ސްޕެނިޝް ލަލީގާ: ރެއާލް ތިންވަނައަށް، އެޓްލެޓިކޯ ފަރަގު ކުޑަކޮށްފި

ސްޕެނިޝް ލަލީގާގައި ސެވިއްޔާ ބަލިކޮށް ރެއާލް މެޑްރިޑް ޕޮއިންޓް ތާވަލުގެ ތިންވަނައަށް ޖެހިލިއިރު، ހިއުސްކާ ބަލިކޮށް އެޓްލެޓިކޯ މެޑްރިޑް ފަރަގު ކުޑަކޮށްފިއެވެ.

ހޮނިހިރު ދުވަހުގެ ރޭ ކުޅުނު މެޗުން ރެއާލް މޮޅުވީ ސެވިއްޔާއާ ވާދަކޮށް 0-2 ގެ ނަތީޖާއަކުންނެވެ.

ރެއާލް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ލަނޑު ޖެހުމަށް ގިނަ ފުރުސަތުތައްވެސް އެޓީމުން ވަނީ ތަނަވަސްކޮށްފައެވެ.

މި ހާފްގައި ސެވިއްޔާގެ ފަރާތުންވެސް ނުރައްކާތެރި ހަމަލާތަކެއް ވަނީ ފެނިގެންގޮސްފައެވެ. ނަމަވެސް އެ ހަމަލާތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

ފުރަތަމަ ހާފް ނިމުނީ ދެޓީމުންކުރެ އެއް ޓީމަކަށްވެސް ލަނޑެއް ނުޖެހި އެއްވެރުވެގެންނެވެ.

ދެވަނަ ހާފް ފެށިގެން ރެއާލުން އެޓީމުގެ އެޓޭކްތައް ވަރުގަދަކޮށްފައިވާއިރު، ލަނޑު ޖެހުމަށްވެސް ގިނަ ފުރުސަތުތައް ވަނީ ތަނަވަސްކޮށްފައެވެ.

ރެއާލުން މެޗުގެ ލީޑު ނެގީ 78 ވަނަ މިނެޓުގައެވެ. މި ލަނޑު އޭރިޔާ ބޭރުން ފޮނުވާލި ބާރު ހަމަލާއަކުން ކާމިޔާބުކުރީ ބްރެޒިލްގެ މިޑްފިލްޑަރު ކަސެމީރޯއެވެ.

މި ލަނޑަށްފަހުވެސް ރެއާލްގެ ފަރާތުން ގިނަ ހަމަލާތަކެއް ވަނީ ފެނިގެން ގޮސްފައެވެ. ރެއާލްގެ ދެވަނަ ލަނޑު އިތުރުވަގުތުގެ ތެރޭގައި ކާމިޔާބުކުރީ ލޫކާ މޮޑްރިޗްއެވެ. މި ލަނޑު އޭނާ ކާމިޔާބުކުރީ ސެވިއްޔާގެ ޑިފެންޑަރެއް އަތުން ހެދުނު ގޯހެއްގެ ފައިދާ ނަގައިގެންނެވެ.

މި ނަތީޖާއާއެކު ރެއާލް އޮތީ ކުޅުނު 20 މެޗުން ލިބުނު 36 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން ބަލިވި ސެވިއްޔާ އޮތީ ކުޅުނު 20 މެޗުން ލިބުނު 33 ޕޮއިންޓާއެކު ޕޮއިންޓް ތާވަލުގެ ހަތަރުވަނައިގައެވެ.

ހޮނިހިރު ދުވަހުގެ ރޭ ކުޅުނު މެޗުން އެޓްލެޓިކޯ މޮޅުވީ ހިއުސްކާއާ ވާދަކޮށް 0-3 ގެ ނަތީޖާއަކުންނެވެ.

ހިއުސްކާ ދަނޑުގައި ކުޅުނު މި މެޗު ފެށިގެން 24 ވަނަ މިނެޓުގައި އެޓްލެޓިކޯއިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ހެނާންޑޭޒްއެވެ.

މި ލަނޑަށްފަހުވެސް އެޓްލެޓިކޯގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، ގިނަ ހަމަލާތަކެއްވެސް އެޓީމުގެ ފަރާތުން ވަނީ ފެނިފައެވެ.

ދެވަނަ ހާފް ފެށިގެން އެޓްލެޓިކޯއިން ވަނީ ލީޑު ފުޅާކޮށްފައެވެ. މި ލަނޑު 52 ވަނަ މިނެޓުގައި ކާމިޔާބުކުރީ އެރިއަސްއެވެ. އެޓްލެޓިކޯގެ ތިންވަނަ ލަނޑު 71 ވަނަ މިނެޓުގައި ކާމިޔާބުކުރީ ކޯކޭއެވެ.

މި ނަތީޖާއާއެކު އެޓްލެޓިކޯ އޮތީ ކުޅުނު 20 މެޗުން ލިބުނު 41 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން ބަލިވި ހިއުސްކާ އޮތީ ކުޅުނު 20 މެޗުން ލިބުނު 11 ޕޮއިންޓާއެކު ޕޮއިންޓް ތާވަލުގެ ފުލުގައެވެ.