ކޮޕާޑެލްރޭ: ލެގަނޭޒް އަތުން ބަލިވިޔަސް ރެއާލް ކުއާޓާއަށް

ކޮޕާޑެލްރޭގައި ލެގަނޭޒް އަތުން ބަލިވި ނަމަވެސް ރެއާލް މެޑްރިޑް ކުއާޓާ ފައިނަލަށް ދަތުރުކޮށްފިއެވެ.

ބުދަ ދުވަހުގެ ރޭ ކުޅުނު ދެވަނަ ލެގުގެ މެޗުން ރެއާލް ބަލިވީ ލެގަނޭޒްއާ ބައްދަލުކޮށް 0-1 ގެ ނަތީޖާއަކުންނެވެ. ނަމަވެސް ފުރަތަމަ ލެގު 0-3 ގެ ނަތީޖާއިން ކާމިޔާބުކޮށްފައި އޮތުމުން ރެއާލް ކުއާޓާއަށް ދަތުރުކުރީ 1-3 ގެ އެގްރިގޭޓް ނަތީޖާއަކުންނެވެ.

ލެގަނޭޒް ދަނޑުގައި ކުޅުނު މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުން ދިޔައީ ރެއާލުންނެވެ. ނަމަވެސް ލެގަނޭޒް އިން ވަނީ ރެއާލްގެ ހާފަށް ބާރުބޮޑުކޮށް ހަމަލާތަކެއް ކުރީކޮޅު އުފައްދާފައެވެ.

އެގޮތުން 30 ވަނަ މިނެޓުގައި ލެގަނޭޒް އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ބްރައިޓްވައިޓްއެވެ. މި ލަނޑަށްފަހުވެސް ލެގަނޭޒް އިން ލަނޑު ޖެހުމަށް ފުރުސަތުތަކެއް ތަނަވަސްކުރިއެވެ.

ދެވަނަ ހާފް ފެށިގެން ރެއާލުން އެޓީމުގެ އެޓޭކްތައް ވަރުގަދަކޮށްފައިވާއިރު، ލަނޑު ޖެހުމަށް ގިނަ ފުރުސަތުތައް ތަނަވަސްކުރިއެވެ. ނަމަވެސް އެ ފުރުސަތުތަކުގެ ބޭނުން އެންމެ އެދެވޭ ގޮތެއްގައި އެޓީމަށް ހިފިފައެއް ނުވެއެވެ.

މި ހާފްގައި ލެގަނޭޒް އަށް ވެސް ވަނީ ލީޑު ފުޅާކުރަން ފުރުސަތުތަކެއް ލިބިފައެވެ. ނަމަވެސް އެ ޓީމަށް ވެސް އެންމެ އެދެވޭ ގޮތެއްގައި ލިބުނު ފުރުސަތުތަކުގެ ބޭނުން ހިފިފައެއް ނުވެއެވެ.

މުބާރާތުގައި ބުދަ ދުވަހުގެ ރޭ ކުޅުނު މެޗުން އެތްލެޓިކް ބިލްބާއޯއާ ވާދަކޮށް 0-1 ގެ ނަތީޖާއިން ސެވިއްޔާ ބަލިވި ނަމަވެސް އެގްރިގޭޓް ނަތީޖާއިން ސެވިއްޔާ ވަނީ ކުއާޓާއަށް ދަތުރުކޮށްފައެވެ. އެތްލެޓިކް ބިލްބާއޯގެ މައްޗަށް އެގްރިގޭޓުން ސެވިއްޔާ ކުރިހޯދީ 1-3 ގެ ނަތީޖާއަކުންނެވެ.