އަންހެނަކު ރަޖަމް ކުރަން ކުރި ހުކުމް ސުޕްރީމް ކޯޓުން ބާތިލް ކޮށްފިއެވެ.
ޒިނޭ ކުރި ކަމުގެ ކުށް ސާބިތުވެފައިވާ ޅ. ނައިފަރަށް ނިސްބަތްވާ އަންހެން މީހާގެ މައްޗަށް ރަޖަމް ކުރަން ކުރި ހުކުމް ދިވެހިރާއްޖޭގެ އެންމެ މަތީ ކޯޓުން ބާތިލް ކޮށްފައިވަނީ ހޯމަ ދުވަހުއެވެ.
ސުޕްރީމް ކޯޓުން ހޯމަ ދުވަހު ނެރުނު އަމުރުގައި ބުނެފައި ވަނީ އެ މައްސަލައިގެ ޝަރީއަތް ހިންގައި، ނިންމާފައި ވަނީ އެ ގަޒިއްޔާގެ ދައުވާގައި ޕްރޮސިކިޓަރ ޖެނެރަލްގެ ފަރާތުން ޙަވާލާދީފައިވާ ގާނޫނީ ނަންބަރު 17/2014 ( ޖިންސީ ކުށުގެ ގާނޫނު ) ގެ 27 ވަނަ މާއްދައާ ޙިލާފަށް ކަމަށްވާތީ ކަމަށެވެ.
އުމުރުން 25 ގެ މި އަންހެން މީހާގެ މައްޗަށް ރަޖަމް ކުރަން ޅ. އަތޮޅު ކޯޓުގެ ޖުޑީޝަލް ދާއިރާގެ އިސް މެޖިސްޓްރޭޓް މުހައްމަދު މޫސާ، ހުކުމް ކޮށްފައި ވަނީ ގާނޫނުލް އުގޫބާތުގެ 1205 މާއްދާގެ ދަށުންނެވެ. އެ ހުކުމް ކޮށްފައިވަނީ އާދިއްތަ ދުވަހުއެވެ.
ޅ. ނައިފަރު މެޖިސްޓްރޭޓް ކޯޓުގެ ނަންބަރު 249/G2C/2018 ޤަޟިއްޔާ އާ ގުޅިގެން ދިވެހިރާއްޖޭގެ ސުޕްރީމް ކޯޓުން ނެރެފައިވާ ކޯޓު އަމުރު
— Maldives Judiciary (@judiciarymv) January 7, 2019
ReadMore: https://t.co/IepmmyW7XX
ރާއްޖެ އެމްވީއަށް ކޮޕީ ލިބިފައިވާ އެ ހުކުމްގައިވާ ގޮތުން ޒިނޭ ކޮށްގެން އޭނާ އަށް ވަނީ ދަރިޔަކު ލިބިފައެވެ. އެ ދަރިފުޅު ވިހާފައި ވަނީ މިދިޔަ އަހަރު މެއި މަހުގެ 16 ވަނަ ދުވަހު ޅ. އަތޮޅު ހޮސްޕިޓަލުގައެވެ.
ޅ. ނައިފަރު ކޯޓުން އޭނާގެ މައްޗަށް ހުކުމް ކޮށްފައިވަނީ ހަމައެކަނި އެއަންހެން މީހަގެ ބަޔާނަށް ރިއާޔަތް ކޮށެވެ. ޝަރީއަތުގެ މަޖިލީހުގައި ގާނޫނީ ވަކީލެއްގެ އެހީތެރިކަން އޭނާ ހޯދާފައި ނުވާ ކަމަށްވެސް ހުކުމްގައިވެއެވެ.
