ހުޅުމާލޭގައި ހިންގި މާރާމާރީއެއްގައި ޒަހަމްވި 17 އަހަރުގެ 2 ކުއްޖަކަށް ފަރުވާދެނީ
16 ޖެނުއަރީ 2019 | ބުދަ 09:00އެކަކަށް ވަނީ ސީރިއަސް ޒަހަމްތަކެއް ލިބިފައި
ހުޅުމާލެ
މާރާމާރީއެއްގައި ޒަހަމްތަކެއް ލިބިގެން ދެ ކުދިންނަށް ހުޅުމާލޭ ހޮސްޕިޓަލުގައި ފަރުވާދޭން ފަށައިފިއެވެ.
ފުލުހުންގެ މީޑިއާ އޮފިޝަލް ވިދާޅުވީ، މާރާމާރިއެއް ހިނގިކަމުގެ ރިޕޯޓްކޮށްފައިވާ ކަމަށާއި މައްސަލަ ބަލަމުންދާ ކަމަށެވެ. ނަމަވެސް އިތުރު މައުލޫމާތު ފަހުން ހަމަކުރާނެ ކަމަށް މީޑިއާ އޮފިޝަލް ވިދާޅުވިއެވެ.
ހުޅުމާލެ ހޮސްޕިޓަލްގެ މީޑިއާ ކޯޑީނޭޓަރ އާޝިޔާ ސޯލިހް ވިދާޅުވީ، ޒަހަމްތަކެއް ލިބިގެން އުމުރުން 17 އަހަރުގެ ދެ ޒުވާނަކު 12:10 ހާއިރު ހޮސްޕިޓަލަށް ގެނެސްފައިވާ ކަމަށެވެ.
އޭގެ ތެރެއިން އެކަކަށް ސީރިއަސް ޒަހަމްތަކެއް ލިބިފައިވާ ކަމަށާއި އޭނާ އަށް އެމެޖެންސީގައި ފަރުވާ ދެމުންދާ ކަމަށެވެ. ދެވަނަ މީހާއަށް ޑްރެސިންގް ރޫމްގައި ފަރުވާދެމުންދާ ކަމަށް އާޝިޔާ ވިދާޅުވިއެވެ. ފަރުވާދެމުންދަނީ ގދ. ރަތަފަންދޫ އަށް ނިސްބަތްވާ ކުއްޖަކާއި އައްޑޫ ސިޓީއަށް ނިސްބަށްވާ ކުއްޖެކެވެ.
