ސިއްހީ ހިދުމަތްދޭ ތަންތަން އެއް ވިއުގައަކުން ގުޅާލުމުގެ މަސައްކަތް ފަށައިފި
22 ޖެނުއަރީ 2019 | އަންގާރަ 14:07މި ބަދަލާއެކު ސިއްހީ ހިދުމަތްތަކަށް އިންގިލާބީ ބަދަލުތަކެއް އަންނާނެކަމަށް މިނިސްޓްރީން ބުނޭ
ސިއްހީ ހިދުމަތްތައް އެއް ވިއުގާއަކުން ގުޅާލުމުގެ ފަހުނަމާގައި ސޮއިކުރުމަށްފަހު ހެލްތް މިނިސްޓަރު އަމީން (ކ) އާއި މަލީހް (ވ)
ސަރުކާރުގެ ސިއްހީ ހިދުމަތްދޭ ތަންތަން އެއް ނެޓްވޯކަކުން ގުޅާލުމުގެ މަސައްކަތް ފަށައިފި އެވެ.
ސަރުކާރުގެ ފުރަތަމަ 100 ދުވަހުގެ ވައުދުތަކުގެ ތެރޭގައި ހިމެނޭ ސިއްހީ ހިދުމަތްތައް އެއްވިޔުގާއަކުން ގުޅާލުމުގެ ފަހުމާނުގައި ސޮއިކުރެއްވެވީ ހެލްތް މިނިސްޓަރު އަބްދުﷲ އަމީނާއި، މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުހައްމަދު މަލީހް ޖަމާލްއެވެ.
މި ނެޓްވޯކްގެ ތެރެއިން ސިއްހީ ހިދުމަތްތައް ގުޅާލެވޭނެ ކަމަށާއި، އެ ނެޓްވޯކް ޤާއިމްކުުރުމަށް ޓެންޑާއަށް ހުޅުވާލައިފައިވާކަމަށް މިނިސްޓްރީން ބުނެ އެވެ. އަދި މި ހިދުމަތް ފޯރުކޮށްދިނުމުގެ ޓެކްނިކަލް އެހީ ދޭން ހަމަޖެހިފައިވަނީ ނޭޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއަޓީ) އިންނެވެ.
މިނިސްޓްރީން ބުނީ އަމަލީ މަސައްކަތް ހަފްތާއެއްގެ ތެރޭގައި ފެށޭނެ ކަމަށެވެ.
ހެލްތް މިނިސްޓަރ އަބްދުﷲ އަމީން -- ފޮޓޯ: ހެލްތް މިނިސްޓްރީ
ސްޓެލްކޯގެ ޖަލްސާ ކުރާ މާލަމްގައި އަންގާރަ ދުވަހު ބޭއްވި ރަސްމިއްޔާތުގައި ވާހަކަދައްކަވަމުން ހެލްތް މިނިސްޓަރު އަބްދުﷲ އަމީން ވިދާޅުވީ، މި ހިދުމަތުގެ ސަބަބުން ހެލްތުން ފޯރުކޮށްދޭ ހިދުމަތްތަށް އަވަސް ވެގެންދާނެ ކަމަށާއި، ޑޮކްޓަރަށް ދެއްކުމާއި އެހެނިހެން ކަންތައްތައް ވެސް މިހާރަށް ވުރެ ފަސޭހަ ވެގެންދާނެ ކަމަށެވެ.
