ރަނގަޅު ތައުލީމު ލިބުމުން ބޭރުގެ މަތީ ވަޒީފާގެ ފުރުސަތު ދިވެހިންނަށް އެބަ އޮތް: ރައީސް
އިންޞާފަށް ބޯލަނބާ ކޮންމެ ޤައުމަކާ އެކު ގުޅުން ދަމަހައްޓަވާނެ ކަމަށް ވިދާޅުވި
ރައީސް ސާލިހު
ރަނގަޅު ތަޢުލީމާއި ތަމްރީނު ލިބުމުން ބައިނަލްއަގުވާމީ މަތީ ވަޒީފާގެ ފުރުސަތު ދިވެހިންނަށް އެބައޮތްކަމަށް ރައީސް އިބުރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް ސޯލިހު އެހެން ވިދާޅުވީ ޔޫއޭއީއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެ ޤައުމުގައި ދިރިއުޅެމުންދާ ދިވެހިންނާ ހޯމަ ދުވަހުގެ ރޭ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ އޭވިއޭޝަން ދާއިރާގެ އެކިއެކި ވަޒީފާތަކުގެ އިތުރުން މުދާ އެކްސްޕޯޓް ކުރުމުގަ އާއި، ރިޒޯޓް ވަޒީފާތަކުގައާއި، ތައުލީމީ ދާއިރާގައާއި، ފައިވްސްޓާރ ހޮޓާތަކުގައި ވަޒީފާއަދާ ކުރާ ގިނަ އަދަދެއްގެ ދިވެހިން ޔޫއޭއީގައި ދިރިއުޅެމުން ގެންދާ ކަމަށެވެ. އަދި ބައިނަލްއަޤްވާމީ އެފަދަ ވަޒީފާތަކުގައި ހަރަކާތްތެރިވުމަށް ބޭނުން ވަނީ ކެރުމާއި ހިތްވަރާއެކު ގަދައަޅައި މަސައްކަތް ކުރުން ކަމުގައި ވެސް އެމަނިކުފާނު ވިދާޅުވިއެވެ.
އެ ހަފުލާގައި ވާހަކަފުޅު ދައްކަވަމުން، ރައީސް ވަނީ ރާއްޖޭގެ ހާރިޖީ ސިޔާސަތުގެ މައްޗަށް ވެސް އަލިއަޅުއްވާލައްވާފައެވެ. އެގޮތުން އެމަނިކުފާނު ރައީސުލްޖުމްހޫރިއްޔާ ކަމުގެ މަޤާމާ ޙަވާލުވެވަޑައިގެންނެވިއިރު، ބައިނަލްއަޤްވާމީ މުޖްތަމަޢުގައި ރާއްޖެ އޮތީ ވަރަށް ބޮޑަށް އެކަހެރިވެ ބާކީވެފައި ކަމުގައި ވިދާޅުވިއެވެ. ނަމަވެސް، މި ސަރުކާރުގެ ސިޔާސަތަކީ ޤާނޫނީ ހަމަތަކާއި ބައިނަލް އަޤްވާމީ މުޢާހަދާތަކާއި ހަމަޔާއި އިންޞާފަށް ބޯލަނބާ ކޮންމެ ޤައުމަކާއެކު ގުޅުން ދެމެހެއްޓުން ކަމުގައި ރައީސް ވިދާޅުވިއެވެ.
އަދި އެމިރޭޓްސް ސަރުކާރުން ރާއްޖެއާމެދު ދެކެނީ، ވަރަށް ގާތް އެއްބަނޑުއެއްބަފާ ޤައުމެއްގެ ގޮތުގައި ކަމުގައި ބަޔާން ކުރައްވައި، މި މަހުގެ ފުރަތަމަ ދުވަހުން ފެށިގެން، ދިވެހީންނަށް 30 ދުވަހުގެ އޮންއެރައިވަލް ވިސާ ހަމަޖައްސަވައި ދެއްވިކަމީ، އެކަމުގެ ހެއްކެއް ކަމުގައި ރައީސް ސޯލިހު ވިދާޅުވިއެވެ. އަދި ޤަލްފުގެ އެހެން ޤައުމުތަކުން ވެސް އެ ލުއިފަސޭހަކަން ލިބޭތޯ ސަރުކާރުން މަސައކަތް ކުރައްވަމުން ގެންދަވާ ކަމުގައި އެމަނިކުފާނު ވިދާޅުވިއެވެ.
ރައީސްގެ އެ ދަތުރުފުޅަކީ ޔޫއޭއީގެ ވަލީއަހުދު އަދި ޑެޕިއުޓީ ސުޕްރީމް ކޮމާންޑަރ އޮފް އާމްޑް ފޯސަސް، ހިޒް ހައިނެސް މުޙައްމަދު ބިން ޒައިދު އަލް ނަޙްޔާންގެ ދަޢުވަތަކަށް، "ޒައިދު ސަސްޓެއިނަބިލިޓީ އެވޯޑްސް" އަދި "އިނޯގްރޭޝަން އޮފް ދަ އަބޫދާބީ ސަސްޓެއިނަބިލިޓީ ވީކް" ޙަފްލާގައި ބައިވެރިވެވަޑައިގަތުމަށްޓަކައި އެ ޤައުމަށް ކުރައްވަމުންގެންދަވާ ދަތުރުފުޅެކެވެ.
