ކާޑިފްސް ސިޓީއަށް އެ ކްލަބްގެ ރެކޯޑް އަގަށް ސޮއިކުރި އެމިލިއާނޯ ސަލާ ދަތުރުކުރި ޖެޓް ގެއްލިގެން ހޯދަން ފަށައިފިއެވެ.

ފްރާންސުން ކާޑިފްއަށް ދަތުރުކުރި މި ޖެޓްގައި ސަލާ ދަތުރުކުރި ކަމަށް ކަމާބެހޭ ފަރާތްތަކުން ވަނީ ކަށަވަރުކޮށްދީފައެވެ. އެގޮތުން އެ ޖެޓް ހޯދުމަށް ހުއްޓާނުލާ މަސައްކަތް ކުރަމުންދާ ކަމަށްވެސް ކަމާބެހޭ ފަރާތްތަކުން ބުނެއެވެ.

ފްރާންސް ގަޑިން ރޭގަނޑު 19:15 ގައި ނައްޓާލި ޖެޓުގެ ހަބަރެއް އެންމެ ފަހުންވީ 5000 ފޫޓު މަތީގައި އޮއްވައި ކަމަށާއި, ޖެޓާއި ގުޅުން ކެނޑުނީ 2300 ފޫޓު މަތިން ދަތުރުކުރަނިކޮށް ކަމަށް ރިޕޯޓުތައް ބުނެއެވެ.

ލީގުގައި ދަށް ނަތީޖާތަކެއް ނެރެމުން އަންނަ ކާޑިފް ރެލިގޭޝަނުން ސަލާމަތްކުރުމަށް އެޓީމަށް ސަލާ ގެނެސްފައިވަނީ މިދިޔަ ހަފްތާއެވެ. މައުލޫމާތު ލިބިފައިވާ ގޮތުގައި ފްލައިޓުގައި ކާޑިފް އަށް ސަލާ ދަތުރުކުރަމުން ދިޔައީ އެޓީމާއި ގުޅުމަށެވެ.

ފްރާންސްގެ ނެންޓެސްއަށް ކުޅެމުން އައި ސަލާ ވަނީ އެޓީމަށް ކުޅުނު 130 މެޗުގައި 48 ލަނޑު ކާމިޔާބުކޮށްފައެވެ. އޭނާ ވަނީ އެ ކްލަބާއެކު ހަތަރު ސީޒަން ހޭދަކޮށްފައެވެ.

އާޖެންޓީނާއަށް އުފަން އުމުރުން 28 އަހަރުގެ ސަލާ ވަނީ ސިއަން އަދި ބޯޑޯއަށްވެސް ކުޅެފައެވެ.