އެމްޕީއެލްގައި ކުރާނެ މަސައްކަތެއް ނެތް މުވައްޒަފުން އެބަ ތިބި: ޝާހިދު
ބައެއް ޑިޕާޓްމެންޓް ތަކުގައި ވަރަށް ގިނަ އަދަދަކަށް މުވައްޒަފުން އެބަ ތިބި
މޯލްޑިވްސް ޕޯސްޓްސް ލިމިޓެޑް (އެމްޕީއެލް)ގެ މެނޭޖިން ޑިރެކްޓަރު ޝާހިދު އަލީ
މޯލްޑިވްސް ޕޯސްޓްސް ލިމިޓެޑް (އެމްޕީއެލް) އަށް ބޭނުންވާ މިންވަރަށް ވުރެ ވައްޒަފުން ގިނަ ކަމަށް އެކުންފުނީގެ މެނޭޖިން ޑިރެކްޓަރު ޝާހިދު އަލީ ވިދާޅުވެއްޖެ އެވެ.
ރާއްޖެޓީވީން އަންގާރަ ދުވަހުގެ ރޭ ގެނެސްދިން ފަލަ ސުރުޚީ ޕްރޮގްރާމްގައި ޝާހިދު ވިދާޅުވީ ނިމިގެންދިޔަ 2018 ވަނަ އަހަރު އެމްޕީއެލްއަށް ގިނަ އަދަދަކަށް މުވައްޒަފުން ވައްދާފައިވާ ކަމަށާއި ބައެއް ޑިޕާޓްމެންޓްތަކުގައި ވަރަށް ގިނަ އަދަދަކަށް މުވައްޒަފުން އިތުރުވެފައިވާ ކަމަށެވެ. މުވައްޒަފުން އިތުރުކުރީ ކުންފުނީގައި މަސައްކަތްތައް ގިނަ ވެގެން ނޫން ކަމަށް ވެސް އޭނާ ވިދާޅުވި އެވެ.
ކުންފުނީގައި ކުރާނެ މަސައްކަތެއް ނެތިފައި ތިބި މުވައްޒަފުންގެ ލިސްޓެއް ނަގަން މަސައްކަތް ކުރާކަން ފާހަގަ ކުރަށްވާ ޝާހިދު ވިދާޅުވީ އެފަދަ ފަރާތްތަކާއި މެދު ވަޒީފާގެ އެއްބަސްވުމާއި އެއްގޮތަށް އަމަލު ކުރެވިގެން ދާނެކަމަށެވެ.
"މަސައްކަތް ނެތް މުވައްޒަފަކަށް މުސާރަދިނުމަކީ އެއީ ކުންފުންޏަށް ދެވޭ ގެއްލުމެއް. އެހެން ކަމުން އަޅުގަނޑުމެން މިބަލަނީ އެހެން ސެކްޝަނެއްގައި ހުރެދާނެތޯ، މަސައްކަތް ނެތި ހުންނަ މުވައްޒަފަކަށް ކުރެވިދާނެކަމެއް. އެގޮތަށް ހުރިނަމަ އެމީހަކު އެސެކްޝަނަކަށް ބަދަލުކޮށްގެން އެފަރާތެއް ލައްވާ މަސައްކަތް ކުރުވަން،" ޝާހިދު ވިދާޅުވިއެވެ.
ޝާހިދު ވިދާޅުވީ އެއްވެސް މުވައްޒަފަކު ވަޒީފާއިން ކަނޑާލުމަކީ ކުންފުނީގެ ސިޔާސަތު ނޫން ކަމަށާއި ކޮންމެ މުވައްޒަފެއްގެ ފަރާތުންވެސް އެކަށީގެންވާ ޚިދުމަތް ކުންފުންޏަށް ލިބެންޖެހޭނެކަމަށެވެ. ކުންފުޏްނަށް އެންމެ ފައިދާ ވާނެގޮތަށް ކުންފުނި ހިންގައި އަދި އެތަނުގެ ވަސީލަތްތައް ބޭނުންކުރެވެނީ ތަނަށް އެންމެ ފައިދާ ހުރިގޮތަށްތޯ ބެލުމަކީ އެތަނެއްގެ ވެރިން ކުރަންޖެހޭނެ ކަމެއް ކަމަށްވެސް އޭނާ ވިދާޅުވިއެވެ.
ވިޔަފާރި ބަނދަރު ތިލަފުއްޓަށް ބަދަލު ކުރުމަކީ ވެސް ކުރަންޖެހޭ ކަމެއް ކަމަށް ޝާހިދު ވިދަލުވި އެވެ. އެކަމުގެ ދިރާސާތަކެއް ކުރެވިފައިވާ ކަމަށާއި އެ ދިރާސާގެ އަލީގަޔާއި އަދި އެކުންފުޏްނަށް ބޭނުންވާ ވަސީލަތްތަކަށް ބަލައި ކުންފުނީގެ ބަދަރު ތިލަފުއްޓަށް ބަދަލު ކުރަންޖެހޭ ކަމަށް އޭނާ ވިދާޅުވި އެވެ.
"ރާއްޖޭގެ އިގްތިސާދުގެ ގާތްގަނޑަކަށް 95 ޕަސެންޓް ހިއްސާކުރަނީ އިމްޕޯޓްކުރާ މުދާ. ނަމަވެސް އެމުދާ އެތެރެކުރަން ބޭނުންވާ ވަސީލަތްތަކެއް ނެތް. ވޭތިވެދިޔަތާ މުދާ އެތެރެ ކުރާ މިންވަރު އިތުރުވަމުން ދިޔަޔަސް އެވަރުގެ ޖާގަ ކުންފުނީގެ ބަނދަރުގައި ނެތް،" ޝާހިދު ވިދާޅުވިއެވެ
