ދުނިޔޭގެ ތަރިކައިގެ ވަގުތީ ލިސްޓްގައި ހިމެނިފައިވާ އަދި ދިވެހިންގެ އަގުހުރި ސަގާފީ ތަރިކައެއް ކަމަށްވާ ހުކުރު މިސްކިތުގެ ހަރިންމަ ފާރުން ބައެއް ތަޅާލުމުން ހެރިޓޭޖް މިނިސްޓްރީން އެކަން ފުލުހުންނަށް ހުށަހަޅައިފި އެވެ.
ހުކުރު މިސްކިތުގެ ފާރުން ބައެއް ތަޅާލުމުން އެކަން ކުށްވެރިކުރައްވާ ހެރިޓޭޖް މިނިސްޓަރު ދުންޔާ މައުމޫން ކުރައްވާފައިވާ ޓުވީޓެއްގައި ވިދާޅުވެފައިވަނީ މާލޭ ހުކުރު މިސްކިތަކީ ޔުނެސްކޯގެ ދުނިޔޭގެ ތަރިކައިގެ ވަގުތީ ލިސްޓްގައި ހިމެނިފައިވާ ދިވެހިންގެ އަގުހުރި ތަރިކައެއް ކަމަށާއި، މި ފަދަ ތަންތަނަށް ބަދަލުގެނެވިގެން ނުވާނެ ކަމަށެވެ. އަދި މި މައްސަލަ ބައްލަވައި ދެއްވުމަށް މިނިސްޓްރީން ވަނީ ފުލުހުންނަށް ހުށަހަޅުއްވާފައެވެ.
މާލެ ހުކުރު މިސްކިތަކީ ޔުނެސްކޯގެ ދުނިޔޭގެ ތަރިކައިގެ ވަގުތީ ލިސްޓުގައި ހިމެނިފައިވާ ދިވެހީންގެ އަގުިުހުރި ސަގާފީ ތަރަކައެއް.މި ފަދަ ތަންތަނަށް. މގޮތަށް ބަދަލުގެނެވިިގެން ނުވާނެ.. @PoliceMv އިން މި ކަން ބައްލަވައި ދެއްވާ. @MACH_MV @ManadhooThoriq pic.twitter.com/64gcCFUqU6
— Yumna Maumoon (@yumna_maumoon) January 14, 2019
މާލޭ ހުކުރު މިސްކިތަކީ 300 އަހަރަށްވުރެ ގިނަ އަހަރުވެފައިވާ އާސާރީ ބިނާއަކަށް ވާއިރު، މިސްކިތުގެ ފާރަކީ އެހާ ގިނަ ދުވަސްވެފައިވާ ފާރެއް ނޫނެވެ.
ހުކުރު މިސްކިތް ދުނިޔޭގެ ތަރިކައިގެ ވަގުތީ ލިސްޓަށް ލީއިރު ފާރުވެސް ވަނީ މިސްކިތުގެ ބައެއްގެ ގޮތުގައި ހިމަނާފައެވެ. އެހެންވެ، އެ ފާރަށް އެއްވެސް ބަދަލެއް ގެންނަ ނަމަ އެކަމުގެ ހުއްދަ ހެރިޓޭޖް ޑިޕާޓްމަންޓުން ނަގަން ޖެހެ އެވެ.
ހުކުރު މިސްކިތުގެ ފާރުން ތަޅާލީ ކުރިން ކަރަންޓް ޑިސްޓްރިބިއުޝަން ފޮއްޓެއް ބަހައްޓާފައި ހުރި ތަނެކެއެވެ. މިހާރު ފާރު ތަޅާލާފައިވަނީ ބެލެވޭ ގޮތުގައި ކުރިން ބަހައްޓާފައި ހުރި ޑިސްޓްރިބިއުޝަން ފޮއްޓެއް ވުރެ ބޮޑު ފޮއްޓެއް އެ ތާގައި ބެހެއްޓުމަށެވެ.