''އަޅުގަނޑުމުން އަލަށް ތައަރަފް ކުރެވޭ ސޮފްޓްވެއާ ތަކާއި އަދި އަލަށް ބޭނުން ކުރެވޭ ޓެކްނޮލޮޖީގެ އެހީގައި ސިއްހީ ހިދުމަތް ހޯދަން އަންނަ ފަރާތްތަކަށްމ ނުވަތަ ސިއްހީ ހިދުމަތް ފޯރުކޮށްދޭ ފަރާތްތަކަށް އަދި ސިއްހީ ހިދުމަތުގެ އެކި އެކި ކަންކަމުގައި ބައިވެރިވެވަޑައިގަންނަވާ ފަރާތްތަކަށް ވަރަށް ބޮޑު ލުޔެއް ލިބިގެންދާނެ. މިގޮތުން ޑޮކްޓަރަށް ދެއްކުމާއި އަދި ޑޮކްޓަރަށް ދެއްކުމަށްފަހުގައި އެމީހަކު ޑޮކްޓަރަށް ދެއްކުމާއި ގުޅިގެން އުފަންވާ މައުލޫމާތުތަކާއި އެމިހާ ކުރިޔަށް އޮތް ތަނުގައި ސިއްހީ ހިދުމަތް ހޯދުމަށްޓަކައި ބޭނުންވާ މައުލޫމާތު ފަސޭހައި އެކްސެސްވުން'' އަމީން ވިދާޅުވިއެވެ.
މި ހިދުމަތް ދޭން ފެށޭ ހިސާބުން ފަހުގެ އެޕްލިކޭޝަންތައް ބޭނުންކޮށްގެން ފޯނާއި ހިސާބަށް ހިދުމަތްތައް އަންނާނެ ކަމަށާއި، އޭގެ ސަބަބުން ހިދުމަތައް ބަދަލު އައިސް ކުރިއެރުންތަން އަންނާނެ ކަމަށް ގަބޫލްކުރާ ކަމަށްވެސް މިނިސްޓަރ ވިދާޅުވި އެވެ.
މި ރަސްމިއްޔާތުގައި ވާހަކަދައްކަވަމުން ކޮމިއުނިކޭޝަން މިނިސްޓަރު މަލީހް ވިދާޅުވީ، އެ މިނިސްޓްރީގެ ބޭނުމަކީ ރާއްޖޭގެ 187 ރަށް އެއްވިޔުގާއަކުން ގުޅާލުން ކަމަށާއި، މި ސަރުކާރުގެ ބޭނުމަކީ ރައްޔިތުންނަށް ވީހާވެސް ފަސޭހާ ގޮތަށް ހިދުމަތް ފޯރުކޮށްދިނުން ކަމަށެވެ.
''އަޅުގަނޑުމެންގެ އުއްމީދަކީ ރާއްޖޭގެ 187 ރަށުގައި މީހުން ދިރުއުޅޭ އިރު މީގެ ކޮންމެ ރަށެއްގައި ވެސް ކޮންމެވެސް އެއް ފަންތިއެއްގެ ހިދުމަތް ފޯރުކޮށްދޭތަންތަން އެބަހުރި. އެހެންވީމާ ސިއްހީ މަރުކަޒަށް ކައުންސިލާއި، ސްޓެލްކޯއާއި މިހުރި ސަރުކާރުގެ ހުރިހާ މުއައްސަސާތަކެއް ރަށު ފެންވަރުގައި ހެދޭ ވިޔުގަޔަކުން ގުޅުވާލެވެން އެބަޖެހޭ.'' މަލީހް ވިދާޅުވިއެވެ.
މަލީހް ވިދާޅުވީ، ކޮންމެ ރައްޔިތެއްގެ ސިއްހީ ރިކޯޑްތަކަކީ، ހާއްސަކޮށް ދިގު މުއްދަތަކަށް ފަރުވާދެމުންދާ ބަލިތަކުގެ ރެކޯޑްތައް ގެއްލިއްޖެނަމަ އެ ރައްޔިތުންނަށް އިތުރު ބޮޑު ތަކުލީފެއް އުފުލަން ޖެހޭ ކަމެއް ކަމަށެވެ. އަދި އަލަށް ތައަރަފްކުރާ ވިއުގާ އަށް އިޝަރާތް ކުރައްވާ މިނިސްޓަރު ވިދާޅުވީ، އެކަމަކީ ރާއްޖޭގެ ތަރައްގީއަށް އެޅުނު މުހިއްމު ފިޔަވަޅެއް ކަމަށާއި، ސަރުކާރުގެ ވަސީލަތްތައް ބެހިފައިވަނީ ދާއިރާތަކުން ކަނޑައެޅި ލަނޑުދަނޑިތައް ހާސިލް ކުރުން ކަމަށެވެ.
