މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ މަޖިލިސް ޕްރައިމަރީއަކީ ފަވާލެވޭ ނަމޫނާއެއް ކަމަށް އެ ޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޕްރައިމަރީގައި މާފަންނު ހުޅަނގު ދާއިރާ އަށް ވާދަކުރައްވާ ޑރ. މުހައްމަދު ޝަރީފްގެ ކެމްޕޭން އިފްތިތަހުކުރުމަށްޓަކައި ހޯމަ ދުވަހުގެ ރޭ ބެއްވި ރަސްމިއްޔާތުގައި ނަޝީދު ވިދާޅުވީ އެހެން ސިޔާސީ ޕާޓީތަކާއި ހިލާފަށް އެމްޑީޕީން ދަނީ ނަމޫނާ ދައްކަމުން ކަމަށާއި، އެ ޕާޓީއަކީ ސިޔާސީ ގޮތުން ތަސައްރަފު ފުދިފައިވާ ޕާޓީއެއް ކަމަށެވެ.
ޕްރައިމަރީގެ ސަބަބުން ޕާޓީ ތެރޭގައި ބައިބައިވުން އުފެދޭ ކަމަށް އެއްވެސް މީހަކު ޝައްކު އުފައްދަން ނުޖެހޭ ކަމަށާއި، އެއީ ''އިންތިޒާމް ވުމެއް'' ކަމަށް ނަޝީދު ވިދާޅުވިއެވެ.
''އެމްޑިޕީއަކީ ތަސައްރަފު ފުދިފައިވާ ޕާޓީއެއް. މި ޕާޓީ މިއަދު ހިންގަމުން ގެންދާ އެތެރޭގެ ހަރަކާތަކީ ޑިމޮކްރަސީގެ ވަރަށް ފަވާލެވޭ ނަމޫނާއެއް. ވިދަ ވިދައި ހުރި ނަމޫނާއެއް. އަޅުގަނޑުމެންނަށް މިއިން ލިބޭ ހިތްވަރު އަޅުގަނޑުމެންގެ ޕާޓީ އަށް ފައިދާ ކުރާނެ. ކުރިޔަށް އޮތް ތަނުގައި އަޅުގަނޑުމެންނަށް ލިބޭ ކާމިޔާބު ގިނަ ގުނަވެގެންދާނެ.'' ނަޝީދު ވިދާޅުވިއެވެ.
ދިވެހި ރައްޔިތުންނަށް ބޯހިޔާވަހިކަން ހޯދައި ދިނުމަކީ ރައްޖޭގެ ސިޔާސީ ލީޑަރުންގެ ބޮލުގައި އެޅިފައިވާ ދަރަންޏެއްކަން ބަޔާން ކުރައްވަމުން ނަޝީދު ވިދާޅުވީ، އެކަމަށް ހައްލެއް ހޯދައި ދިނުމަކީ އިންތިޒާމްވެގެން ހިންގާ ސިޔާސީ ހަރަކާތް ސުލްހަވެރި ކަމާއި އެކު ހިންގުމުގެ އެންމެ ބޮޑު އެއް ބޭނުންކަމަށެވެ.
އަލަށް އިންތިހާބުވާ މަޖިލީސް ވެގެންދާނީ ރައްޔިތުންގެ އަޑުތައް އަހާ ރައްޔިތުން ބޭނުންވާ ކަންތައް ކޮށްދޭނެ މަޖިލީހެއް ކަމަށް ވެސް އެ މަނިކުފާނު ވިދާޅުވި އެވެ.
