ނާޒިމްގެ ގެއިން ފިސްތޯލަ ފެނުނު މައްސަލަ އަލުން ތަހުގީގު ކުރަން ނިންމައިފި
މައްސަލަ ތަހުގީގު ކުރަން ނިންމީ ނާޒިމް ހުށަހެޅުމުން
ކުރީގެ ޑިފެންސް މިނިސްޓަރު ރިޓަޔާޑް ކާނަލް މުހައްމަދު ނާޒިމް
ކުރީގެ ޑިފެންސް މިނިސްޓަރު ރިޓަޔާޑް ކާނަލް މުހައްމަދު ނާޒިމްގެ ގެއިން ޕިސްތޯލައެއް ފެނުނު މައްސަލަ އަލުން ތަހުގީގު ކުރުމަށް މޯލްޑިވްސް ޕޮލިސް ސަރވިސްއިން ނިންމައިފިއެވެ.
ހޯމަ ދުވަހު ފުލުހުން ކުރި ޓްވީޓްއެއްގައި ބުނެފައިވަނީ މި މައްސަލަ އަލުން ތަހުގީގު ކުރަން ނިންމީ އެ ކަމަށް އެދި ނާޒިމް ހުށައަޅާފައިވުމުން ކަމަށެވެ. ނާޒިމް ފުލުހުންނަށް އެ މައްސަލަ ހުށައެޅުއްވީ މި ޖެނުއަރީ މަހުގެ 18 ވަނަ ދުވަހުއެވެ.
މައްސަލަ ހުށައެޅުއްވުމަށް ފަހު ކުރެއްވި ޓްވީޓެއްގައި ނާޒިމް ވިދާޅުވީ 2014 ވަނަ އަހަރުގެ ޖެނުއަރީ މަހުގެ 18 ވަނަ ދުވަހު އޭރުގެ ސަރުކާރުން އޭނާގެ މައްޗަށް ހިންގި ޖަރީމާ ތަހުގީގުކޮށް އެ އަމަލު ހިންގި މީހުން އިންސާފުގެ ކުރިމައްޗަށް ގެނައުމަށް ފުލުހުންގެ އިދާރާއިން މަސައްކަތް ކުރަން ޖެހޭނެ ކަމަށް ގަބޫލު ކުރާތީ އެކަން ސިޓީ އަކުން ފުލުހުންނަށް ހުށަހަޅަފާއިވާ ކަމަށެވެ.
ޖަލުން މިނިވަންވުމަށް ފަހު ނާޒިމް ވިދާޅުވެފައި ވަނީ އޭނާ ފްރޭމް ކުރުމުގެ ނުބައި ޖަރީމާ ހިންގީ ރައީސް ޔާމީނާއި ކުރީގެ ޕޮލިސް ކޮމިޝަނަރ ހުސައިން ވަހީދު ކަމަށާއި އެ ދެ ބޭފުޅުން އިންސާފުގެ ކުރިމައްޗަށް ގެންނާނެ ކަމަށެވެ.
2015 ވަނަ އަހަރުގެ ޖެނުއަރީ މަހުގެ ތެރޭގައި އޭރުގެ ޑިފެންސް މިނިސްޓަރު ނާޒިމް ދިރިއުޅުއްވާ ގެއިން ޕިސްތޯލައަކާއި ތިން ވަޒަން ފެނުމާއި ގުޅިގެން، ހަނގުރާމަވެރި ހަތިޔާރު ގެންގުޅުމުގެ ކުށުގައި ނާޒިމް 11 އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކުރީ 2015 ވަނަ އަހަރުގެ މާޗު މަހުގެ 27 ވަނަ ދުވަހުއެވެ. ނާޒިމްގެ މައްޗަށް އިއްވާފައިވާ 11 އަހަރު ދުވަހުގެ ޖަލު ހުކުމް ސުޕްރީމް ކޯޓުން ބާތިލްކޮށްފައި ވަނީ 13 ޑިސެމްބަރު 2018 ގައެވެ.
