ޓޮޓެންހަމް ހޮޓްސްޕާއަށް ކުޅެމުން އަންނަ އިނގިރޭސި ފޯވާޑް ހެރީ ކޭންއަށް އަނިޔާވެ، ހަ ހަފްތާއަށް ކުޅުމާ ދުރަށް ދާން ޖެހިއްޖެއެވެ.

ކޭންއަށް އަނިޔާވީ ހޮނިހިރު ދުވަހުގެ ރޭ ޔުނައިޓެޑް އަތުން 0-1 ގެ ނަތީޖާއިން ޓޮޓެންހަމް ބަލިވި މެޗުގައެވެ.

ޓޮޓެންހަމުން ނެރުނު ބަޔާނެއްގައި ބުނީ، ކޭންގެ ވާތު ފައިގެ ކުޑަހުޅަށް ދިމާވި އަނިޔާއާއެކު ޓެސްޓުތަކެއް ހެދިފައިވާ ކަމަށާއި، އެ ޓެސްޓުތަކުން ކުޑަހުޅުގެ ލިގަމެންޓަށް އަނިޔާވެފައިވާކަމަށް ދައްކާ ކަމަށެވެ.

އެގޮތުން ޓޮޓެންހަމުން ބުނީ، ކޭންއަށް އަނބުރާ ކުޅުމުގެ ތެރެއަށް އާދެވޭނީ މާޗު މަހުގެ ކުރީކޮޅުކަމަށް ލަފާކުރެވޭ ކަމަށެވެ.

ޕްރިމިއާ ލީގުގެ ތިންވަނައިގައި މިވަގުތު އޮތް ޓޮޓެންހަމް އާއި އެއްވަނައިގައި އޮތް ލިވަޕޫލްއާ ދެމެދު ނުވަ ޕޮއިންޓްގެ ފަރަގެއް އޮތްއިރު، ކޭންއަށް އަނިޔާވުމަކީ ޓޮޓެންހަމްއަށް ކުރިއެރުން ހޯދަން ލިބުނު ބޮޑު ގެއްލުމަކަށް ވެގެންދާނެއެވެ.

މި ސީޒަނުގައި ރަނގަޅު ކުޅުމެއް ދައްކަމުން އަންނަ ކޭން ވަނީ މި ސީޒަނުގެ ޕްރިމިއާ ލީގުގައި ޓޮޓެންހަމްއަށް ކުޅުނު 21 މެޗުގައި 14 ލަނޑު ޖަހާފައެވެ. އަދި ޓޮޓެންހަމްއަށް މި ސީޒަނުގައި އޭނާ ވަނީ ޖުމްލަ 30 މެޗު ކުޅެ، 20 ލަނޑު ކާމިޔާބުކޮށްފައެވެ.

އުމުރުން 25 އަހަރުގެ ކޭންގެ ފުޓުބޯޅަ ކެރިޔަރު ފެށީވެސް ޓޮޓެންހަމުންނެވެ. އޭނާ ވަނީ އެ ކްލަބަށް މިހާތަނަށް ކުޅުނު 243 މެޗުގައި 160 ލަނޑު ކާމިޔާބުކޮށްފައެވެ.

އިނގިރޭސި ގައުމީ ޓީމުގެ ކެޕްޓަންކަން ކުރަމުން އަންނަ ކޭން ވަނީ މިހާތަނަށް ގައުމީ ޓީމަށް ކުޅުނު 35 މެޗުގައި 20 ލަނޑު ކާމިޔާބުކޮށްފައެވެ.