އަފްރާޝީމްގެ މަރުގެ ތަހުގީގަށް ދެ މީހަކު ހޯދަން ވީޑިއޯ އާންމުކޮށްފި

އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީގެ މަރުގެ ތަހުގީގަށް ދެ މީހަކު ހޯދަން، މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުން ވީޑީއޯއެއް އާންމުކޮށްފިއެވެ.

އެ ކޮމިޝަނުން ހޯމަ ދުވަހުގެ ހަވީރު އާންމުކޮށްފައިވާ ސީސީޓީވީ ފޫޓޭޖުން ފެންނަނީ މަގެއްގެ އެއްފަރާތުގައި ސައިކަލެއްގެ މަތީގައި މީހަކު މަޑުކޮށްގެން އިންނަތަނެވެ. ސައިކަލުގައި އިތުރު މީހަކު އެތަނަށް ދިއުމުން، މަޑުކޮށްގެން ހުރި މީހާ ސައިކަލުގައި ދުއްވާފައިދާ ތަން ފެނެއެވެ.

މަރުތައް ބަލާ ކޮމިޝަނުން ބުނީ އެ ވީޑިއޯއިން ފެންނަނީ މީގެ ހަ އަހަރު ކުރިން، 2012 ވަނަ އަހަރުގެ އޮކްޓޯބަރު މަހުގެ އެއް ވަނަ ދުވަހުގެ ރޭ އަމީނީމަގުގައި ހުންނަ ސްޓެލްކޯ އިމާރާތުގެ ކުރިމަތިން ކްރެސްޓީޒް ރެސްޓޯރަންޓްގެ ހުޅަނގުގައި ބަޔަކު ހަރަކާތްތެރިވާ ވީޑިއޯ ކަމަށެވެ.

އަފްރާޝީމް އަވަހާރަކޮށް ލީ، 2012 ވަނަ އަހަރުގެ އޮކްޓޯބަރު މަހުގެ އެއް ވަނަ ދުވަހުގެ ރޭ ދަންވަރު ސްޓެލްކޯ ސަރަހައްދުގައި ހުންނަ ހ. ފުންވިލު ސިޑި ގޮޅި ސަރަހައްދުގައެވެ.

މަރުތައް ބަލާ ކޮމިޝަނުން އާންމު ކުރި ވީޑީއޯއިން ފެންނަނީ ފާރައަށް ހުރި މީހަކު ޑިއުޓީ ބަދަލުވާ މަންޒަރުތޯ ސުވާލު ކުރުމުން، މަރުތައް ބަލާ ކޮމިޝަނުން ޓްވިޓާގައި ޖަވާބު ދީފައިވެއެވެ. އެ ކޮމިޝަނުން ބުނީ ވީޑިއޯއިން ފެންނަނީ ފާރައަށް ހުރި މީހަކު ޑިއުޓީ ބަދަލުވާ މަންޒަރު ކަމަށެވެ.

މަރުތައް ބަލާ ކޮމިޝަނުން ބުނީ އެ ދެ މީހުންނާ ބެހޭ އެއްވެސް މައުލޫމާތެއް ލިބިފައިވާ ނަމަ އެ ކޮމިޝަނަށް ހިއްސާ ކުރެއްވުމަށް އެދޭ ކަމަށެވެ. އެގޮތުން ކޮމިޝަންގެ ފޯން ނަމްބަރު 3015794 އަށް ގުޅައި، އަންގާލަ ދެއްވުން އެދޭ ކަމަށް އެ ކޮމިޝަނުން ބުންޏެވެ.