ހުކުރު ދުވަހު ބޭއްވި އެމްޑީޕީ ޕްރައިމަރީގައި ވޯޓުލުމުގެ ހައްގު ލިބިފައިވާ މީހުންގެ 62 ޕަސެންޓް މީހުން ވޯޓުލާފައިވާ ކަމަށް އެ ޕާޓިން ބުނެފިއެވެ.

ރާއްޖެ ޓީވީގެ ފަލަ ސުރުހީ ޕްރޮގްރާމް ގައި ވާހަކަ ދައްކަވަމުން ޕްރައިމަރީ އިންތިހާބު ގައި އިސްކޮށް އުޅުއްވި އިބްރާހީމް ވަހީދު ވިދާޅުވީ، ހުކުރު ދުވަހު ބޭއްވުނު 77 ދާއިރާގެ ޕްރައިމަރީގައި ވޯޓުލުމުގެ ހައްގު ލިބިގެންވާ މީހުންގެ އަދަދަކީ 78،638 މީހުން ކަމަށެވެ. މި އަދަދުގެ ތެރެއިން 48،777 މީހުން ނިކުމެ ވޯޓުލާފައިވާ ކަމަށް އޭނާ ވިދާޅުވިއެވެ. ހަމަ އެއާއި އެކު މި އަދަދާއި އެކު ވޯޓުލުމުގެ ހައްގު ލިބިގެންވާ މީހުންގެ ތެރެއިން 62 އިންސައްތަ މީހުން ވޯޓުލާފައިވާ ކަމަށް ލިބިފައި ހުރި މައުލޫމާތުތަކުން ދައްކާ ކަމަށް ވަހީދު ވިދާޅުވިއެވެ.

ވޯޓުލާން ފެށުމުގައި ލަސްތަކެއް ހުރިކަން ފާހަގަ ކުރައްވަމުން ވަހީދު ވިދާޅުވީ، އެ ފަދަ މައްސަލަތަކެއް ދިމާވި މައިގަނޑު ސަބަބަކީ، ވޯޓު ފޮށިތަކަށް އައްޔަން ކޮށްފައި ތިބި އިސްވެރިންނާއި އެންމެ ރަނގަޅަށް މުއާމަލާތު ކުރެވިފައި ނުވާތީ ކަމަށެވެ.

''ހުކުރު ދުވަސްވެފައި އަޅުގަނޑުމެންނަށް ފަށަން ވިސްނުން ގޮތް ތަން ކޮޅެއް އަވަސްވުމާއި، ވެރިންނަށް އައްޔަންކުރެވުނު ބޭފުޅުން. މި ފަހަރު ބޭނުން ކުރިން ތަން ކޮޅެއް ހައިލެވެލް ބޭފުޅުން. މީގެ ކުރިން އާދައިގެ ގޮތަކަށް. ފޮށިތަކަށް ލެވުނު ބޭފުޅުންނާއި އަޅުގަނޑުމެންނާ ދެތެރޭގައި އެންމެ ރަނގަޅަށް މުއާމަލާތު ކަންތައް ނުކުރެވި އޮތުން އެވެސް އެއް މައްސަލަ. ބައެއް ބޭފުޅުންނަށް ގަޑިއަށް ވަޑައިނުގެންނެވުން'' އޭނާ ވިދާޅުވިއެވެ.

މިފަދަ ކަންތައްތަކެއް ހުރިކަން ބަޔާން ކުރައްވަމުން ވަހީދު ވިދާޅުވީ، ކުރިއަށް އޮތްތަނުގައި އެ ކަންތައްތައް ރަނގަޅު ކުރުމަށް މަސައްކަތް ކުރާނެ ކަމަށެވެ. 

ޕްރައިމަރީގައި ހޮވުނު ފަރާތްތަކަށް ޕާޓީގެ ފަރާތުން ޓެކްނިކަލް އެހީ ފޯރު ކޮށްދޭނެ ކަމަށް ވަހީދު ވިދާޅުވިއެވެ. އެގެތޭރެގައި ޕާޓީން ކެޑިޑޭޓުންގެ ޕޯސްޓަރު ހެދުމާއި އެބޭފުޅުންގެ ކެމްޕޭނު ލޯންޗު ކުރުމުގެ ހަފްލާތަކުގައި ލީޑަރޝިޕްގެ އިސް ބޭފުޅުންވެސް ބައިވެރިވެ އެ ކެޑިޑޭޓުން ހޮވުމަށް ކުރާ މަސައްކަތުގައި އެހީތެރިކަން ލިބިގެންދާނެ ކަމަށެވެ. ނަމަވެސް ޕްރައިމަރީގެ ޓިކެޓް ކަށަވަރުވެފައިވާ ފަރާތްތަކަށް ލިބިފައި ވޯޓުތަކަކީ އެ ދާއިރާއެއް ގައި ލިބެން ހުރި ވޯޓުތައް ލިބިފައިވުން ކަމަށާއި، އެއީ ވަރަށް ބޮޑު އެހީތެރިކަމެއް ކަމަށް ގަބޫލުކުރައްވާ ކަމަށް އޭނާ ވިދާޅުވިއެވެ.  

ކުރީގެ ރައީސް އަބްދުﷲ ޔާމީންގެ ސަރުކާރުގެ ދުވަސްވަރު އިލެކްޝަން ކޮމިޝަނުން އެއްވެސް ކަހަލަ އެހީތެރިކަމެއް އިންތިހާބަށް ފޯރުކޮށްދީފައި ނުވާކަން ފާހަގަ ކުރައްވާ ވަހީދު ވިދާޅުވީ، އެއާ ޚިލާފަށް މިފަހަރު އީސީ އިން ވަރަށް ބޮޑު އެހީތެރިކަމެއް ދީފައިވާ ކަމަށެވެ.  

''ފުއާދު އިލެކްޝަން ކޮމިޝަނަރަކަށް ހުންނެވި އިރު އެ ލިބުނު އެއްބާރުލުމަށް ފަހު މިހާ ބޮޑު އެއްބާރުލުމެއް ނުލިބޭ. މިފަހަރުގެ މި އިންތިހާބު މި ހިންގީ އިލެކްޝަންސް ކޮމިޝަންގެ ވޯޓު ފޮށިތަކާއި އެއްޗެހި ބޭނުންކޮށްގެން'' ވަހީދު ވިދާޅުވިއެވެ.

އެމްޑީޕީ ވެރިކަމަށް އައުމުން ސްކޫލް ތަކުގައި އިންތިހާބު ބާއްވާ ކަމަށް ބައެއް ފަރާތްތަކުން ސުވާލު ކުރަމުންދާ ކަމަށާއި، ނަމަވެސް ސްކޫލްތަކުގައި އިންތިހާބު ބޭއްވީ އެތަންތަން ކުއްޔަށް ނަގައިގެން ކަމަށް އޭނާ ވިދާޅުވިއެވެ.  

''ޕީޕީއެމް ވެރިކަމުގައި އޮންނައިރު އެކަން ކުރާ ގޮތަކަށް ނޫން ކުރީ. އަޅުގަނޑުމެން ހުރިހާ ސްކޫލެއް ކުއްޔަށް ނެގީ'' ވަހީދު ވިދާޅުވިއެވެ. މިހާރު އެފުރުސަތު ޕީޕީއެމްއަށްވެސް އެބޮތް ކަމަށާއި، ޕީޕީއެމް ވެރިކަމުގައި އެފަދަ ފުރުސަތެއް އެމްޑީޕީއަށް ލިބިފައި ނުވާކަމަށް އޭނާ ވިދާޅުވިއެވެ.