ނިޔާވި އެމްއެންޑީއެފް އޮފިސަރުގެ ހަށިގަނޑު މާލެ ގެނެސްފި
9 ޖެނުއަރީ 2019 | ބުދަ 20:28ކަށުނަމާދު އޮންނާނީ އަސުރަށްފަހު، އިސްލާމީ މަރުކަޒުގައި
މުހައްމަދު ރާމިޒްގެ ހަށިގަނޑު މާލެ ގެނެސް އެމްބިއުލާންސަށް އަރުވަނީ
ބުދަ ދުވަހު ހަވީރު ކުއްލި ގޮތަކަށް ނިޔާވި އެމްއެންޑީއެފްގެ ކެޕްޓަން މުހައްމަދު ރާމިޒްގެ ހަށިގަނޑު މާލެ ގެނެސްފިއެވެ.
އެމްއެންޑީއެފުން ރާމިޒްގެ ހަށިގަނޑު މާލެ ގެނެއީ ބުދަ ދުވަހުގެ ރޭ 11:45 ގައެވެ. އަދި މިހާރު އޭނާގެ ހަށިގަނޑު ވަނީ އާސަހަރާއަށް ގެންގޮސްފައެވެ.
އެމްއެންޑީއެފުން ބުނީ ރާމިޒުގެ ހަށިގަނޑު ވަޅުލުމަށް ހަމަޖެހިފައި ވަނީ ބުރާސްފަތި ދުވަހުގެ އަސްރު ނަމާދަށްފަހުގައި ކަމަށެވެ. އޭނާގެ ކަށުނަމާދު އޮންނާނީ އިސްލާމީ މަރުކަޒުގައެވެ.
ނޮދަން އޭރިޔާ ޕޯސްޓުގައި ބުދަ ދުވަހު ޑިއުޓީގައި ހުއްޓާ ރާމިޒު ނިޔާވީ ފަރިތަކުރުންތަކެއްގައި ބައިވެރިވެ، ދުވަމުން ދަނިކޮށް ކުއްލިއަކަށް ވެއްޓިގެން ކަމަށެވެ. އޭނާ ވެއްޓުމުން ވަގުތުން ފަރުވާ ދިނުމަށް ޅ. ނައިފަރު ހޮސްޕިޓަލަށް ގެންދިޔަ ކަމަށް ވެސް އެމްއެންޑީއެފުން ބުންޏެވެ.
ކެޕްޓަން ރާމިޒް ސިފައިންގެ ޚިދުމަތާ ގުޅުނީ 1995 ގައެވެ. ޚިދުމަތުގެ މުއްދަތުގައި ސިފައިންގެ ޚިދުމަތުގެ މެޑަލި، އަޚްލާޤީ މެޑަލް އާއި 17 ވަނަ ސާކް ސަމިޓް މެޑަލް އާއި ދިގު މުއްދަތެއްގައި ޚިދުމަތް ކުރުމުގެ ކުލަ އާއި އަހުލާޤީ ކުލަ 3 ފަހަރަށް ހޯދާފައިވެއެވެ. އަދި އިޚްލާސްތެރި ޚިދުމަތުގެ ކުލަ އަދި ސިފައިންގެ ޚިދުމަތުގެ ކުލަ އޭނާއަށް ލިބިވަޑައިގެންފައިވެއެވެ.
ކެޕްޓަން ރާމިޒް ނިޔާވިއިރު ސިފައިންގެ ޚިދުމަތުގައި 23 އަހަރާއި 04 މަހާއި 21 ދުވަސް ހޭދަކުރައްވާފައިވެއެވެ. ރާމިޒް ނިޔާވިއިރު އެނާގެ އުމުރަކީ 48 އަހަރެވެ.
