. ރަޝިޔާއިން ވަނީ މި ފަހުން ކުރުދީ ހަނގުރާމަވެރިންނާއި ސީރިޔާގެ ސަރުކާރާއި ބޭއްވި މަޝްވަރާތަކަށް މަރުހަބާ ކިޔާފައެވެ.
މާހިރުން ބުނެފައިވަނީ ރަޝިޔާއިން މި ސެކިއުރިޓީ ޒޯނު ގާއިމު ކުރުމަށް ދެކޮޅު ނެހެދި ނަމަވެސް، އޭގެ ބަދަލުގައި ސީރިޔާ އާއި ގުޅޭ އެހެން ކަންކަމުގައި ތުރުކީގެ އެއްބާރުލުން ހޯދުމަށް މި ބައްދަލުމުވުމުގައި ދެ ފަރާތުގެ މެދުގައި މަޝްވަރާތައް ކުރެވޭނެ ކަމަށެވެ.
ތުރުކީ އާއި ރަޝިޔާގެ ވެރިންގެ ބައްދަލުވުމަށް ފަހު، ތުރުކީ އާއި އިރާން އާއި ރަޝިޔާ އެކުވެގެން މަޝްވަރާ ބައްދަލުވުންތަކެއް ބާއްވަން ވަނީ ހަމަޖެހިފައެވެ. އެ ތިން ގައުމުން ވަނީ ސީރިޔާ ހަނގުރާމައިގެ އެކި ދުވަސްވަރުގައި އެ ހަނގުރާމަ ނިންމުމަށް އެކި ވަރުގެ މަޝްވަރާތައްކޮށް ނާކާމިޔާބުވެފައިވެއެވެ.
ސީރިޔާގެ ހަނގުރާމައިގައި ރަޝިޔާ އާއި އިރާނުން ސީރިޔާގެ ރައީސް ބައްޝާރު އަލް-އައްސަދަށް ވާގިވެރިވާ އިރު، ތުރުކީއިން މަސައްކަތް ކޮށްފައި ވަނީ ސީރިޔާގައި ހަރަކާތްތެރިވާ މެދުމިނުގެ މުސްލިމް ހަނގުރާމަވެރި ޖަމާއަތްތަކާއި އެކީގައިއެވެ.
